Energetika tarmaǵındaǵı áhmiyetli wazıypalardıń orınlanıwı kórip shıǵıldı

Usı jıldıń 27-iyul kúni mámleketimiz basshısınıń basshılıǵında janılǵı-energetika tarmaǵındaǵı tiykarǵı máseleler boyınsha videoselektor májilisi ótkerilgen edi. Onda tarawdaǵı basqarıw, orınlarda elektr hám gaz támiynatınıń turaqlılıǵı, avariyalar jáne energiya shıǵınların qısqartıw baǵdarındaǵı jumıslar sın kózqarastan tallandı.

Atap aytqanda, elektr hám gaz támiynatı menen baylanıslı jumıslardı “rayon kesiminde” hám “máhálle kesiminde” shólkemlestiriw, aymaqlardıń energiya tutınıw balansın qáliplestiriw, tarmaqlar hám úskenelerdi xatlawdan ótkeriw, gúzgi-qısqı máwsimge puqta tayarlıq kóriw, sanlı texnologiyalar hám jasalma intellektti keńnen engiziw boyınsha wazıypalar belgilengen edi.
Prezentaciyada Energetika ministrligi, “Aymaqlıq elektr tarmaqları” akcionerlik jámiyeti hám Ózenergoinspekciya jańa basshılıǵınıń usı tapsırmalardıń orınlanıwın shólkemlestiriw baǵdarında alıp barıp atırǵan jumısları hám keleshektegi rejeleri kórip shıǵıldı.

Sonıń ishinde, házirgi waqıtta Yangiywl rayonında elektr hám gaz támiynatın jaqsılaw boyınsha arnawlı shtab jumıs islemekte. Ol jerde isbilermenler hám xalıq penen ashıq sóylesiwler ótkerilip, úzilisler, quwatlılıq jetispewshiligi, gaz basımınıń tómenlewi, texnikalıq shártler alıw hám qarızdarlıq penen baylanıslı múrájatlar tikkeley úyrenilmekte.

Yangiywl rayonı tájiriybesi tiykarında basqa 13 rayonda da usı kózqarastaǵı úlgi sistemanı jaratıp, keyin ala onı basqa aymaqlarda da engiziw rejelestirilgen.

Isbilermenlik subektlerin elektr hám gaz tarmaqlarına jalǵaw ushın texnikalıq shártlerdi rásmiylestiriw processleriniń nızamlılıǵı hám ashıq-aydınlıǵın támiyinlew, korrupciyalıq jaǵdaylardıń aldın alıw ilajları kúsheytilmekte.

Gúzgi-qısqı máwsimge tayarlıq sheńberinde mashqalalı tarmaqlar hám úskenelerdi jańalaw, energiya shıǵınların azaytıw, energiya nátiyjeliligi ilajların kóriw, avariyalıq úzilislerdiń sebeplerin saplastırıw jumısları alıp barılmaqta. Sonday-aq, taraw xızmetkerlerine wazıypalardı elektron sistema arqalı jetkeriw, orınlanıwın qadaǵalaw hám jumıs nátiyjeliligin anıq kórsetkishler tiykarında bahalaw mexanizmleri islep shıǵılmaqta.

Energetika ministrligine tarmaqta birden-bir hám nátiyjeli basqarıw sistemasın qáliplestiriw, taraw kárxanalarınıń jumısın muwapıqlastırıw, investiciyalıq joybarlardı óz waqtında ámelge asırıw hám gúzgi-qısqı máwsimge tayarlıq jumısların sistemalı shólkemlestiriw wazıypaları júklendi.

“Aymaqlıq elektr tarmaqları”na orınlarda elektr támiynatınıń turaqlılıǵın arttırıw, infrastrukturanı basqıshpa-basqısh modernizaciyalaw, avariyalıq úzilislerdi azaytıw hám xızmet kórsetiw sapasın jaqsılaw tapsırıldı.

Ózenergoinspekciyaǵa energiya resurslarınan aqılǵa uǵras paydalanıw ústinen qadaǵalawdı kúsheytiw, texnikalıq talaplarǵa ámel etiliwin támiyinlew, shıǵınlardı qısqartıw hám iri tutınıwshılardı energiya auditinen ótkeriwdi jedellestiriw wazıypaları qoyıldı.
Tábiyiy gaz jetkerip beriw imkaniyatı sheklengen máhállelerdi máwsimge tayarlaw, suyıltırılǵan gaz támiynatına jeke menshik sektordı keńnen tartıw, tarawdaǵı processlerdi monitoring etiwde jasalma intellekt imkaniyatlarınan paydalanıw máselelerine de ayrıqsha itibar qaratıldı.

Mámleketimiz basshısı barlıq ilajlardı mánzilli hám anıq esap-sanaqlar tiykarında ámelge asırıw, xalıq hám ekonomika tarmaqların elektr hám gaz benen turaqlı támiyinlew boyınsha juwapkerlerge tapsırmalar berdi.