Бул ҳаққында 13-декабрьде болып өткен видеоселектор мәжилисинде тапсырма берилген еди. Соған муўапық, дүнья тәжирийбеси ҳәм турмыс талабын инабатқа алған ҳалда, бир қатар усыныслар ислеп шығылды.

Соның ишинде, «Ҳаял-қызлар дәптери» ҳәм «Жаслар дәптери» арқалы социаллық жәрдемлер «Кәмбағал шаңарақлар реестри»не кирген шаңарақларға көрсетилиўи белгиленбекте. Онда қаржыларды район ҳәм қалалардағы халық, майып шахслар ҳәм кәмбағал шаңарақлар санына пропорционал түрде бөлистириў тәртиби енгизилмекте.

Шаңарақтың кәмбағал деп көрсетилиўи оның ағзаларынан қосымша арза ҳәм ҳүжжетлерди талап етпеген ҳалда социаллық жәрдемлер көрсетилиўине тийкар болады.

Соның менен бирге, нәтийжесиз ҳәм талап жоқары болмаған социаллық жәрдемлер оптималластырылып, 28 түрдеги социаллық жәрдемниң бирден-бир дизими тастыйықланады. Социаллық дәптерлер есабынан ажыратылатуғын емлениў ҳәм ҳирургиялық операция әмелияты қәрежетлерин Мәмлекетлик медициналық қамсызландырыў қоры арқалы қаржыландырыў тәртиби енгизиледи.

Район (қала) ҳәкимликлери жанында юридикалық тәреп болмаған «Инфраструктура ҳәм социаллық турақлылық» қорлары шөлкемлестириледи. Оның қаржылары аймақтағы социаллық-экономикалық, шөлкемлестириў-әмелий ҳәм инфраструктуралық машқалаларды сапластырыў, саламат турмыс тәризин кеңнен қолланыў ҳәм спортты раўажландырыў, экология ҳәм қоршаған-орталықты қорғаў илажларына жумсалады.

Мәмлекетимиз басшысы майыплығы болған балаларға айрықша меҳир-итибар көрсетиў қайырлы екенин айтқан еди.

Сол себепли 3-18 жастағы майыплығы болған балалар ушын мәмлекетлик-жеке меншик шериклик тийкарында күндизги бағыў хызметин жолға қойыў усыныс етилмекте. Оған балалар ата-аналар менен дүзилген социаллық шәртнама ҳәм Психологиялық-медициналық-педагогикалық комиссиясының жуўмағы тийкарында қабыл етиледи.

Усы жылдың ақырына шекем бул хызметлер менен 2 мыңға шамалас аўыр майыплығы болған балаларды қамтып алыў режелестирилмекте. Бул олардың аналары ушын жумыс ислеў ҳәм билим алыў сыяқлы имканиятлар жаратып, шаңарақтың абаданлығына хызмет етеди.

«Балалар саламатлығы» мәлимлеме системасы иске қосылып, ҳәр бир перзентке қойылған диагноз талланып барылады. Оларға медициналық, реабилитация, билимлендириў, социаллық хызметлер комплексли түрде көрсетиледи.

Бундай мәселелерге ҳәр бир бала ушын субсидия ҳәм сатып алыўлар ушын жеңилликли кредитлер ажыратылады. Ата-аналардың күндизги қараў хызметинен пайдаланғаны ушын айына 3 миллион сумға шекемги төлемлеринен салық алынбайды.

Презентацияда шаңарақларды кәмбағаллықтан шығарыўға жәрдемлесиў илажлары ҳаққында да мәлимлеме берилди.

Бул процесс «жети имканият ҳәм жуўапкер» принципи тийкарында шөлкемлестирилген. Шаңарақтың социаллық-экономикалық жағдайы, дәраматы ҳәм мүлкти баҳалайтуғын «Кәмбағал шаңарақлар реестри» мәлимлеме системасы иске түсирилген.

Усы тийкарда, 48 мың пуқара жумысқа жайластырылды, 10 мыңнан асламы кәсипке оқытылды, 14 мың пуқараға кредит ҳәм субсидиялар ажыратылды. 140 мың шаңараққа  шыпакерлер бириктирилди, 38 мың пуқараға социаллық хызметлер көрсетилди. 32 мың бала бақшаға жайластырылып, дерлик 7 мың жас кириў имтиханына таярланыў ушын университетлерге бириктирилди.

Мәмлекетимиз басшысы усынысларды мақуллап, кәмбағаллық реестрин шаңарақлардың мийнетке жарамлылығына қарап диффенциялаў, мийнетке жарамлы болмағанларды мәмлекетлик социаллық қорғаўға алыў, оларды социалластырыў бойынша көрсетпелер берди