Dóretiwshilik joybarlar menen tanısıldı

Mámleketimiz basshısına Ándijan wálayatı Babur qalasında qurılatuǵın arxitekturalıq ansambl quramında ullı mámleketlik ǵayratker, sárkarda hám shayır Zahiriddin Muhammed Baburǵa baǵıshlanǵan sawlatlı estelik ornatıw joybarı tanıstırıldı.

Ullı babamızdıń esteligin múnásip qádirlew, onıń bay ilimiy-ádebiy miyrasın, mámleketshilik oy-pikirin hám dúnya civilizaciyasına qosqan sheksiz úlesin jas áwladqa tereń jetkeriw maqsetinde bul estelikti ayrıqsha mazmun hám kórkem sheshim tiykarında jaratıwǵa úlken itibar berilmekte.

Prezidentimizge bolajaq esteliktiń eskizleri, kompoziciyalıq sheshimi hám Babur tulǵasın sáwlelendiriw boyınsha ilimiy-kórkem qatnaslar haqqında maǵlıwmat berildi. Atap ótilgenindey, ullı tariyxıy shaxs obrazı elimiz ilimpazları tárepinen sırt elli kásiplesler menen birgelikte alıp barılǵan izertlewler, kóplegen tariyxıy derekler, qoljazbalar, miniatyuralar hám mádeniy miyras úlgilerin tereń úyreniw tiykarında jaratılmaqta.
Sonıń menen birge, Prezidentimizdiń Pakistanǵa mámleketlik saparı sheńberinde Islamabad qalasındaǵı baǵlardan birine Zahiriddin Muhammed Babur atı berilgen edi. Bul baǵda da ullı babamızǵa ornatılatuǵın estelik joybarı kórip shıǵıldı.

Mámleketimiz basshısı esteliklerdi jaratıwda Zahiriddin Muhammed Baburdıń tımsalın tek ǵana ullı jazıwshı hám shayır emes, al sheber sárkarda, qúdiretli mámlekettiń tiykarın salıwshı hám danıshpan húkimdar sıpatında tereń ashıp beriw zárúrligin atap ótti. Onıń erk-ıqrarı, mámleketshilik potencialı, joqarı mánawiyatı hám dóretiwshilik ideyaları esteliktiń ulıwmalıq kelbetinde ayqın kórinisin tabıwı kerek ekenligi atap ótildi.

Prezidentimizge Ábiw Rayxan Beruniy atındaǵı xalıqaralıq mektep-internatınıń materiallıq-texnikalıq bazasın jetilistiriw, Buxara qalasında turizm hám transport infrastrukturasın rawajlandırıw, rayonlardaǵı mádeniyat úylerin modernizaciyalaw boyınsha islep shıǵılıp atırǵan joybarlar haqqında da málimleme berildi.

Mámleketimiz basshısı joybarlardı jáne de jetilistirip, aldınǵı tájiriybe tiykarında puqta islep shıǵıw boyınsha kórsetpe berdi.