Ғиждувон: “Тавариён” маҳалласида қурут тайёрлаш бир нечта оиланинг даромад манбаига айланган
2026-01-28 11:00:00 / Янгиликлар
Таркибида темир, магний, калий, калцийга бойлиги учун суяк ва мушакларни мустаҳкамлайди. Болаларда бўй ўсишига, уни сўриб юриш ҳатто тишлар соғлом, бақувват бўлишига ёрдам беради. Кун давомида қувватни сақлайди. Қурут таркибида Д витамини бўлиб, калцийнинг сўрилишини келтириб чиқаради ва йўғон ичак саратонининг олдини олади.
Маҳаллий шароитда қурутнинг ранглилари, кичкина, бежиримлари, тўртбурчак, учбурчак, дойра, хуллас, ўнлаб хили бор. Йилнинг тўрт фаслида бозорда қурут савдоси ҳам авжида, ўзига яраша, “баракали бизнес” экани ҳеч кимга сир эмас. Буни теран тушунган ғиждувонликлар маҳаллаларида ҳам қурут тайёрлаш билан шуғулланаётган оилалар сафи кенгаймоқда. Айни кунда маҳаллий миришкор қурутчи оилалар томонидан бозорга ўнлаб тонна сифатли маҳсулот ишлаб чиқарилиб, аҳоли дастурхонига етказиб берилмоқда.
Жумладан, Тавариён маҳалласида Баҳодир Тилавов цехида ойига 6 тонна, Мирали Болтаев ташкил этган кичик корхонада 7 тоннагача, Аслиддин Бобохонов ҳамда Жамшид Саидов цехларини ҳар бирида 5 тоннадан қурт маҳсулоти ишлаб чиқарилиб, аҳоли дастурхонига етказилмоқда.
Муҳими, ўнлаб оила учун даромад манбаига айланган қурут тайёрлаш кичик корхоналари хушхўр маҳсулот ишлаб чиқариш баробарида ўнлаб хонадон турмуш сифатини яхшиламоқда, маҳаллий иқтисодиётга улуш қўшмоқда. Айни пайтда мазкур фаолият орқали кичик корхонасига эга оила ойига ўртача 35 миллион сўмдан ортиқ даромадга эга бўлмоқда.
Туман мутасаддилари, маҳалла маъмурияти бевосита кўмагида Тавариён маҳалласида қурут тайёрлаш салмоғини янада ошириш, оилалар даромадини ошириш чоралари кўрилмоқда. Бу каби лойиҳалар кичик бизнес ва хусусий тадбиркорликни ривожлантиришга хизмат қилиши билан аҳамиятли.
Вилоят ҳокимлиги матбуот хизмати