Қоракўл: “Ташаббусли бюджет” туфайли Қораҳожи маҳалласи йўли асфальтлаштирилмоқда
2025-12-01 16:00:00 / Янгиликлар
“Ташаббусли бюджет” платформаси орқали айни кунда Қоракўл туманида ҳам маҳалла ва қишлоқ йўллари равон кўринишга келтирилмоқда. Жумладан, “Қораҳожи” МФЙ аҳолиси кейинги йилларда йўл муаммосидан азият чекар, бу борадаги норозиликлар ҳам етарлича эди.
Ниҳоят, ички йўлларни асфальтлаштириш лойиҳаси қораҳожиликларнинг 4 681 та овозини тўплаб, “Ташаббусли бюджет” умумиллий лойиҳасида ғолиб деб топилгани орзиқиб кутилган янгилик бўлди. Бу ҳамжиҳатлик маҳалла аҳолисининг ўз ҳудудини обод қилишдаги фаоллиги ва бирдамлигини яққол намоён этди.
Ғолиб лойиҳа доирасида Деҳқонобод қишлоғининг узунлиги 2,5 минг метр масофадаги ички йўлига асфальт қопламаси ётқизиш ишлари жадал бошланди. Бугун ҳудудда кенг кўламли таъмирлаш-тиклаш, асфальтлаштириш ишлари самараси ўлароқ, равон кўриниш олаётгани йўл ҳайдовчилар ва пиёдалар, йўловчилар кундалик ҳаётида қулайлик яратмоқда. Айниқса, мактабга қатновчи болалар, нуроний пенсионерлар ҳаракатланиши, транспорт воситалари қатнови учун хавфсиз йўл барпо этилмоқда.
Муҳими, жараён тўлиқ жамоатчилик иштирокида, очиқ ва шаффоф тарзда амалга оширилмоқда. Янгиланган йўл ҳудуд қиёфасини буткул ўзгартириб, аҳоли турмуш тарзига ижобий таъсир кўрсатмоқда. Қолаверса, бу йўл маҳалла аҳолисининг ижтимоий фаоллиги, бирлиги ва ташаббускорлигини янада оширди.
Вилоят ҳокимлиги матбуот хизмати