Mámleketlik xızmetkerlerdiń miynetine haqı tólew sistemasın jetilistiriw boyınsha usınıslar kórip shıǵıldı

Sońǵı jılları mámleketlik xızmette kadrlardı tańlaw, jumısqa jaylastırıw hám xoshametlew sistemasın jetilistiriw boyınsha keń kólemli reformalar ámelge asırıldı.

Mámleketlik puqaralıq xızmetkerleriniń huqıqların, minnetlemelerin hám jumısınıń tiykarǵı principlerin belgilep bergen ayrıqsha nızam qabıl etildi. Mámleketlik uyımlarda basqarıw xızmetkerleriniń shtat birlikleri 2016-jıldaǵı 73 mıńnan 54 mıńǵa optimallastırıldı.

Prezentaciyada ámeldegi miynetke haqı tólew sistemasında saqlanıp qalıp atırǵan teńsalmaqsızlıqlar tallandı.
Búgingi kúnde mámleketlik xızmetkerlerdiń miynet haqısı quramında lawazım miynet haqısınıń úlesi 15 procentten artpaydı. Miynet haqı fondınıń 70 procentke shekemgi bólegin xızmetkerdiń anıq nátiyjesine baylanıslı bolmaǵan hár qıylı ústeme, sıylıq hám xoshametlewshi tólemler quraydı.

Nátiyjede birdey lawazımda hám uqsas wazıypalardı atqarıp atırǵan xızmetkerlerdiń miynet haqısı arasında úlken parıq payda bolǵan. Ayırım ministrlikler hám uyımlardıń aymaqlıq bólimleriniń xızmetkerleri wálayat, rayon hám qala hákimliklerindegi tap sonday lawazım iyeleri menen salıstırǵanda teńlik principlerine ámel etilmey atırǵanı atap ótildi.

Miynetke haqı tólew sistemasın tártipke salatuǵın birden-bir huqıqıy hújjet joq. Kópshilik mámleketlik uyımlarda qollanılıp atırǵan miynetke haqı tólew shártleri boyınsha 50 den aslam ayrıqsha normativlik hújjet ámel etpekte.

Sonlıqtan, mámleketlik puqaralıq xızmetkerleriniń miynetine haqı tólewdiń birden-bir, ashıq-aydın hám nátiyjege tiykarlanǵan sistemasın engiziw usınıs etildi.

Jańa sistema menen 54 mıń mámleketlik xızmetkerdi qamtıp alıw názerde tutılǵan. Mámleketlik uyımlar milliy, respublikalıq, aymaqlıq jáne rayonlıq hám qalalıq dárejelerge, xızmetkerler bolsa atqaratuǵın wazıypalarına qarap hákimshilik basqarıw, tiykarǵı hám qollap-quwatlaw toparlarına bólinedi.

Xalıqaralıq tájiriybe tiykarında 11 razryad hám 6 basqıshtan ibarat jańa miynet haqı setkasın engiziw usınıs etildi. Onnan aslam ústemeler hám sıylıqlar ornına úsh tiykarǵı xoshametlew tólemi engiziledi.

Sonıń ishinde, mamanlıq dárejesi, xızmetkerdiń funkcionallıq wazıypalardı orınlawı, orınlaw hám miynet tártibi, intakerligi tiykarında bahalanatuǵın nátiyjelilik kórsetkishleri – KPI ushın ústeme tólenedi.

Sonday-aq, áhmiyetli hám quramalı wazıypalardı orınlaǵan, innovaciyalıq qatnaslardı engizgen jáne joqarı nátiyje kórsetken xızmetkerlerge esabat dáwiri juwmaqları boyınsha bonus tólemlerin beriw názerde tutılmaqta.

Aymaqlıq basqarmalar xızmetkerleriniń miynet haqısı tiyisli hákimliklerdegi uqsas lawazımlardıń miynet haqısınan joqarı bolmaydı. Rayon hám qalalarda miynet haqı jáne shtat birliklerin belgilewde xalıqtıń sanı hám aymaqtıń ózine tán ózgeshelikleri esapqa alınadı.

Eń áhmiyetlisi, hár bir mámleketlik xızmetker miynet haqısı qalay qáliplesiwi, qaysı nátiyje ushın ústeme yamasa bonus alıwın aldınnan biledi. Bul xızmetkerlerdiń nátiyjeliligi, intakerligi hám juwapkershiligin arttırıwǵa xızmet etedi.

Mámleketimiz basshısı miynetke haqı tólew sistemasında ádillik hám ashıq-aydınlıqtı támiyinlew, miynet haqını xızmetkerdiń mamanlıǵı, juwapkershiligi hám erisken nátiyjeleri menen baylanıstırıw áhmiyetli ekenligin atap ótti.

Sonday-aq, bonus tólemleri xızmetkerdiń aldınǵı málimleme texnologiyaların, sonıń ishinde, jasalma intellekt, zamanagóy bilim hám kónlikpelerdi iyelegeni, tájiriybe hám mamanlıǵın arttırǵanı sıyaqlı anıq normalar tiykarında tóleniwi belgilendi.