Бухоро вилояти ҳокимлиги

Наврўзликлар жажжи фарзандлари учун болалар боғчасига бўлган эҳтиёж бартараф қилиниб, ҳудудда 90 ўринга мўлжалланган замонавий мактабгача таълим муассасаси қуриб битказилди. Икки қаватли, шинам иншоот қурилиши пудратчи "Gʻijduvon Gʻovshun maxsus qurilish-montaj" МЧЖ моҳир бинокорлари томонидан амалга оширилди. 

Мазкур лойиҳага умумий қиймати 4 миллиард сўмга яқин маблағ сарфланиб, бунда жажжи ўғил-қизлар учун зарур шарт-шароит, керакли инвентарлар, адабиёт ва ўқув қуроллари билан жиҳозланган дарс, машғулот хоналалари, ўйин майдончалари, шинам ётоқхона, ошхона, санитария ва иситиш тармоғи шай қилинган. Эндиликда ўндан ортиқ тарбиячи-ходим боғчага қатнайдиган болажонлар таълим-тарбиясига масъул сифатида бириктирилган.       
 
Куни кеча ушбу 18-сонли давлат мактабгача таълим ташкилотининг тантанали очилиш маросими бўлиб ўтди. Унда туман ҳокимлиги, жамоатчилик вакиллари, маҳалла фаоллари, ота-оналар иштирок этдилар. 

Тадбирда сўз олганлар обод қишлоқларимиз, янгиланаётган таълим муассасалари ва бунёдкорлик ишлари орқали юртимиз болажонлари фаровон ҳаёт ва муносиб таълим олиш имкониятига эга бўлаётганларини алоҳида таъкидладилар.

Шундан сўнг муассаса рамзий қизил лентаси қирқилиб, йиғилганлар  таълим ташкилотида болажонлар учун яратилган шарт-шароит билан яқиндан танишдилар. Якунда туман ҳокими бошчилигидаги мутасаддилар маҳалла аҳли билан биргаликда болалар боғчаси ҳудудига яхши ниятлар билан манзарали кўчатлар ўтқаздилар.

Вилоят ҳокимлиги матбуот хизмати