Медицина мәкемелерин үскенелеў мәселелери көрип шығылды

Халықтың саламатлығын беккемлеў ҳәм емлеўдиң сапасын арттырыў мақсетинде емлеўханалар заманагөй үскенелер менен тәмийинленбекте. Оның ушын бюджеттен ҳәр жылы кеминде 100 миллиард сум  ажыратылмақта. Сондай-ақ, өткен жылдың  өзинде медицинаны жоқары  технологиялық үскенелер менен тәмийинлеў ушын 200 миллион доллар сырт ел инвестициясы, 94 миллион доллар грант  тартылды.

Нәтийжеде  алдын тек республикалық мәкемелерде болған компьютер томографы, магнит резонанслы томограф, антиографлар ҳәзир ўәлаятларда, онлаған районларда да бар. Бул қәнигелескен хызмет халыққа және де жақынласты, дегени.

Быйылғы жылы бул мақсетлерге  мәмлекет есабынан 200 миллиард сум ажыратылған. Сондай-ақ, медицинаға 370 миллион доллар сырт ел инвестициясы киргизилиўи  мөлшерленген.

Презентацияда медицина мәкемелерин үскенелеў бойынша режелер билдирилди.

Атап айтқанда, Азия раўажланыў банкиниң 100 миллион доллар қаржысы есабынан республикадағы 230 туўыў мәкемеси ушын 45 түрдеги 21 мың медициналық үскене ҳәм 6  реанимоюиль сатып алынады.

Германияның KfW  банкиниң 30 миллион евро қаржысы есабынан Қарақалпақстан ҳәм Хорезмдеги 19 дан медицина мәкемеси жүрек –қан  тамыр кеселликлерин емлеўши 862 үскене  менен тәмийинленеди. Және усы банктиң 13,5 миллион евро гранты арқалы Термиз  қаласында оқыў орайы, студентлердиң турақ жайы қурылады. Бул орай заманагөй оқыў-симуляция ҳәм мәлимлеме технологиялары менен үскенеленеди.

Мәмлекетимиз басшысы үскенелеў бул мәселениң тек бир бөлеги екени, оларда  ислей алатуғын маман қәнигелерди ҳәзирден таярлаў керек екенлигин атап өтти. Тийисли мәкемелердеги шыпакер ҳәм мийирбийкелерди қосымша оқытыў ўазыйпасы қойылды.

Үскенелерден нәтийжели пайдаланыў да әҳмийетли. Мәселен, ўәлаятларда ангиографлар жүклемеси орташа 34 процент.  Томограф бойынша жағдай да ҳәр түрли.

Сонлықтан, ҳәкимликлер менен бирге, мәмлекетлик емлеўханалардағы жоқары технологиялық үскенелерден нәтйжели пайдаланыў бойынша аутсорсинг ҳәм жеке меншик шериклик  жойбарлары жолға қойылатуғыны белгиленди.