Samarqand wálayatı rayonların qánigelesiw tiykarında rawajlandırıw ilajları kórip shıǵıldı

Mámleketimiz basshısınıń ótken jılı dekabr ayındaǵı Samarqand wálayatına saparınan soń aymaqtı 2026-jılı sociallıq-ekonomikalıq rawajlandırıw boyınsha zárúr ilajlar belgilenip, oǵan qosımsha 100 million dollar qarjı ajıratılǵan edi. Usı jıldıń mart ayında Narpay rayonına etken saparı dawamında bolsa wálayattıń alıs hám shetki aymaqların ayrıqsha qatnas tiykarında rawajlandırıw boyınsha tapsırma berilgen edi.

Májiliste bul tapsırmalardıń orınlanıwı Bulunǵur, Narpay, Aqdárya, Paxtachi, Qwshrabot, Kattaqorǵan rayonları hám Kattaqorǵan qalası mısalında kórip shıǵıldı.

Atap ótilgenindey, shetki aymaqlarda xalıq kóp bolsa da, joqarı dáramatlı jumıs orınları jeterli emes. Narpay, Qwshrabot, Paxtachi, Kattaqorǵan rayonları hám Kattaqorǵan qalasınıń wálayat sanaatındaǵı ulıwma úlesi tek ǵana 10 procentti quraydı. Narpay, Paxtachi, Pastdarǵom rayonları jáne Kattaqorǵan qalasında jumıssızlıq hám kámbaǵallıq dárejesi basqa aymaqlarǵa salıstırǵanda joqarı.

Sonlıqtan, bul aymaqlardıń potencialınan kelip shıǵıp, olardı anıq qánigelesiw tiykarında rawajlandırıw usınıs etildi. Atap aytqanda, Bulunǵur, Qwshrabot, Paxtachi hám Kattaqorǵan rayonları awıl xojalıǵı, sharwashılıq hám baǵshılıq orayı sıpatında rawajlandırıladı. Bulunǵurda jıllıq quwatlılıǵı 100 mıń bas bolǵan 50 million dollarlıq násilshilik kárxanasın, Qwshrabot hám Aqdáryada jıllıq quwatlılıǵı 800 mıń dana bolǵan 20 million dollarlıq násilli shóje kárxanaların iske qosıw rejelestirilgen.
Narpay rayonı hám Kattaqorǵan qalası sanaat hám xızmet kórsetiw tarawlarınıń ósiw noqatına aylandırıladı. Sonıń ishinde, Narpayda 100 gektar maydanda sanaat zonası shólkemlestirilip, joqarı qosımsha qunǵa iye ónimler islep shıǵarıw boyınsha 500 million dollarlıq joybarlar jaylastırıladı. Bul processke Yaponiyanıń 10 iri kompaniyasın tartıw názerde tutılǵan.

Aqdárya rayonı qusshılıq, toqımashılıq hám qayta islew sanaatına qánigelesken aymaq sıpatında rawajlandırıladı.
Májiliste Narpay, Paxtachi, Pastdarǵom rayonları hám Kattaqorǵan qalasında jumıssızlıq dárejesin 3 procentke, kámbaǵallıqtı 2 procentke túsiriw, Ishtixan, Narpay, Nurabad, Paxtachi, Qwshrabot hám Kattaqorǵan rayonlarında eksporttı 20 procentke arttırıw, sonday-aq, Bulunǵur, Narpay, Nurabad, Payariq, Paxtachi, Qwshrabot, Kattaqorǵan rayonları hám Kattaqorǵan qalasında xızmetler jáne sanaat kólemin 2 esege kóbeytiw boyınsha joybarlar tanıstırıldı.

Samarqand wálayatınıń turizm potencialın bunnan bılay da keńeytiw máselelerine ayrıqsha itibar qaratıldı.

Usı jıldıń basınan elimizge kelgen sırt elli turistlerdiń sanı 27,3 procentke artıp, 5,4 millionǵa jetti. Ózbekstan sırt el turistleriniń sanın 20 millionǵa, turizm eksportın 10 milliard dollarǵa jetkeriw boyınsha úlken shek alǵan. Bunıń ushın aymaqlarda turistlerdi kóbirek irkip qalatuǵın jańa jónelisler hám servis obektlerin kóbeytiw zárúr ekenligi atap ótildi.
Usı maqsette Samarqandtıń tariyxıy orayındaǵı 13 kósheni piyadalar aymaǵına aylandırıw, jańa turizm hám servis obektlerin qurıw baslaması qollap-quwatlandı.

Sonday-aq, “Ohalik-Aqboyro-Mironqul” turistlik-rekreaciyalıq zonasınıń aymaǵın keńeytiw usınıs etildi. Imam Moturidiy estelik kompleksiniń qarsı aldınan aǵıp ótetuǵın “Shaar” kollektorı átirapın abadanlastırıw máselesi de kórip shıǵıldı.
Bul ilajlardıń nátiyjesinde Samarqand qalası, Nurabad hám Samarqand rayonlarında miymanxanalardıń sanın 850 ge, nomer fondın 20 mıń orınǵa, turizm xızmetleriniń kólemin 750 million dollarǵa jetkeriw wazıypası qoyıldı.

Májiliste xalıqtıń jasawı ushın qolaylı infrastruktura jaratıw eń tiykarǵı wazıypa ekeni atap ótildi. Onıń ushın sociallıq obektler qurıw, jol, ishimlik suwı hám kanalizaciya tarmaqları, elektr támiynatın jaqsılaw, servis hám renovaciya joybarların ámelge asırıw, sanaat joybarların infrastruktura menen támiyinlew maqsetinde 1,2 trillion sum ajıratıw usınısı bildirildi.

Samarqand qalasında renovaciya baǵdarlaması tiykarında “Ximikler” posyolkasın xalıq ushın qolaylı kóriniske keltiriw boyınsha master-rejeni bir ay múddette tastıyıqlaw, Bulunǵur rayonında qurılıp atırǵan “Jańa Ózbekstan” massivi aymaǵın keńeytiw, jıldıń aqırına shekem Samarqand qalasınıń “Temirjol artı” aymaǵındaǵı bos turǵan jer hám imaratlardıń ornında sport, mádeniyat, muzıka hám kórkem óner dárgayların shólkemlestiriw wazıypası qoyıldı.

Sonday-aq, wálayat hákimligi janında sociallıq taraw obektlerin qurıw hám ońlaw qorın shólkemlestiriw maqullandı. Samarqand wálayatın sociallıq-ekonomikalıq rawajlandırıw baǵdarlamaları sheńberinde ámelge asırılıp atırǵan joybarlar boyınsha únemlengen qarjılar usı qorǵa qaratılatuǵını belgilendi.

Májiliste juwapkerlerdiń málimlemesi tıńlandı. Mámleketimiz basshısı Samarqand wálayatınıń hár bir rayonında bar imkaniyatlardı tolıq iske qosıw, jańa jumıs orınların jaratıw, xalıqtıń dáramatın arttırıw hám aymaqlar arasındaǵı ekonomikalıq ayırmashılıqtı qısqartıw boyınsha anıq tapsırmalar berdi.