Бухоро вилояти ҳокимлиги

Вилоят раҳбари икки давлат ўртасидаги ҳамкорлик кўп қиррали эканини таъкидлаб, мамлакатимизда рўй берган ислоҳотлар, истиқболдаги режалар, Бухоро вилоятида хорижий инвесторлар учун яратилган имкониятлар ҳақида маълумот берди.

Қайд этилганидек, жаҳон сиёсий майдонида кескин ўзгаришлар кечаётган, анъанавий дипломатик ёндашувлар ўрнини янги форматлар эгаллаётган шароитда Ўзбекистон ва Америка Қўшма Штатлари ўртасидаги ҳамкорлик муносабатларининг мустаҳкамланиши алоҳида аҳамият касб этмоқда. Президентимиз Шавкат Мирзиёевнинг Америка Қўшма Штатлари президенти Дональд Трамп таклифига биноан “Тинчлик кенгаши”нинг дастлабки саммитида иштирок этиш учун Вашингтон шаҳрига амалий ташрифи икки давлат муносабатларини янги стратегик босқичга олиб чиқди.

Мазкур ташриф нафақат икки давлат ўртасидаги алоқаларни янги босқичга олиб чиқиши, балки Марказий Осиё минтақасида барқарорлик ва ўзаро ҳамкорликни кучайтиришга хизмат қилиши билан ҳам муҳимдир.
Ушбу истиқболли ҳамкорлик 2017 йилдан буён изчил ривожланиб келаётган стратегик шериклик муносабатларининг мантиқий давоми ва амалий натижасидир.

Шунингдек, 2025 йилнинг 11-16 ноябрь кунлари Бухоро вилояти бошчилигидаги делегациянинг Америка Қўшма Штатларига хизмат сафари амалга оширилгани, унда АҚШнинг йирик компаниялари ҳамда ишбилармон доира вакиллари билан музокаралар ўтказилиб, қатор келишувларга эришилгани қайд этилди.

Ўз навбатида, Жонатан Хеник мамлакатимизда амалга оширилаётган ислоҳотларни юқори баҳолаб, Бухорога Америка капитали ва технологияларини жалб қилиш, таълим ва туризм соҳаларни ривожлантириш, энергетика, АКТ жабҳаларида қўшма корхоналар ташкил этиш ҳамда молиявий ҳамкорликни мустаҳкамлаш имкониятлари мавжудлигини айтиб ўтди.  Бу борада ўзаро ҳамкорликни янада ривожлантириш юзасидан таклифларини баён этди. АҚШ элчисининг таклифлари қўллаб-қувватланди.

Учрашув сўнггида ушбу йўналишларда ҳамкорликни янада мустаҳкамлашга келишиб олинди.

Вилоят ҳокимлиги матбуот хизмати