Ботир Зарипов Қоракўл туманидаги “маҳалла еттилиги” тизими аъзолари билан онлайн мулоқот ўтказди: Кун тартибида – инфратузилмани яхшилаш
2026-02-17 20:30:00 / Янгиликлар
Қоракўл туманида ҳам аҳолига қулайлик яратиш, фуқароларнинг турмуш даражасини янада ошириш ҳамда муҳандислик-коммуникация тармоқларини яхшилаш борасида амалий ишлар изчил давом эттирилмоқда.
Бу борада давлатимиз раҳбарининг 2025 йил 8 октябрдаги “Алоҳида туман (шаҳар) ва маҳаллаларни аҳолининг яшаши ва тадбиркорлик фаолияти билан шуғулланиши учун намунали ҳудудга айлантириш чора-тадбирлари тўғрисида”ги, шунингдек, Президентимизнинг жорий йил 5 февралдаги “2026-йилда ҳудудларни янгича ёндашувлар асосида ривожлантириш орқали аҳоли даромадини ошириш, барқарор иш ўринларини яратиш ҳамда камбағалликни қисқартириш чора-тадбирлари тўғрисида”ги қарорлари дастуриламал вазифасини ўтамоқда.
Мазкур қарорларга асосан тумандаги “Дарғали”, “Мирзақалъа” ва “Човли” маҳаллалари “оғир” тоифа сифатида баҳоланиб, ушбу ҳудудларда инфратузилмани яхшилаш, камбағалликни қисқартириш ҳамда аҳоли даромадларини оширишга қаратилган аниқ чора-тадбирлар белгиланган. Бундан ташқари, тумандаги “Жиғачи”, “Кетмондўғди” ва “Сайёт” маҳаллаларини “Янги Ўзбекистон қиёфасидаги маҳаллалар”га айлантириш ишлари ҳам изчил амалга оширилмоқда.
Ушбу маҳаллаларда йўл, электр энергияси, ичимлик суви, ижтимоий соҳа обектларини яхшилаш билан бирга, аҳолини тадбиркорликка жалб қилиш, уларнинг ташаббусларини қўллаб-қувватлаш, янги иш ўринлари яратиш орқали бандликни таъминлаш чоралари кўрилмоқда.
Дастур доирасида “Янги Ўзбекистон” қиёфасидаги ҳар бир маҳаллага 5 миллиард сўмдан, “оғир” тоифадаги маҳаллаларга эса 3 миллиард сўмдан маблағ ажратилиши белгиланган. Ушбу маблағлар ҳисобидан ҳудудларнинг инфратузилмасини яхшилаш, ижтимоий объектларни таъмирлаш, тадбиркорликни ривожлантириш ва аҳоли даромадларини оширишга қаратилган лойиҳалар амалга оширилади.
Бундан ташқари, туманда тадбиркорлик ва инвестиция лойиҳаларини кенгайтириш, ишлаб чиқаришни ривожлантириш ҳамда янги иш ўринлари яратиш мақсадида республика ва маҳаллий буджет маблағлари ҳисобидан жами 60 миллиард сўм йўналтирилиши режалаштирилган.
Бугун вилоят ҳокими Ботир Зарипов бошчилигидаги ишчи гуруҳ томонидан туман ҳокимлигида ушбу маҳаллаларда амалга оширилиши режалаштирилаётган лойиҳалар муҳокама қилинди. Йиғилиш давомида қарор ижроси доирасида амалга ошириладиган ишлар атрофлича таҳлил қилиниб, “маҳалла еттилиги” вакиллари билан онлайн мулоқот ўтказилди.
Мулоқот давомида ҳудудларда мавжуд муаммоларни бартараф этиш, аҳоли бандлигини таъминлаш, янги иш ўринлари яратиш, йўл ва муҳандислик-коммуникация инфратузилмасини ривожлантириш, мавжуд имкониятлардан самарали фойдаланиш бўйича аниқ вазифалар белгилаб олинди.
Вилоят ҳокимлиги матбуот хизмати