Бухоро вилояти ҳокимлиги

“Обод маҳалла” дастури асосида қаҳрамонликлар учун ҳам инфратузилма яхшиланган. Хусусан, ички йўллар асфальтланиб, пидёдалар йўлаклари қурилган. Трансформатор ўрнатилиб, электр тармоқлари янгиланган. Жумладан, бунда қайси касб-корда меҳнат қилмасин, албатта, ҳовлисидаги томорқа ерида ишлаб, машаққат билан ҳосил етиштириб, даромад топаётган хўжаликлар етарлича.  

Вилоят ҳокимининг биринчи ўринбосари Ботир Аҳмедов бошчилигида куни кеча Қаҳрамон маҳалласида бўлиб ўтган кўргазмали ўқув-амалий семинари ҳам хонадонларда мавжуд экин еридан самарали фойдаланиш, эҳтиёжманд оилаларга даромад манбаини яратиш, ишсиз ва камбағал оилалар даромадини оширишдек долзарб масалага бағишланди.  

Таъкидланганидек, ҳудудда томорқа маданиятини шакллантираётган миришкорлар билан бирга эҳтиёжманд оилалар меҳнатга лаёқатли аъзоларига экин ери бериш, бу ерда рўзғор эҳтиёжига яраша пешона терини тўкиб, сабзавот-полиз маҳсулотлари экиб етиштириши учун имконият яратишга алоҳида эътибор қаратилмоқда. 

Маълумотларга назар солсак, Қаҳрамон маҳалласида иссиқхона йўналишида  банд хонадон сони 608 тани, яъни 83 фоизни ташкил этиб, шундан 152 гектар иссиқхона ерида деҳқончилик қилинмоқда. Шундан ҳудудда аҳоли хонадонларида 77 гектарда, даладаги 75 гектар ерда ташкил қилинган деҳқон хўжаликларида пешма-пеш ҳосил етиштириш тажрибаси шаклланган. 

“Бир маҳалла—бир маҳсулот” тамойили асосида тумандаги маҳаллаларни шаклланган тажриба асосида аниқ бир экин турига ихтисослаштириш, бунда тажрибали фермер, деҳқон ва тадбиркор аёллар иш услубини оммалаштириш муҳим аҳамият касб этмоқда. Вилоят ва туман мутасаддилари, маҳалла фаоллари, деҳқон ва томорқачилар ҳозир бўлган тадбирда ҳудудда эҳтиёжманд оилалар аъзоларига томорқа сифатида ажратиб берилган 10 гектарли экин ерида иссиқхона барпо этиш ишларига киришилгани алоҳида қайд қилинди. 

Намуна ўрнида, дейлик 10 сотихдан иборат иссиқхонада маҳсулот етиштириш ҳажмлари ўрганилди. Мутахассис агрономлар хулосасига биноан бу ерда дастлабки ҳосилда 2500 туп помидор кўчати ўтқазиб, парваришни яхши олиб борса, 10 тоннагача сара ҳосил олиш мумкин. Иккинчи ҳосилда эса булғор қалампиридан  4 000 та кўчат ўтқазиб, 4,5 тонна атрофида ҳосил етиштириш тажрибаси бор. Шу билан хонадон ёки деҳқон хўжаликда қўлга киритиладиган даромад салмоғи 90 – 100 миллион сўм атрофида бўлади. 

Кўргазмали ўқув семинарида вилоят ҳокимининг биринчи ўринбосари Ботир Аҳмедов, Ромитан тумани ҳокими Умид Барноев, республика Марказий банки вилоят бошқармаси бошлиғи Эркин Мансуров ва бошқалар томонидан йиғилганлар, томорқа ер эгаларига зарур тавсиялар берилди.  

Томорқалар нафақат оила эҳтиёжини таъминлаш, балки ҳосилни бозорга чиқариш орқали қўшимча даромад манбаига ҳам айланиши лозим. Шу маънода, вилоят ҳокимининг биринчи ўринбосари Ботир Аҳмедов қаҳрамонлик миришкор томорқачилардан, айни кунда 20 сотихдан иборат иссиқхонасини яшнатиб, даромад манбаига айлантирган Ҳожи Бақоев ҳамда томорқасининг 6 сотих ерида иссиқхона қуриб, йилида 3 марта ҳосил етиштираётган Нажмиддин Жумаевлар хонадонларида бўлди. 

Бу иссиқхоналарда бугун булғор қалампири экиб етиштирилмоқда. Ҳудудда шундай меҳнатда банд бўлган Гулбодом Каримова, Халил Қобилов, Гулбаҳор Тўхтаева, Чарос Фатуллаева сингари миришкорлар тажрибаси бошқаларга ибрат, ўрганишга арзирли ишдир. Муҳими, чекка маҳаллада бугун иссиқхона хўжалиги билан шуғулланувчи аҳоли хонадонлари сафи кенгаймоқда. 

Вилоят ҳокимлиги матбуот хизмати