Бухоро вилояти ҳокимлиги

Таъкидланганидек, ўтган 2025 йилда ялпи ҳудудий маҳсулот 107,2 фоизга ўсиб, 86,6 трлн сўмни, аҳоли жон бошига эса 41,4 млн сўмни ташкил этди. Шу жумладан, саноат маҳсулотлари ҳажми 53,5 трлн сўмга, хизматлар соҳасида 42,7 трлн сўмга, қишлоқ хўжалиги 48,3 трлн сўмга, қурилиш ишлари 19,2 трлн сўмга етказилди. 2025 йилда бюджет даромадларига 4 790,9 млрд сўм тушумлар тушиши таъминланди. Амалга оширилган тизимли чора-тадбирлар натижасида 275 минг нафар аҳоли бандлиги таъминланди. Хориждаги 108 минг нафар мигрантлардан 14 минг нафардан зиёди тартибли меҳнат миграцияси дастурлари орқали иш ўрнига эга бўлди. Вилоятда ишсизлик 5,4 фоиздан 3,0 фоизга, камбағаллик даражаси эса 8,7 фоиздан 3,0 фоизгача қисқартирилди. Шунингдек, вилоятга 4,0 млрд АҚШ доллари миқдорида хорижий инвестициялар жалб қилинди. Шундан ҳудудий корхоналар томонидан 1,7 млрд АҚШ доллари миқдоридаги хорижий инвестициялар ўзлаштирилиб, бу кўрсаткич ўтган йилга нисбатан 170 фоизни ташкил этди. Инвестиция дастурлари доирасида амалга оширилган лойиҳалар ҳисобига 14 300 та янги ва барқарор иш ўринлари яратилди. Ҳудудий корхоналар томонидан ишлаб чиқарилган маҳсулотлари экспорти 414 млн АҚШ долларига етиб, 1,5 баравар ўсишга эришилди. 2025 йилда уй-жойга муҳтож аҳоли учун 6 500 та хонадондан иборат 140 та янги кўп қаватли уй-жой қурилди. Шундан “Янги Ўзбекистон” массивларида 524 хонадонли 12 та, бошқа массивларда 5 976 хонадонли 128 та уй-жойлар фойдаланишга топширилди. Шунингдек, аҳолини ижтимоий қўллаб-қувватлаш ҳамда уй-жой билан таъминлаш мақсадида 1 000 нафар фуқарога субсидия асосида уй-жой сотиб олиш учун жами 294,4 млрд сўм ажратилди. Таъкидлаш лозимки, давлатимиз раҳбари бошчилигидаги жорий йил 23 январда ўтказилган йиғилишда Бухоро вилоятида “Ислоҳотлар штаби” фаолиятини жадаллаштириш, “оғир” тоифадаги туман ва маҳаллаларда аҳоли муаммоларини ўрганиш ва ҳал этиш, бандлигини таъминлаш, камбағалликни қисқартириш, инвестиция дастурлари ижросини таъминлаш ва бошқа йўналишларда амалий ёрдамлар кўрсатиш бўйича топшириқлар берилган эди. Шу билан бирга, Президентимизнинг тегишли қарор ва Фармонларига асосан ҳудудларда барқарор ва юқори даромадли иш ўринларини яратиш, лойиҳавий ёндашув асосида маҳаллалар ихтисослашувини чуқурлаштириш ва ҳудудларнинг солиштирма устунликларини аниқлаган ҳолда тадбиркорлик фаолияти учун қулай шарт-шароитлар яратиш, расмий бандликни рағбатлантирувчи механизмларни жорий қилиш, халқаро тан олинган малака сертификатига эга бўлган мутахассисларни тайёрлаш ҳамда камбағалликни қисқартириш борасидаги ишларни сифат жиҳатидан янги босқичга олиб чиқиш бўйича 2026 йилда “Ислоҳотлар штаби” томонидан амалга ошириладиган устивор вазифалар белгилаб берилди. Бунинг учун “Ислоҳотлар штаби”га 37 та вазирлик ва идоралардан масъуллар жалб қилинган. “Ислоҳотлар штаби” томонидан жорий йилда вилоятдаги 5 та туман ва 71 та маҳаллаларни жадал ривожлантириш, қишлоқ ҳудудларида шаҳар қиёфасини олиб кириш, тадбиркорлик муҳитини яхшилаш ва аҳолини қулай инфратузилма билан таъминлаш мақсадида жами 593 млрд сўм маблағлар ажратилиши режалаштирилган. Жумладан, Ўзбекистон Республикаси Президентининг 2025 йил 8 октябрдаги ПҚ-298-сонли қарорига асосан Шофиркон ва Ғиждувон туманларига “Янги Ўзбекистон қиёфасида туман” мақоми берилган ва 130 млрд сўм (Шофиркон – 30 млрд сўм, Ғиждувон – 100 млрд сўм), шунингдек, “Янги Ўзбекистон қиёфасидаги” 35 та маҳаллага 175 млрд сўм маблағлар ажратилган. Топшириққа кўра, Ҳисоб палатаси томонидан тегишли туман ҳокимликларига республикадан вакиллар бириктирилган ҳолда амалга ошириладиган лойиҳа таклифлари ишлаб чиқилган. Йиғилишда вилоятда “Ислоҳотлар штаби” томонидан ўтказилган ўрганиш ва таҳлилларда аҳоли кайфиятига таъсир этувчи, уларнинг кунлик ҳаёти, яшаш муҳитини яхшилаш ва тадбиркорликни ривожлантириш билан боғлиқ масалаларга ҳам алоҳида эътибор қаратилди. Бу борада муҳим вазифалар белгиланди.