“Ўзбек аёли - ўтмиш, нафосат, келажак рамзи” номли анъанавий IV Республика фотокўргазмаси ташкил этилди.
2025-03-06 12:00:00 / Янгиликлар
Бугун, Тошкент Фотосуратлар уйида 8 март – Халқаро хотин-қизлар куни байрами муносабати билан ИВ Республика фотокўргазмаси иш бошлади. Фотокўргазмага спорт тарихида аёллар мавқеига оид Ўзбекистон Кинофотофоно ҳужжатлари миллий архиви сақловидаги аёл спортчиларнинг 100 дан зиёд фотолари тақдим этилган.
Мустақиллик йилларида аёллар, хотин-қизларга бўлган ғамҳўрлик, эътибор туфайли аёллар ҳар соҳада ўзини намоён этибгина қолмай, улкан ютуқларга эришиб келмоқда. Ҳар бир соҳада аёл ўрни, мавқеини ошириш, уларга меҳнат фаолиятида етарли шарт-шароитлар яратиш давлат сиёсатининг ажралмас қисмига айланди. Аёл-қизларимизда соғлом турмуш тарзини кенг тарғиб этиш, уларнинг қонуний ҳуқуқ ва манфаатларини таъминлашга қаратилган мустаҳкам ҳуқуқий база яратилди. Бугунги кунда мамлакатимиз хотин-қизларининг фан, таълим, маданият ва санъат, спорт соҳаларида эришган ютуқлари юксак баҳоланиб келмоқда. Айниқса, спорт соҳасида эришилаётган ютуқлар замона аёллари нуфузини янада оширди. Бу эса спорт тарихида камдан кам учрайдиган ҳодиса эканлигини халқаро экспертлар ҳам тан олмоқда.
Аёл – ҳар соҳада ўзини ёрқин ва тўлиқ намоён эта оладиган нозик хилқатдир. Жумладан спортнинг ҳар бир турида хотин-қизларнинг ютуқлари тарих зарварақларида мустаҳкам муҳрланиб бормоқда. Бугунги тадбир физкультура ва спорт билан шуғулланадиган ҳамда унга эътиборли бўлган, соғлом ҳаётни қўллаб-қувватловчи аёлларга бағишланади.
Кўргазмада 1930 йиллардан бошлаб бугунги кунгача аёллар спортига бағишланган архив фотолари намойиш қилинмоқда. Айниқса, илк бора намойиш этилаётган 20 дан ортиқ фотолар кузатувчиларда катта қизиқиш уйғотди. Мусобақаларга тайёргарлик жараёнлари, спартакиада, олимпиада ва бошқа спорт тадбирларида фаол қатнашган хотин-қизлар ўтмиш ва нафосатни, матонат ва келажакни акс эттирмоқда. Фотосуратларда акс этган спортчи аёлларимизнинг ҳолати, кўзи ва ҳиссиётларидан ўша даврдаги матонатини, кучи ва ғайратини англаш қийин эмас. Ташриф буюрувчилар, айниқса ёшлар мазкур тарихий фотоларни кузатар экан, уларнинг юзида спортга бўлган катта қизиқиш кузатилади.
Кўргазманинг тантанали очилиш маросимида «НУРСАМУС» кимоно компанияси ҳамкорлигида спорт кийимлари намойиши ташкил этилди.
Кўргазмада академик С.Ғуломов, Ўзбекистон Республикасининг спортда ютуққа эришган ва самарали меҳнат қилаётган хотин-қизлар, табаррук онахонлар, турли вазирлик ва идоралар, жамоат ташкилотларининг вакиллари, "Ўзархив" агентлиги ва архив ходимлари ҳамда оммавий ахборот вакиллари иштирок этди.
Фотокўргазма 10 мартгача давом этади.