Бухоро вилояти ҳокимлиги

Айниқса, ҳарбийларларнинг жанговар шайлигини ошириш, уларнинг халқ билан ҳамнафас бўлиб, юрт тинчлиги ва осойишталигини таъминлашдаги хизматини юксак даражада ўташлари учун барча шароит ва чоралар кўриляпти.
Бугун Жануби-ғарбий махсус ҳарбий округи қўмондони Кадиржон Турсунов, вилоят ҳокими, ҳарбий-маъмурий сектор раҳбари Ботир Зарипов иштирокида ўтказилган йиғилишда шу хусусда сўз борди.

Таъкидланганидек, Президентимиз, Қуролли Кучлар Олий Бош қўмондони Шавкат Мирзиёев раҳбарлигида жорий йилнинг 13 январь куни ўтказилган Хавфсизлик кенгашининг кенгайтирилган таркибдаги йиғилишида раҳбарлар олдига жорий йилда амалга оширилиши лозим бўлган аниқ вазифалар қўйилди. 

Хусусан, мамлакат мудофасини таъминлаш, қўшинлар жанговар шайлигини ошириш, мудофаа объектлари инфратузилмасини ривожлантириш, муддатли ҳарбий хизматни ўтаган ёшларни жамиятда ўз ўрнини эгаллаши бўйича аниқ топшириқлар берилди.

Йиғилишда давлатимиз Раҳбари хавфсизликни таъминлаш учун соҳа ва тармоқлар “проактив иш режими”га ўтиши, яъни 
хавф-хатарларга олдиндан жавоб қайтариш бўйича ишлаши зарурлигига алоҳида тўхталиб ўтди.

-Ўтган йили Бухоро ҳарбий-маъмурий сектори жамғармасидан ҳарбий қисм ва шаҳарчаларнинг инфратузилмасини ривожлантириш бўйича “йўл харитаси”да белгиланган чора-тадбирлар учун зарур маблағларни йўналтирдик. Жорий йилда ҳам ушбу тадбирларни изчил давом эттирамиз, ҳарбий қисм ва шаҳарчалар учун зарур маблағлар ажратилиши таъминлаймиз, - деди Ботир Зарипов.

Қайд этилганидек, муддатли ҳарбий хизматчиларни ҳақиқий ватанпарвар ёшлар қилиб тарбиялаш, уларни касб-ҳунарга, хорижий тилларга ўргатган ҳолда жамиятда ўз ўрнини мустаҳкам эгаллашига қаратилган тадбирларни амалга ошириш бўйича вазифалар белгилаб берилди.

Бундан ташқари, ҳарбий қисмларнинг инфратузилмасини такомиллаштириш, “Жасорат мактаблари” ҳамда чақирувга қадар бошланғич тайёргарлик синфхоналарини жиҳозлаш, ҳарбий йиғинларни ўтказиш, сафарбарлик захираларини яратиш борасида ҳам вазифалар аниқ.

Шу нуқтаи назардан, вилоятдаги ҳарбий қисмларда ўз хизмат бурчини ўтаётган ҳарбий хизматчиларни касбга тайёрлаш бўйича 3-6 ойлик ўқитиш дастурларини амалга ошириш лозим.

Йиғилишда сўз олган Жануби-Ғарбий махсус ҳарбий округ қўшинлари қўмондони Кадиржон Турсунов Қуролли Кучларимизда амалга оширилаётган ислоҳотлар, Армиямиз нуфузини ошириш бўйича бажарилаётган тадбирлар ҳамда ҳарбий-маъмурий сектор фаолияти ҳақида тўхталди.

Йиғилишда Бухоро ҳарбий-маъмурий сектори фаолиятини ташкиллаштириш бўйича 2026 йилга мўлжалланган “йўл харитаси” лойиҳаси юзасидан кенгашиб олинди. 

Вилоят ҳокимлиги матбуот хизмати