Мустақиллигимизнинг 35 йиллигига тайёргарлик Ўзбекистон Миллий архивида қизғин бошланди
2026-07-28 14:00:00 / Янгиликлар
Мустақиллигимизнинг 35 йиллигига тайёргарлик Ўзбекистон Миллий архивида қизғин бошланди
Ўзбекистон Республикаси давлат мустақиллигининг 35 йиллигини муносиб кутиб олиш мақсадида Ўзбекистон Миллий архивида кенг кўламли тайёргарлик ишлари қизғин давом этмоқда. Президентнинг Мустақилликнинг 35 йиллигини кенг нишонлаш тўғрисидаги қарори ижросини таъминлаш доирасида архив тизимида қатор маънавий-маърифий ва илмий-амалий тадбирлар режалаштирилган.
Хусусан, мамлакатимиз мустақиллиги тарихи, давлат қурилиши, ижтимоий-иқтисодий ислоҳотлар ва халқимиз эришган ютуқларни акс эттирувчи ноёб архив ҳужжатлари сараланиб, кўргазмалар ташкил этиш ишлари олиб борилмоқда.
Шунингдек, тарихий ҳужжатларни рақамлаштириш, уларни кенг жамоатчиликка тақдим этиш ҳамда ёш авлодда Ватанга садоқат, миллий ғурур ва тарихий хотирани мустаҳкамлашга хизмат қилувчи тарғибот тадбирларига алоҳида эътибор қаратилмоқда.
Мустақиллик байрами арафасида Ўзбекистон Миллий архивида очиқ эшиклар кунлари, давра суҳбатлари, илмий конференциялар ва ҳужжатли кўргазмалар ўтказилиши режалаштирилган. Ушбу тадбирлар орқали фуқаролар, айниқса ёшлар, мустақиллик йилларида эришилган улкан ютуқларни тарихий манбалар асосида яқиндан ўрганиш имкониятига эга бўладилар.
Ўзбекистон Миллий архиви жамоаси Мустақилликнинг 35 йиллик байрамини юксак савияда ўтказишга муносиб ҳисса қўшиш, тарихий меросни асраб-авайлаш ва келажак авлодларга етказиш йўлида масъулият билан фаолият олиб бормоқда.
Бу эзгу ишлар халқимизнинг бой тарихи ва мустақиллик қадриятларини янада кенг тарғиб этишга хизмат қилади.