Belarus penen aymaqlararalıq birge islesiwdi keńeytiw máseleleri dodalandı

Atap ótilgenindey, mámleketimiz basshısınıń 8-9-iyul kúnleri usı mámleketke ámelge asırılǵan rásmiy saparı waqtında óz-ara sawda kólemin 2 milliard dollarǵa jetkeriw, mashina qurılısı, awıl xojalıǵı, farmacevtika, toqımashılıq, aǵashtı qayta islew hám medicina tarawlarında ulıwma bahası 2 milliard dollarlıq 310 joybar hám ilajlardı ámelge asırıw boyınsha áhmiyetli kelisimlerge erisildi.

Mámleketimiz basshısı olardı qısqa múddette ámeliy nátiyjege aylandırıw, jańa kárxanalar hám jumıs orınların shólkemlestiriw, isbilermenler ushın zárúr sharayatlardı jaratıw áhmiyetli ekenligin atap ótti.

Belarusta investiciyalıq joybarlardı jaylastırıw ushın usınıs etilip atırǵan sanaat obektleri, mámleketlik múlk hám keń awıl xojalıǵı jerleri bar. Mámleket aymaǵınıń 40 procentin yamasa 8 million gektarın awıl xojalıǵı maydanları quraydı.

Bul imkaniyatlar birgeliktegi óndirislerdi jolǵa qoyıw, agrar kooperaciyanı rawajlandırıw, isbilermenlik baylanısların keńeytiw hám puqaralardı shólkemleskenlik tiykarda jumıs penen támiyinlew ushın bekkem tiykar jaratadı.

Onda Belarusta jumıs islew yamasa biznes júrgiziw tilegindegi puqaralar hám isbilermenlerdiń dizimin qáliplestirip, Belarus tárepi menen aldınnan kelisip, jumıs ornı, jasaw sharayatı, joybar ushın zárúr imarat hám jer máselelerin sheshken halda olardıń barıwın shólkemlestiriw zárúr ekenligi kórsetip ótildi.

Prezentaciyada Ándijan hám Vitebsk wálayatları arasındaǵı birge islesiw sheńberinde orınlanǵan jumıslar haqqında málimleme berildi.

Eki aymaq arasında “jol kartası” tastıyıqlanıp, anıq baslamalardı ámelge asırıw baslanǵan. Sonıń ishinde, Ándijan wálayatınıń 255 puqarasınıń shólkemleskenlik tiykarında Vitebskke barıwı hám bántligi támiyinlendi.

Sonday-aq, 11 sharwashılıq kompleksi tiykarında jańa joybarlardı jolǵa qoyıw boyınsha kelisimge erisildi. Olardıń hár biri 200 bastan 3 mıń basqa shekem qaramal baǵıw imkaniyatına hám jeterli azıqlıq maydanlarına iye.

“Andijan invest” kompaniyasınıń qatnasıwında iri sharwashılıq kompleksi hám sanatoriy kompleksi tiykarında investiciyalıq hám sociallıq baslamalardı baslaw ilajları kórilmekte.

Ulıwma, Vitebsk hám Belarustıń basqa da wálayatlarında sharwashılıq, aǵashtı qayta islew, logistika, sawda hám xızmet kórsetiw baǵdarlarında ulıwma bahası 100 million dollardan aslam bolǵan 30 jańa joybar paketi qáliplestirildi.

Atap aytqanda, Vitebsk wálayatında 3 mıń bas qaramalǵa mólsherlengen iri sút jetistiriw kompleksi, bir qatar orta kólemdegi sharwashılıq xojalıqları, aǵashtı tereń qayta islew hám onıń shıǵındısınan pellet islep shıǵarıw kárxanasın shólkemlestiriw rejelestirilgen.

Prezidentimiz Ándijan hám Vitebsk wálayatları arasında qáliplesken birge islesiw modelin basqa aymaqlar kesiminde de rawajlandırıw boyınsha kórsetpeler berdi.

Buxara, Qashqadárya, Nawayı, Namangan, Tashkent, Ferǵana hám Samarqand wálayatları Belarustıń Vitebsk, Mogilyov, Grodno, Gomel hám Brest wálayatlarına biriktiriledi. Sanaat hám agrar obektler tiykarında jańa óndirislerdi shólkemlestiriw, isbilermenlik joybarların jaylastırıw hám xalıqtıń bántligin támiyinlew boyınsha óz aldına “jol kartaları” tastıyıqlanadı.

Hár bir aymaqtan 30 dan jetekshi isbilermendi Belarusqa alıp barıp, jergilikli sherikler menen birgeliktegi baslamalardı baslaw wazıypası qoyıldı.

Óz-ara sawdanı jedellestiriw hám júk tasıw qárejetlerin azaytıw maqsetinde zamanagóy logistika infrastrukturasın qurıw máseleleri de kórip shıǵıldı.

Jıldıń aqırına shekem “Belarus temir jolları” menen birgelikte Vitebsk wálayatındaǵı Orsha stanciyasında eksport-import júkleri ushın qolaylı tarifler tiykarında xızmet kórsetetuǵın intermodal logistika orayın iske qosıw belgilendi.

Sonday-aq, Belarus kompaniyaları menen birgelikte eki el arasında tikkeley blok-poezdlar qatnawın jolǵa qoyıw wazıypası qoyıldı.

Puqaralardı shólkemlesken tártipte jumısqa jaylastırıw máselesine ayrıqsha itibar qaratıldı.

Birinshi basqıshta Vitebsk hám basqa da aymaqlardaǵı 13 kárxanaǵa 1 mıń 100 Ózbekstan puqarasın tańlaw tiykarında jumısqa jaylastırıw rejelestirilgen.
Sentyabr ayınan baslap hár ayda 500 den, jámi 5 mıń ándijanlıqtı Vitebsk wálayatında turaqlı jumıs penen támiyinlew názerde tutılǵan. Bunıń ushın Vitebsk qalasında Migraciya agentliginiń wákilxanası ashıladı.

Isbilermenlerge Belarusta esap bet ashıw, ustav fondına qarjı ótkeriw hám joybarlarına finanslıq resurslar alıwda járdemlesiw wazıypası qoyıldı.

Vitebskte zamanagóy sút jetistiriw kompleksi, aǵashtı qayta islew zavodı hám logistika kompaniyasın shólkemlestiriw ushın zárúr qarjılardı qolaylı shártlerde ajıratıw boyınsha kórsetpeler berildi.

Mámleketimiz basshısı hár bir kelisim anıq joybar, jańa kárxana, qosımsha sawda kólemi hám múnásip jumıs ornına aylanıwı shárt ekenligin atap ótti.

Juwapkerlerge erisilgen nátiyjelerdi sistemalı qadaǵalaw hám “jol kartaları” orınlanıwın sın kózqarastan tallap barıw tapsırıldı.