Ўзбекистон Республикаси Адлия вазирлиги ҳузуридаги "Ўзархив" Агентлиги

“Тошкент зилзиласи – халқлараро бирдамлик нуқтаси” мавзусида архив ҳужжатлари фотокўргазмаси ўтказилди

Жорий йилнинг 17 апрель куни Тошкент музейида Ўзбекистонда Шанхай ҳамкорлик ташкилотининг Халқ дипломатияси маркази ҳамда Ўзбекистон Республикаси Адлия вазирлиги ҳузуридаги “Ўзархив” агентлиги ҳамкорлигида “Тошкент зилзиласи – халқлараро бирдамлик нуқтаси” мавзусида архив ҳужжатлари фотокўргазмаси ташкил этилди.

Мазкур тадбирнинг асосий мақсади архив ҳужжатлари асосида халқлараро дўстлик, меҳр-оқибат ва инсонпарварлик каби умуминсоний қадриятларни тарғиб қилиш, тарихий хотирани асраш ҳамда ушбу маънавий меросни кенг жамоатчиликка етказишдан иборат.

Фотокўргазмада давлат ва жамоат ташкилотлари вакиллари, архив ва тарих соҳаси мутахассислари, ОТМ профессор-ўқитувчилари ва талабалар, оммавий ахборот воситалари ходимлари ҳамда кенг жамоатчилик вакиллари иштирок этди.

1966 йил 26 апрель куни содир бўлган Тошкент зилзиласининг 60 йиллиги муносабати билан ташкил этилган мазкур тадбирда, мамлакатимиз тарихидаги энг оғир синовлардан бири сифатида қайд этилиб, табиий офат оқибатларини бартараф этиш жараёнида намоён бўлган халқлараро бирдамлик, инсонпарварлик ва ўзаро ҳамжиҳатлик анъаналарини кенг ёритишга қаратилди.

Маълумки, мазкур фожиа оқибатида пойтахтда катта вайронагарчилик юзага келган бўлса-да, ушбу синов турли миллат ва халқларни ягона мақсад йўлида бирлаштирди. Собиқ иттифоқнинг турли республикаларидан келган минглаб инсонлар Тошкентни тиклаш ишларида фаол иштирок этиб, халқлар ўртасидаги дўстлик ва ҳамжиҳатликнинг юксак намунасини намоён этдилар.

Фотокўргазма доирасида 1966 йилги зилзила оқибатлари, вайронагарчилик кўлами, шаҳарни қайта қуриш жараёнлари ҳамда турли халқлар вакилларининг Тошкентни тиклашдаги беқиёс ҳиссасини акс эттирувчи 60 дан ортиқ архив фотосуратлар ва ҳужжатлар намойиш этилди. Ушбу материаллар орқали Тошкент зилзиласи нафақат табиий офат, балки халқларни яқинлаштирган, инсонларни эзгулик ва ҳамжиҳатлик ғояси атрофида бирлаштирган муҳим тарихий воқеа сифатида талқин этилди.

Тадбир доирасида сўзга чиққан маърузачилар фотокўргазманинг аҳамиятига алоҳида тўхталиб, архив ҳужжатлари орқали тарихий хотирани тиклаш, ёш авлод қалбида ватанпарварлик ва инсонпарварлик туйғуларини мустаҳкамлаш муҳимлигини таъкидладилар.

Жумладан, Марказ директори Қобилжон Собиров ўз нутқида 1966 йилги Тошкент зилзиласи нафақат фожиа, балки халқ дипломатиясининг ёрқин намунаси эканини қайд этиб, турли миллат ва элат вакилларининг ҳамжиҳатлиги халқлар ўртасидаги дўстлик ришталарини янада мустаҳкамлаганини таъкидлади.

Шунингдек, “Ўзархив” агентлиги директори Улуғбек Юсупов архив ҳужжатлари халқ хотирасининг ажралмас қисми эканини таъкидлаб, бундай тадбирлар ёшларни тарихий воқеалар билан яқиндан таништиришда муҳим аҳамият касб этишини қайд этди.

Ғ.О.Мавлонов номидаги Сейсмология институти бош илмий ҳодими Собитжон Мақсудов эса табиий офатлар хавфини камайтириш мақсадида замонавий шаҳарсозлик қоидаларига қатъий риоя қилиш, биноларни сейсмик бардошли стандартлар асосида қуриш зарурлигини таъкидлади. Унинг фикрича, Тошкент зилзиласи сабоқлари бугунги қурилиш амалиёти учун ҳам долзарб аҳамиятга эга.

Тадбир иштирокчилари Тошкентнинг қисқа муддатда қайта тиклангани халқлар бирдамлиги ва фидокорона меҳнат самараси эканини алоҳида эътироф этдилар. Мазкур жараён нафақат шаҳарни қайта қуриш, балки халқлар ўртасидаги дўстлик, ҳамжиҳатлик ва ўзаро ишончни янада мустаҳкамлашга хизмат қилди.

Таъкидланганидек, бу каби архив фотокўргазмалар ёш авлодга тарихдан сабоқ олиш, миллатлараро тотувлик қадрини англаш ҳамда табиий офатларга қарши тайёргарлик маданиятини шакллантиришда муҳим маърифий аҳамиятга эга.