Ботир Зарипов Олот туманида “Соҳил бўйи” аҳоли дам олиш маскани лойиҳаси доирасидаги ишлар билан танишди
2026-02-17 21:20:00 / Янгиликлар
Олот туманида ҳам мастер режа асосида амалга оширилаётган кенг кўламли бунёдкорлик ва ободонлаштириш ишлари ҳудуднинг ижтимоий-иқтисодий ривожланишида муҳим ўрин тутмоқда. Аҳоли турмуш даражасини яхшилаш, замонавий шаҳарсозлик талабларига мос инфратузилмани шакллантириш ҳамда туманнинг меъморий қиёфасини янгилашга қаратилган ушбу ишлар орасида “Соҳил бўйи” аҳоли дам олиш маскани лойиҳаси алоҳида аҳамият касб этмоқда.
Бугун вилоят ҳокими Ботир Зарипов туманга ташрифи давомида мазкур лойиҳа доирасида амалга оширилган ишларни кўздан кечирди.
Таъкидлаш лозимки, мазкур лойиҳа “Аму–Қоракўл” каналининг қарийб 500 метр узунликдаги қисми бўйлаб амалга оширилмоқда. Умумий қиймати 3 миллиард сўмни ташкил этган лойиҳа доирасида замонавий инфратузилма объектлари, савдо мажмуалари, кўнгилочар ва хизмат кўрсатиш масканлари, шунингдек, кичик бизнес ва хусусий тадбиркорлик субъектлари учун қулай шароитлар яратилмоқда. Бу эса нафақат аҳоли учун муносиб дам олиш масканини барпо этиш, балки тадбиркорлик муҳитини янада ривожлантиришга ҳам хизмат қилмоқда.
Мазкур ҳудудда нафақат олотликлар, балки қўшни туманлардан келаётган меҳмонлар учун ҳордиқ чиқариш масканига айланиши кўзда тутилмоқда. Келгусида бу ерда йирик байрам тадбирлари, маданий-маърифий учрашувлар ва оммавий сайилларни ўтказиш имконияти ҳам яратилиши қайд этилди.
Лойиҳа якунига етгач, ҳудуд замонавий архитектура ечимлари асосида барпо этилган, экологик тоза, хавфсиз ва қулай жамоат масканига айланиши кутилмоқда. Бу эса туман ижтимоий ҳаётига янги суръат ва мазмун бахш этиб, ички туризм салоҳиятининг ошишига ҳам мустаҳкам замин яратади.
Ташриф давомида масъулларга лойиҳани янада мукаммаллаштириш, ҳудуднинг жозибадорлигини ошириш ҳамда зарур бўлса, қўшимча қулайликлар яратиш бўйича аниқ кўрсатмалар берилди.
Вилоят ҳокимлиги матбуот хизмати