Elektrotexnika sanaatın rawajlandırıw boyınsha usınıslar prezentaciyası

Sońǵı jılları mámleketimizde bul baǵdarda izbe-iz reformalar ámelge asırılıp, zamanagóy quwatlıqlar qurıldı, óndiris hám eksport kólemleri artıp barmaqta. Máselen, usı jıldıń 9 ayında tarmaqta óndiris kólemi 16,3 procentke ósip, 34 trillion sumǵa jetti. Eksport 970 million dollardı quradı.

Sonıń menen birge, tarawda ele iske qosılmaǵan imkaniyatlar kóp. Atap aytqanda, joqarı qosımsha qunlı ónimlerdiń úlesin arttırıw, mıstı tereń qayta islew hám eksporttı diversifikaciyalaw áhmiyetli wazıypa bolıp qalmaqta. Házirgi waqıtta mıs ónimleriniń eksportınıń derlik 60 procenti joqarı qosımsha qunlı tovarlardıń úlesine tuwra kelmekte.

Prezentaciyada elimizde tereń qayta islewdi xoshametlew, bul baǵdarda jergilikli islep shıǵarıwshılardı jáne de qollap-quwatlawǵa qaratılǵan usınıslar kórip shıǵıldı. Sonıń ishinde, mıstı satıp alıwda shegirme usınıw, kredit procentleriniń 5 procentten joqarı bólegin mámleket tárepinen qaplaw, salıq hám bajıxana tólemleri boyınsha jeńillikler beriw rejelestirilgen.

Tarmaqta dástúriy túrdegi ónimlerdi islep shıǵarıw menen birge joqarı texnologiyalıq túrlerin ózlestiriw, sonıń ishinde, elektronika hám yarım ótkizgishler tarawına kirip barıw zárúr ekenligi kórsetip ótildi.

Jańa joybarlar esabınan kelesi jıllarda elimizde mıs islep shıǵarıw kólemi 250 mıń tonnaǵa, 2030-jılǵa barıp bolsa 500 mıń tonnaǵa jetiwi kútilmekte. Juwapkerler bul shiyki zat bazasınan paydalanıp, onıń tiykarında joqarı qosımsha qunlı ónimler islep shıǵarıwǵa qaratılǵan joybarlar haqqında málimleme berdi. Serverler, sanaat elektronikası, kondicionerler, quyash panelleri, qadaǵalaw-ólshew hám avtomat quralları, smart-kartalar islep shıǵarıwdı jolǵa qoyıw solardıń qatarına kiredi. Ulıwma etip aytqanda, bul baǵdarda 2,1 milliard dollarlıq 157 joybar qáliplestirilgen bolıp, olar arqalı 14,5 mıń jańa jumıs ornı jaratıladı.

Prezentaciyada aymaqlardaǵı elektrotexnika texnoparkleriniń jumısı da kórip shıǵıldı.
Házirgi waqıtta milliy ónimlerimizdi xalıqaralıq bazarlarǵa shıǵarıw imkaniyatları keńeymekte. Ózbekstan standartlar institutı Xalıqaralıq elektrotexnika komissiyası bahalaw sxemasına aǵza uyım sıpatında qabıl etildi. Bul elimizde islep shıǵarılǵan ónimler sertifikatlarınıń 53 mámlekette tán alınıwın támiyinleydi.

Texnikalıq jaqtan tártipke salıw agentligi evropalı birge islesiwshiler menen muwapıqlıqtı bahalaw sistemasın jolǵa qoymaqta. Bul arqalı Ózbekstanda islep shıǵarılıp atırǵan ónimlerge Evropa Awqamı talaplarına muwapıqlıqtı tastıyıqlawshı “CE” belgisi beriledi. Bul bolsa Evropaǵa eksport kólemin keminde eki esege arttırıw imkaniyatın jaratadı.

Mámleketimiz basshısı rejelestirilgen ilajlar hám joybarlardıń orınlanıwın jedellestiriw, eksporttıń ósiw pátlerin saqlap qalıp, jańa bazarlarǵa shıǵıw boyınsha anıq tapsırmalar berdi.