Ўзбекистон Республикаси Адлия вазирлиги ҳузуридаги "Ўзархив" Агентлиги

“Ўзархив” агентлигида коррупцияга қарши курашиш масалалари муҳокама қилинди

Бугун “Ўзархив” агентлигида коррупцияга қарши курашиш мавзусига бағишланган давра суҳбати бўлиб ўтди. Тадбир давлат архивлари тизимида шаффофликни таъминлаш, коррупциявий ҳолатларни олдини олиш ва ички назорат механизмларини янада кучайтириш масалаларига бағишланди. Давра суҳбатида “Ўзархив” агентлиги директори Юсупов Улуғбек Миртолибович ҳамда Адлия вазирлиги тизимидаги коррупцияга қарши курашиш бўлими бошлиғи Шадиев Умид Акбарович асосий маърузалар билан иштирок этдилар.

Тадбирни очиб берган Улуғбек Юсупов ўз сўзида мамлакатимизда коррупцияга қарши кураш давлат сиёсати даражасига кўтарилганини, бу борада Президент Шавкат Мирзиёев томонидан қатъий ва принципиал позиция билдирилаётганини таъкидлади. У Президентнинг Олий Мажлисга ва кўп миллатли халқимизга йўллаган Мурожаатномасидаги коррупцияга қарши курашга оид қуйидаги фикрларни келтирди: “Коррупция – давлат тараққиётига тўсиқ бўладиган, адолат ва қонун устуворлигини издан чиқарадиган, жамиятда ишонч муҳитини заифлаштирадиган энг жиддий таҳдид. Коррупцияга ЙЎл қўйиш эса ислоҳотларимизга хиёнатдир! Бу иллатга қарши курашиш бўйича 2026-йилда ‘фавқулодда ҳолат’ эълон қиламиз”. Шунингдек, барча идораларда комплаенс ва коррупцияга қарши ички назоратга масъул ўринбосар лавозими жорий этилиши, Ҳисоб палатаси вакиллари фаолияти йўлга қўйилиши, бу раҳбарлар тизимдаги нопок шахсларни аниқлаш, бюджет маблағларининг талон-торож қилиниши ва мансаб ваколатларини суиистеъмол қилиш ҳолатларини олдини олишда таъсирчан назорат ўрнатиши қайд этилди. Президентнинг “Лавозимим, унвоним бор, менга ҳеч ким тегмайди, деганлар адашади. Қонун олдида ҳамма тенг” деган қатъий огоҳлантиришини келтирар экан, Улуғбек Юсупов энди коррупцияга йўл қўйган ҳар қандай раҳбар ва ходимга тизимда ўрин йўқлигини алоҳида таъкидлади.

Шунингдек, давра суҳбатида сўзга чиққан Адлия вазирлиги тизимидаги коррупцияга қарши курашиш бўлими бошлиғи Шадиев Умид Акбарович “Ўзархив” агентлиги тизимида сўнгги беш йил давомида аниқланган коррупция аломатлари мавжуд жиноятлар статистикасини таҳлил қилиб берди. У ўз маърузасида коррупциянинг келиб чиқиш сабаблари, хавф омиллари, уларни бартараф этишда профилактиканинг аҳамияти ҳақида тўхталиб ўтди. Шу билан бирга, коррупцияни олдини олиш бўйича амалга оширилиши лозим бўлган чора-тадбирлар, рақамлаштириш жараёнларини тезлаштириш, ички назоратни кучайтириш, хизмат фаолиятида очиқлик ва жавобгарликни таъминлаш, ходимларнинг ҳуқуқий онги ва масъулиятини ошириш муҳим эканини таъкидлади.

Тадбирда Қорақалпоғистон Республикаси, Тошкент шаҳри ва барча вилоятлар архив иши ҳудудий бошқармалари бошлиқлари, вилоят, шаҳар ва туман давлат архивлари, Ўзбекистон Миллий архивлари раҳбар ва ходимлари иштирок этдилар. Давра суҳбати иштирокчилари коррупцияга қарши курашиш фақатгина назорат ёки жазо билан эмас, балки тизимли ёндашув, ҳалоллик тамойилларини ҳаётга татбиқ этиш орқали самарали бўлишини таъкидлаб, бу йўналишдаги ишлар изчил давом эттирилиши лозимлигига урғу бердилар.

Тадбир давомида Рақобатни чекловчи талаблар бўйича ўқув семинари ташкил этилди ва мазкур давра суҳбатда ходимлар савол ва жавоблар қилиниб билим даражалари ўрганилди.