Ózbekstan – Ázerbayjan: tariyxıy hújjet – máńgi doslıq hám awqamlaslıqtıń bekkem tiykarı

“Tashkent-Xumo” xalıqaralıq aeroportında joqarı mártebeli miymanlardı mámleketimiz basshısı hám ómirlik joldası kútip aldı.
Eki mámlekettiń mámleketlik bayraqları kóterilip, húrmetli qarawıl sap tarttı.

Oraylıq Aziya hám Qubla Kavkaz regionlarınıń geosiyasiy hám geoekonomikalıq sistemasında Tashkent hám Baku arasındaǵı strategiyalıq sheriklik qáwipsizlik, turaqlılıq hám basqıshpa-basqısh rawajlanıwdıń bekkem tiykarı bolıp xızmet etpekte. Joqarı dárejedegi turaqlı, isenimli hám qızǵın sóylesiwler sebepli eki mámlekettiń xalıqaralıq maydandaǵı abırayı, globallıq hám regionallıq strukturalar sheńberinde alǵa qoyıp atırǵan baslamaları birin-bir tolıqtırıp, joqarı pátke iye bolmaqta.

Joqarı mártebeli miyman dáslep ómirlik joldası menen birgelikte Jańa Ózbekstan baǵına barıp, Ǵárezsizlik monumentine gúl qoydı.

Ǵárezsizlik monumentinde elimizdiń kóp ásirlik tariyxı, azatlıq hám dóretiwshilik ruwxı, ilim-aǵartıwshılıq hám rawajlanıw jolında xızmet etken ullı ata-babalarımızdıń tulǵası sáwlelendirilgen.

Ullı babalarımızdıń iygilikli isleri, adamzat civilizaciyasına qosqan úlesi hám bay ruwxıy miyrası búgin tek ǵana xalqımız emes, al dúnya jámiyetshiligi tárepinen joqarı qádirlenbekte.

Ázerbayjan Respublikası Prezidenti Ilham Aliev Ǵárezsizlik monumentine gúl qoyar eken, Watannıń azatlıǵı, el abadanlıǵınıń ayqın kórinisi sıpatında maqtanıshlı boy tiklegen kompleks aldında simvolikalıq túrde bas iydi.

Joqarı mártebeli miyman elimiz tariyxında óshpes iz qaldırǵan ullı ata-babalarımızdıń ilimiy-aǵartıwshılıq miyrası, dúnya civilizaciyasınıń rawajlanıwına qosqan sheksiz úlesin atap ótip, húrmet kórsetti.

Ázerbayjan Prezidenti Ilham Aliev ómirlik joldası menen birgelikte Tashkent qalasındaǵı Geydar Aliev estelik kompleksine bardı.
Bul kórkem orın Prezidentimiz Shavkat Mirziyoevtiń baslaması menen 2022-jılı Ázerbayjan xalqınıń ulıwma milliy jetekshisi, ózbek xalqınıń jaqın dostı Geydar Alievtiń húrmetine baǵıshlap qurılǵan.

Joqarı mártebeli miyman estelikke gúl qoyıp, belgili siyasiy hám mámleketlik ǵayratker, ǵárezsiz Ázerbayjannıń tiykarın salıwshı Geydar Alievtiń esteligine húrmet kórsetti.

Bunnan soń Kóksaray rezidenciyasında Ázerbayjan Respublikası Prezidenti Ilham Alievti saltanatlı kútip alıw máresimi boldı.
Eki mámlekettiń bayraqları menen bezelgen maydanda Ázerbayjan Prezidentiniń húrmetine húrmetli qarawıl sap tarttı.

Ózbekstan Respublikası Prezidenti Shavkat Mirziyoev joqarı mártebeli miymandı shın júrekten kútip alıp, minberge mirát etti. Ózbekstan hám Ázerbayjannıń mámleketlik gimnleri jańladı.

Jetekshiler húrmetli qarawıl qatarı aldınan ótip, rásmiy delegaciyalar aǵzaların qutlıqladı.

Kóksaray rezidenciyasında Ózbekstan Respublikası Prezidenti Shavkat Mirziyoev hám Ázerbayjan Respublikası Prezidenti Ilham Aliev tar sheńberde ushırasıw jáne Joqarı mámleketleraralıq keńestiń úshinshi májilisin ótkerdi.

Sóylesiwlerde Ózbekstan – Ázerbayjan strategiyalıq sheriklik hám awqamlaslıq qatnasıqların bunnan bılay da rawajlandırıw máseleleri kórip shıǵıldı.

Mámleketimiz basshısı Ázerbayjan Respublikası Prezidentiniń bul retki mámleketlik saparı tariyxıy waqıya ekenin ayrıqsha atap ótti.

– Sammit juwmaǵında Máńgi doslıq haqqındaǵı shártnamaǵa qol qoyılıwı bunıń tastıyıǵı boladı. Eń áhmiyetlisi, strategiyalıq sheriklik hám awqamlaslıǵımızdıń hár bir bánti anıq nátiyjeler hám ámeliy háreketlerde óz kórinisin tabadı, – dedi Shavkat Mirziyoev.

Jetekshiler eki tárepleme baylanıslar jedel rawajlanıp atırǵanın atap ótti. Parlamentler, húkimetler hám tarmaqlar arasında turaqlı sóylesiw jolǵa qoyılǵan.

Saparǵa tayarlıq sheńberinde Húkimetleraralıq komissiya, Isbilermenler keńesiniń májilisleri hám Aymaqlar forumı tabıslı ótkerildi.

Sońǵı bes jılda óz-ara tovar almasıw kólemi 3 esege arttı. Energetika, ximiya, kánshilik, toqımashılıq, awıl xojalıǵı, qala qurılısı hám basqa da baǵdarlarda kooperaciya joybarları ámelge asırılmaqta.

Tovar almasıw kólemin 1 milliard dollarǵa jetkeriw imkaniyatları bar ekenligi atap ótildi. Anıq ilajlardı óz ishine alǵan baǵdarlamanıń qabıl etilip atırǵanı bul áhmiyetli shekke erisiw ushın bekkem tiykar jaratadı.

Májilis sheńberinde jańa kooperaciya joybarların ámelge asırıwǵa start beriledi. Bunday baslamalardı qollap-quwatlaw maqsetinde Birgeliktegi investiciyalıq kompaniyanıń qarjıların jedel tartıw áhmiyetli ekenligi atap ótildi.

Eki mámleket arasındaǵı óz-ara baylanıslılıqtı kúsheytiw, Orta koridordı birgelikte rawajlandırıw zárúr ekenligi kórsetip ótildi.
Jetekshiler mádeniyat, bilimlendiriw, jaslar siyasatı hám sport tarawlarındaǵı jedel almasıwlardı dawam ettiriwge kelisip aldı.
Eki xalıqtı jáne de jaqınlastırıw maqsetinde “Nizamiy Ganjawiy hám Áliysher Nawayı arasındaǵı ádebiy kópir” temasında birgeliktegi kinofilm jaratıw usınıs etildi.

Usı jıldıń gúzinde Ázerbayjanda jetekshi joqarı bilimlendiriw mákemeleri rektorlarınıń ekinshi forumı bolıp ótedi.

2027-jılı mámleketlerimizde áhmiyetli sport ilajı – futbol boyınsha jaslar arasındaǵı jáhán chempionatı bolıp ótedi. Bul baǵdarda birgeliktegi sport, mádeniyat hám jaslarǵa baylanıslı ilajlardı ótkeriwdi názerde tutatuǵın keń kólemli “Eki mámleket – bir chempionat” baǵdarlaması islep shıǵıladı.

Mámleket basshıları xalıqaralıq hám regionallıq kún tártibindegi áhmiyetli máseleler boyınsha da pikir alıstı.

Májiliste Húkimetleraralıq komissiya járdemshi baslıqlarınıń málimlemeleri tıńlandı.

Erisilgen kelisimlerdi óz waqtında hám sapalı ámelge asırıwǵa qaratılǵan “jol kartası”n qabıl etiwge qarar etildi.
Ózbekstan Respublikası Prezidenti Shavkat Mirziyoev hám Ázerbayjan Respublikası Prezidenti Ilham Aliev birgeliktegi joybarlarǵa start beriw máresiminde qatnastı.

Sońǵı jıllarda eki mámleket arasındaǵı strategiyalıq sheriklik hám awqamlaslıq qatnasıqları izbe-iz bekkemlenip, sawda-ekonomikalıq hám investiciyalıq birge islesiw jańa basqıshqa kóterildi.

Máresim sheńberinde bank tarawındaǵı birge islesiw, zamanagóy qurılıs materialların islep shıǵarıw, bilimlendiriw mákemelerin shólkemlestiriw, avtomobillerge janılǵı quyıw infrastrukturasın qurıw, iri turistlik hám turaq jay komplekslerin qurıw, mineral shiyki zattı qayta islew hám baǵshılıqtı rawajlandırıwdı názerde tutatuǵın birgeliktegi joybarlarǵa start berildi.

Ilaj qatnasıwshıları aymaqlardaǵı joybarlaw maydanlarınan onlayn baylanısqa shıǵıp, ámelge asırılıp atırǵan jumıslar haqqında málimleme berdi.

Jańa birgeliktegi joybarlar eki mámleket isbilermen toparları arasındaǵı kooperaciyanı jáne de keńeytiw, óz-ara investiciyalar kólemin arttırıw, jańa jumıs orınların jaratıw hám ekonomikalıq birge islesiwdi anıq ámeliy mazmun menen bayıtıwǵa xızmet etetuǵını atap ótildi.

Kóksaray rezidenciyasında Ózbekstan hám Ázerbayjan Prezidentlerin eki mámlekettiń joqarı mámleketlik sıylıqları menen sıylıqlaw máresimi bolıp ótti.

Ázerbayjan Respublikası Prezidenti Ilham Alievqa Ózbekstan Respublikasınıń joqarı mámleketlik sıylıǵı – “Oliy Darajali Dwstlik” ordeni tapsırıldı.

Mámleketimiz basshısı abıraylı sıylıqtı tapsırıp, bul qarar Ázerbayjan Prezidentiniń tuwısqan mámleketlerimiz arasındaǵı doslıq, strategiyalıq sheriklik hám awqamlaslıq qatnasıqların bekkemlewdegi xızmetlerine Ózbekstan xalqınıń qızǵın húrmeti hám tán alıwınıń kórinisi ekenin atap ótti.

– Siz ullı atańız – belgili mámleketlik ǵayratker Geydar Alievtiń isin múnásip dawam ettirip atırsız. Siziń basshılıǵıńızdaǵı aqılǵa uǵras reformalar sebepli Ázerbayjan rawajlanıw baǵdarında hám xalıqaralıq maydanda úlken jetiskenliklerge erispekte, – dedi Shavkat Mirziyoev.

Ilham Alievtiń Ózbekstan – Ázerbayjan kóp qırlı qatnasıqların keńeytiwge qosıp atırǵan úlesi de ayrıqsha qanaatlanıwshılıq penen atap ótildi. Eki mámleket arasında awqamlaslıq qatnasıqlarınıń qáliplesiwinde áyne onıń ornı sheksiz.

Óz gezeginde, Ázerbayjan Prezidenti joqarı itibar ushın mámleketimiz jetekshisi hám xalqına minnetdarshılıq bildirip, doslıq hám óz-ara húrmet ruwxındaǵı hár tárepleme birge islesiw bunnan bılay da bekkemlenetuǵınına isenim bildirdi.

Bunnan soń Ózbekstan Respublikası Prezidenti Shavkat Mirziyoev Ázerbayjannıń joqarı mámleketlik sıylıǵı – “Haydar Aliev” ordeni menen sıylıqlandı.

Sıylıqtı mámleketimiz basshısına Ázerbayjan Respublikası Prezidenti Ilham Aliev tapsırdı.

Ózbekstan jetekshisi Ázerbayjan Prezidenti hám tuwısqan Ázerbayjan xalqına tereń minnetdarshılıq bildirip, bul sıylıqtı máńgi doslıq, strategiyalıq sheriklik hám awqamlaslıq qatnasıqların bekkemlew jolındaǵı birgeliktegi háreketlerge berilgen joqarı baha sıpatında qabıl etetuǵının atap ótti.

– Bul orden men ushın ayrıqsha áhmiyetke iye. Oǵan pútkil ómirin Watanına xızmet etiwge baǵıshlaǵan ullı mámleketlik ǵayratker Geydar Álievich Alievtiń atı berilgen. Áyne usı insan Ázerbayjannıń keleshektegi rawajlanıwı ushın bekkem tiykar jarattı, – dedi Shavkat Mirziyoev.

Geydar Aliev Ózbekstan tariyxı hám mádeniyatın joqarı qádirleytuǵını, eki xalıqtıń jaqınlasıwına salmaqlı úles qosqanı atap ótildi.
Ózbekstan hám Ázerbayjan keleshekte de barlıq tarawlarda birge islesiwdi keńeytip, tuwısqanlıq qatnasıqları bolsa jańa ámeliy mazmun menen bayıp baratuǵınına isenim bildirildi.

“Haydar Aliev” ordenine túrli jıllarda Franciya Prezidenti Jak Shirak, Kuveyt Ámiri Saboh as-Saboh, Túrkiya Prezidenti Rejep Tayyip Erdoǵan, Italiya Prezidenti Serjo Mattarella hám basqa da kóplegen mámleketlik ǵayratkerler sıylıqlanǵanın atap ótiw kerek.

Joqarı dárejedegi sóylesiwlerdiń juwmaǵında eki tárepleme hújjetlerge qol qoyıw máresimi bolıp ótti.

Ózbekstan Respublikası Prezidenti Shavkat Mirziyoev hám Ázerbayjan Respublikası Prezidenti Ilham Aliev Máńgi doslıq haqqındaǵı shártnamaǵa hám Joqarı mámleketleraralıq keńestiń úshinshi májilisiniń qararına qol qoydı.

Mámleket basshıları janında tómendegi hújjetlerge qol qoyıldı:

– Pensiya támiynatı tarawındaǵı birge islesiw haqqında kelisim;
– Mádeniyat tarawındaǵı birge islesiw haqqında kelisim;
– Turizm tarawındaǵı birge islesiw haqqında kelisim;
– 2030-jılǵa shekem tovar almasıw kólemin 1 milliard dollarǵa jetkeriw boyınsha baǵdarlama;
– Investiciyalar hám sawda tarawında erisilgen kelisimlerdi ámelge asırıw boyınsha ámeliy háreketler rejesi;
– Sırtqı isler ministrlikleri arasında 2027-2028-jıllarǵa mólsherlengen birge islesiw baǵdarlaması;
– Ádillik ministrlikleri arasında 2027-2028-jıllarǵa mólsherlengen birge islesiw baǵdarlaması;
– Kinologiya tarawında tájiriybe almasıw hám birge islesiw haqqında memorandum;
– Úrgensh hám Xankendi, Buxara hám Lochin, Úrgensh hám Naxchivon qalaları arasında doslıq qatnasıqların ornatıw haqqındaǵı bildiriwler.

Ǵalaba xabar qurallarınıń wákilleri menen ushırasıwda Ózbekstan Respublikası Prezidenti Shavkat Mirziyoev hám Ázerbayjan Respublikası Prezidenti Ilham Aliev bolıp ótken sóylesiwlerdiń juwmaqları boyınsha pikir bildirdi.

Mámleketimiz basshısı Ázerbayjan Prezidentiniń Ózbekstanǵa mámleketlik saparı sózsiz tariyxıy áhmiyetke iye ekenin tereń qanaatlanıwshılıq penen atap ótti.

Shavkat Mirziyoev Máńgi doslıq haqqındaǵı shártnamaǵa qol qoyılıwı búgingi sammittiń eń áhmiyetli nátiyjesi bolǵanın atap ótti. Ózbekstan jetekshisiniń atap ótkenindey, bul hújjet birge islesiwdi tereńlestiriw, bul baǵdardaǵı imkaniyatlardı keńeytiw hám ulıwma keleshekti qurıwǵa bolǵan birgeliktegi umtılıwdıń kórinisi bolıp esaplanadı.

Sapar etiw sheńberinde awqamlaslıq qatnasıqlardı tereńlestiriw boyınsha jańa baslamalardı islep shıǵıw hám ámelge asırıwdıń nátiyjeli mexanizmine aylanǵan Joqarı mámleketleraralıq keńestiń úshinshi májilisi de bolıp ótti.

Mámleketimiz basshısı Ázerbayjan ekonomikası turaqlı rawajlanıp, xalıqaralıq maydandaǵı abırayı barǵan sayın artıp atırǵanın atap ótti. Ilham Alievtı Ázerbayjannıń aymaqlıq pútinligi tiklengeni hám ázeliy jerleri qaytarılǵanı menen jáne bir márte qutlıqladı.
Sociallıq infrastrukturası jedel qurılıp, aymaǵında jańa jumıs orınları jaratılıp atırǵan Qarabaǵtı qayta tiklew máselesine ayrıqsha itibar qaratıldı.

– Ázerbayjan – isenimli awqamlasımız, strategiyalıq sherigimiz hám bizge tuwısqan mámleket. Qatnasıqlarımız tiykarında birden-bir civilizaciyalıq kod – uqsas tariyxıy tamırlar, kóp ásirlik doslıq, uqsas mádeniyat hám dástúrler jámlengen, – dedi Ózbekstan jetekshisi.

Sammitke ayrıqsha tayarlıq jumıslarınıń alıp barılǵanı atap ótildi. Húkimetleraralıq komissiya hám Isbilermenler keńesiniń májilisleri, Aymaqlar forumı nátiyjeli ótkerildi.

Sóylesiwler dawamında Prezidentler kóp qırlı qatnasıqlardıń barlıq táreplerin hár tárepleme dodalap, Húkimetleraralıq komissiya járdemshi baslıqlarınıń tiykarǵı baǵdarlar boyınsha málimlemelerin tıńladı.

Bular, bárinen burın, sawda, sanaat kooperaciyası, energetika, transport, mádeniyat hám basqa da tarawlar bolıp tabıladı.
Tárepler siyasiy sóylesiwdi bunnan bılay da bekkemlew, parlamentler hám húkimetler, tarmaq uyımları jáne aymaqlar arasındaǵı jedel baylanıslardı qollap-quwatlawǵa kelisip aldı.

Tiykarǵı itibar ekonomikalıq máselelerge qaratıldı. Tovar almasıwdıń kólemin 1 milliard dollarǵa jetkeriw imkaniyatları kórip shıǵıldı. Bul áhmiyetli shekke erisiw boyınsha anıq ilajlardı óz ishine alǵan tiyisli baǵdarlama qabıl etildi.

Sanaat kooperaciyasında jańa ósiw noqatları belgilendi.

Bul sapar etiwge tayarlıq sheńberinde energetika, geologiya, ximiya, qurılıs, qarjı, awıl xojalıǵı hám basqa da tarmaqlardaǵı kooperaciyalıq joybarlardıń salmaqlı toplamı qáliplestirildi.

Bul joybarlardı alǵa qoyıwda bir neshe jıl burın shólkemlestirilgen Investiciya qorı áhmiyetli orın iyelemekte.

Aymaqlardıń imkaniyatların tolıq jumsaw boyınsha kelisimge erisildi. Usı maqsette usı ayda Tashkent qalası, Buxara hám Namangan wálayatlarınıń hákimleri Ázerbayjanda boldı.

Birge islesiwdiń jáne bir áhmiyetli baǵdarı – transport-tranzit tarawı, atap aytqanda, Transkaspiy koridorın birgelikte rawajlandırıw, logistikalıq infrastrukturanıń nátiyjeliligin arttırıw hám júk tasıwlardı xoshametlew.

Eki xalıq arasındaǵı tıǵız mádeniy-gumanitarlıq baylanıslar isenimli doslıq kópiri wazıypasın atqarmaqta.
Jıldıń aqırına shekem Ózbekstanda Ázerbayjan mádeniyatı kúnleri hám Ázerbayjanda joqarı bilimlendiriw mákemeleri rektorlarınıń ekinshi forumı ótkeriledi.

FIFA qararına bola, kelesi jılı Ózbekstan hám Ázerbayjan futbol boyınsha jaslar arasındaǵı jáhán chempionatına birgelikte basshılıq etiwi atap ótildi.

Bul iri sport ilajı sheńberinde keń kólemli “Eki mámleket – bir chempionat” baǵdarlamasın ámelge asırıwǵa kelisip alındı.
Mámleketimiz basshısı sóziniń juwmaǵında ázerbayjanlı kásiplesine usınıs hám baslamalardı qollap-quwatlaǵanı ushın minnetdarshılıq bildirdi. Bul tariyxıy sapar etiw juwmaqları birge islesiwdi anıq ámeliy mazmun menen bayıtıp, birgeliktegi joybarlar hám eki tuwısqan mámlekettiń turaqlı rawajlanıwı ushın jańa gorizontlar ashıwına isenim bildirdi.

Bunnan soń Ózbekstan Respublikası Prezidenti Shavkat Mirziyoev hám Ázerbayjan Respublikası Prezidenti Ilham Aliev Jańa Tashkent qalasın qurıw direkciyasına bardı.

Bul jerde Ázerbayjan jetekshisine Jańa Tashkenttiń bas rejesi, qurılıs jumıslarınıń barısı, qalanıń transportlıq hám injenerlik infrastrukturası jáne keleshektegi rawajlanıw rejeleri haqqında prezentaciya ótkerildi.

Jańa Tashkent 20 mıń gektar maydanda qurılıp, keleshekte 2 million adamnıń jasawı ushın mólsherlengen. 2034-jılǵa shekem bul jerde 200 mıń kvartiranıń qurılıwı rejelestirilgen.

Joybardıń 6 mıń gektardı qamtıp alǵan birinshi basqıshında zamanagóy turaq jaylar, sociallıq hám biznes obektleri, bilimlendiriw hám mádeniyat orayları qurılmaqta. Atap aytqanda, “Jańa Ózbekstan” universiteti, Nizamiy atındaǵı Ózbekstan Milliy pedagogikalıq universiteti hám basqa da joqarı bilimlendiriw mákemeleriniń kampusları qurılmaqta.

Qalanı qurıwda zamanagóy urbanizaciya, “jasıl qala” hám energiya nátiyjeliligi principlerine tiykarǵı áhmiyet qaratılǵan. Injenerlik kommunikaciyaların jer astında jaylastırıw, energiya únemlewshi texnologiyalardan paydalanıw, keń jasıl aymaqlar hám jámiyetlik orınlardı shólkemlestiriw názerde tutılǵan.

Transport infrastrukturası da jańa qalanıń áhmiyetli quram bólegi boladı. Jańa kópirler, metro liniyası, piyadalar hám velosiped jolları Jańa Tashkentti paytaxttıń bar aymaqları menen úzliksiz baylanıstıradı.

Sonday-aq, qalada mámleketlik uyımlar, ilimiy hám mádeniy oraylar, miymanxanalar, servis hám biznes kompleksleri qurıladı. Joybarǵa jergilikli hám sırt el investorları keńnen tartılmaqta.

Prezident Ilham Alievke Jańa Tashkenttiń maketi hám rejelestirilip atırǵan iri obektler haqqında maǵlıwmat berildi.
Ózbekstan Respublikası Prezidenti Shavkat Mirziyoev hám Ázerbayjan Respublikası Prezidenti Ilham Aliev Jańa Tashkentte Nizamiy atındaǵı Ózbekstan Milliy pedagogikalıq universitetiniń jańa kampusınıń saltanatlı ashılıw máresiminde qatnastı.
Mámleket basshıları Nizamiy Ganjawiy esteligi janında terek ekti.

Prezidentlerge universitet kompleksiniń qurılıs processleri, bilimlendiriw infrastrukturası hám kampustı rawajlandırıw rejeleri haqqında maǵlıwmat berildi.

40 gektar maydanda qurılıp atırǵan kampus qurılısı eki basqıshta ámelge asırılmaqta. Bul jerde jámi 20 mıń studentke mólsherlengen oqıw imaratları jáne 5 mıń orınlıq studentler turaq jayların shólkemlestiriw názerde tutılǵan.

Birinshi basqısh sheńberinde 12 mıń orınǵa iye bes qabatlı oqıw imaratı hám zamanagóy laboratoriya kompleksi qurıldı.
Mámleket basshıları kampusta jaratılǵan oqıw hám ilimiy ortalıq, málimleme-resurs orayı jáne Nizamiy Ganjawiy miyrasına baǵıshlanǵan muzey ekspoziciyası menen tanıstı.

Muzeyde ullı ázerbayjan shayırı hám oyshılı Nizamiy Ganjawiydiń ómiri hám dóretiwshiligi, onıń bay ruwxıy miyrası, sonday-aq, Ózbekstan hám Ázerbayjan xalıqları arasındaǵı kóp ásirlik mádeniy hám ádebiy baylanıslar sáwlelendirilgen.

Jetekshiler bilimlendiriw, ilim hám mádeniyat tarawlarındaǵı baylanıslar eki tuwısqan xalıqtı jáne de jaqınlastırıw, jas áwladtı ulıwma ruwxıy qádiriyatlar ruwxında tárbiyalawda úlken áhmiyetke iye ekenin atap ótti.

Ózbekstan Respublikası Prezidenti Shavkat Mirziyoev hám Ázerbayjan Respublikası Prezidenti Ilham Aliev Jańa Tashkentte “Ázerbayjan” baǵın qurıw jumısların baslap berdi.

Baǵ ushın Jańa Tashkentte 4 gektar maydan ajıratılǵan. Bul jerde Ázerbayjannıń bay mádeniyatı, kóp ásirlik tariyxı hám milliy dástúrlerin sáwlelendiretuǵın zamanagóy jámietlik mákan shólkemlestiriledi. Ol eki tuwısqan xalıqtıń mádeniy jaqınlıǵı hám doslıǵın kórsetedi.

Baǵ ushın Jańa Tashkentte 4 gektar maydan ajıratılǵan. Bul jerde Ázerbayjannıń bay mádeniyatı, kóp ásirlik tariyxı hám milliy dástúrlerin sáwlelendiretuǵın zamanagóy jámietlik mákan shólkemlestiriledi. Ol eki tuwısqan xalıqtıń mádeniy jaqınlıǵı hám doslıǵın kórsetetuǵın orınǵa aylanadı.

Bunday iygilikli baslama eki tárepleme xarakterge iye ekenin atap ótiw kerek. Prezident Shavkat Mirziyoevtiń Ázerbayjanǵa mámleketlik saparı sheńberinde Baku qalasınıń “Oq shahar” aymaǵında “Ózbekstan” parkine saltanatlı túrde tırnaq tası qoyılǵan edi.

4,5 gektar maydanda shólkemlestiriletuǵın bul komplekste Ózbekstannıń bay mádeniyatı hám dástúrleri, milliy arxitektura mektebi ózine tán tárizde kórsetiledi. Onda mámleketimizdiń tariyxıy estelikleriniń arxitekturalıq simvolları, jasıl aymaqlar hám seyil etiw orınların qurıw názerde tutılǵan.

Usı tárizde Tashkenttegi “Ázerbayjan” hám Bakudegi “Ózbekstan” parkleri eki xalıqtıń kóp ásirlik doslıǵı, óz-ara húrmeti hám ruwxıy jaqınlıǵınıń jáne bir ayqın belgisi boladı.

Mámleket basshıları bolajaq baǵ aymaǵında simvolikalıq kapsulanı jaylastırıp, joybardı ámelge asırıwǵa start berdi.