Medicinada infrastrukturanı rawajlandırıw hám tarawda jeke menshik sektordıń qatnasıwın keńeytiw ilajları kórip shıǵıldı

Medicinalıq mákemelerdi jaylastırıw, qurıw hám úskenelew xalıqtıń talabınan kelip shıqqan halda rejelestiriliwi zárúr. Házir ayırım aymaqlarda xızmetler tarqaq shólkemlestirilgen, emlew orınları nadurıs bólistirilgen, eski imaratlar hám úskenelerden paydalanıw bolsa medicinalıq járdemniń sapasına tásir etpekte.

Jumıstı bar obektler haqqında anıq maǵlıwmatlardı qáliplestiriwden baslaw názerde tutılǵan. On wálayatta ótkerilgen xatlawda tarawǵa tiyisli 3 mıń 499 obekt anıqlanǵan. Bul Kadastr agentligi maǵlıwmatlarındaǵıdan 494 ke kóp. Barlıq aymaqlarda xatlawdı juwmaqlaw, obektlerdiń elektron pasportların qáliplestiriw hám taraw kóshpes múlkiniń birden-bir sanlı reestrin jaratıw usınıs etildi.

Usı maǵlıwmatlar tiykarında 2026-2036-jıllarǵa mólsherlengen medicinalıq infrastruktura master-rejelerin ámelge asırıw máselesi kórip shıǵıldı. Hár bir aymaq boyınsha xalıqtıń sanı hám ósiwi, medicinalıq xızmetlerge mútájlik, mákemelerdiń quwatlılıǵı hám nawqaslardıń olarǵa jetip barıw waqtı esapqa alınadı. Master-reje qaysı obektti saqlap qalıw, birlestiriw yamasa rekonstrukciyalaw, jańasın qay jerde qurıw, onı qalay úskenelew hám qansha qánige zárúrligin belgileydi. Investiciya baǵdarlamaların da usı rejeler tiykarında qáliplestiriw názerde tutılmaqta.

Sistemada mákemeler kórsetetuǵın járdem dárejesine qarap óz-ara baylanısadı. Quramalı hám joqarı texnologiyalıq xızmetler tayanısh oraylarda jámlenedi, rayonlarda bolsa bazalıq hám qıstawlı medicinalıq járdem saqlanadı. Birlemshi buwındı rejelestiriwde awıllıq hám alıs elatlı punktler jáne qalalar ushın óz aldına xızmet kórsetiw normaları qollanıladı.

Bunday qatnas jasaw zárúrligi Samarqand wálayatı mısalında kórsetip berildi. Wálayat xalqınıń 80 procenti rayonlarda jasaydı, biraq rayonlardıń úlesine emlew orınlarınıń 41,7 procenti tuwra keledi. Bas rejede medicinalıq aymaqlardı qayta shólkemlestiriw arqalı rayonlardıń úlesin 67 procentke jetkeriw, xızmetlerdi xalıqqa jaqınlastırıw názerde tutılǵan.

Samarqand qalası, Urgut, Pastdarǵom, Kattaqorǵan, Ishtixan hám Payarıqta jańa emlewxanalardı qurıw jáne barların rekonstrukciyalaw rejeleri haqqında málimleme berildi. Wálayat orayındaǵı qánigelesken mákemelerdi kóp tarmaqlı emlewxanalar negizinde qayta shólkemlestiriw, oraylıq laboratoriyalar, sterilizaciya hám diagnostika xızmetlerin rawajlandırıw usınıs etildi. Urgut, Kattaqorǵan hám Pastdarǵomda 2030-jılǵa shekem jámi 1 mıń 500 jańa emlew ornınıń jaratılıwı názerde tutılmaqta.

Jańa obektler tek ǵana imarat qurıw menen sheklenbeytuǵını atap ótildi. Poliklinika hám emlewxanalardı joybarlastırıwda nawqaslardıń háreketin qolaylı shólkemlestiriw, infekciyalıq qadaǵalaw, inklyuziv ortalıq hám xanalardı úskenelew boyınsha birden-bir talaplardı engiziw usınıs etildi. Emlewde bolsa xalıqaralıq usınıslarǵa tiykarlanǵan klinikalıq protokollardı milliy sharayatqa beyimlestiriw, ámeliyatqa engiziw hám nátiyjelerin turaqlı bahalaw názerde tutılmaqta.

Densawlıqtı saqlaw sistemasında jeke menshik sektordıń qatnasın keńeytiwge baylanıslı qarar joybarı da kórip shıǵıldı. Onda medicinalıq hám járdemshi xızmetlerdi, sonıń ishinde, gemodializ, laboratoriyalıq diagnostika, diagnoz qoyıw hám úskenelerge texnikalıq xızmet kórsetiwdi autsorsing tiykarında satıp alıw usınıs etilgen. Bir jıllıq shártnamalardıń ornına bes jılǵa shekemgi birge islesiw mexanizmlerin qollanıw jeke menshik sheriklerge úskeneler hám xızmetlerge uzaq múddetli investiciya kirgiziw imkaniyatın beredi.

Onda mámleketlik medicina mákemesi xızmetti satıp aladı, jeke menshik shólkem bolsa zárúr úskeneni óz esabınan alıp kelip, onıń islewin hám jańalanıwın támiyinleydi. Satıp alıwlardı shólkemlestiriw ushın birden-bir tender hújjetleri hám elektron sistema engiziw, ayırım mákemelerdi professional kompaniyalarǵa basqarıwǵa beriw imkaniyatları kórip shıǵıldı.

Mámleketimiz basshısı usınıs etilgen usınıslardı puqta islep shıǵıp, basqıshpa-basqısh ámeliyatqa engiziw boyınsha juwapkerlerge tiyisli kórsetpeler berdi.