Mádeniyat hám turizm tarawındaǵı jańa joybarlar kórip shıǵıldı

Bárinen burın, Samarqand qalasında 9 gektar maydanda jańa Jipek jolı muzeyin qurıw rejesi kórip shıǵıldı. Joybarǵa bola, bul muzey ekspoziciyası arxeologiya, súwretlew óneri, ámeliy kórkem óner materialların qamtıp alǵan 6 mıńnan aslam siyrek ushırasatuǵın eksponatlardı birlestiredi. Muzeyde turaqlı hám waqıtsha kórgizbeler ushın ekspoziciyalar, 160 orınlıq auditoriya, balalar akademiyası, konservaciya hám izertlew orayı, úlken kólemdegi saqlaw xanaları da shólkemlestiriledi.

Prezentaciyada xalıqtı mádeniyat mákemelerine keńnen tartıw, olardıń mazmun-mánisi hám jumıs usılın zaman talapları tiykarında jańalaw máselelerine de ayrıqsha itibar qaratıldı.
Usı múnásibet penen respublikadaǵı 839 mádeniyat orayın basqıshpa-basqısh transformaciyalaw, imaratların zamanagóy kóriniske keltiriw, jumısına jeke menshik sektordı tartıw, bul baǵdarda tartımlılıqtı arttırıw boyınsha usınıslar dodalandı. Ulıwma, 2030-jılǵa shekem mádeniyat tarawına 1 trillion sumnan aslam qarjı qaratılatuǵını belgilendi.

Kórkem óner tarawında qábiletli jaslardı erte anıqlaw, olardı tómengi klasslardan maqsetli oqıtıw, oqıw ornında jasap bilim alıwı hám dóretiwshilik penen shuǵıllanıwı ushın múnásip sharayat jaratıw áhmiyetli wazıypa sıpatında belgilendi.
Ándijan jaslar simfoniyalıq orkestri hám “Tumar” ayaq oyın ansambliniń jumısın qollap-quwatlaw boyınsha bildirilgen usınıslar maqullandı.

Mediamákanda milliy kontentlerdi kóbeytiw, jasalma intellektten aqılǵa uǵras paydalanǵan halda milliy mádeniyatımız haqqında maǵlıwmatlar bazasın keńeytip barıw zárúrligi atap ótildi.
Sonday-aq, mámleketlik emes mádeniyat shólkemleriniń jumısın jolǵa qoyıw ushın jeńilletilgen kreditler ajıratıw, mámleketlik emes teatr hám teatr-studiyaların mámleket tárepinen qollap-quwatlaw, olarǵa joybarlardı ámelge asırıw ushın grantlar ajıratıp barıw sisteması engiziletuǵını belgilendi.

Usı jıldıń basınan elimizge 3 millionǵa shamalas turist kelip, ósim páti 37 procentti, turizm xızmetleriniń eksportı bolsa 48 procentke ósip, 1,1 milliard dollarǵa jetkeni atap ótildi. 2030-jılǵa shekem 20 million sırt el turistin tartıw, 2026-jılda bolsa 12 million turistke xızmet kórsetiw maqset etilgen.

Endi hár bir aymaqtıń ózine tánliginen kelip shıǵıp, onıń turistlik potencialın arttırıw boyınsha mánzilli baǵdarlamalardı ámelge asırıw zárúr ekenligi kórsetip ótildi.

Usı maqsette aymaqlarda turizm infrastrukturasın jedel rawajlandırıw hám tarawdı joybarlaw basqarması tiykarında shólkemlestiriw ilajları kórip shıǵıldı. Atap aytqanda, 2026-2027-jıllarda aymaqlarda 31 master-joybardı ámelge asırıwdı baslaw, 40 mıńnan aslam jumıs ornın jaratıw, jaylastırıw qurallarınıń sanın 8 mıń 250 ge, turizm awılları hám máhálleleriniń ulıwma sanın 84 ke jetkeriw rejelestirilgen.

Jańa turistlik ónimlerdi qáliplestiriw hám isbilermenlerdi qollap-quwatlaw boyınsha da bir qatar mexanizmler názerde tutılǵan. Sonıń ishinde, sırt elli turistlerdi tartıwǵa qaratılǵan úgit-násiyatlaw qárejetleriniń 25 procentke shekemgi bólegi, biraq 500 million sumnan aspaǵan bólegi qaplap beriliwi, turistler ushın mádeniy-ǵalabalıq hám saxnalastırılǵan tamashalardı sistemalı jolǵa qoyǵan jeke menshik isbilermenlerdi xoshametlew, servis tarawındaǵı jergilikli hám sırt elli qánigelerdiń qatnasıwında ámeliy oqıw kursların shólkemlestiriw názerde tutılǵan.

Prezentaciyada respublikamızdıń turizm potencialın xalıqaralıq bazarda keńnen úgit-násiyatlaw boyınsha da jańa qatnaslar kórip shıǵıldı.
Juwapkerlerge dodalanǵan joybar hám baslamalardı puqta islep shıǵıw, olardı anıq esap-sanaq hám rejeler tiykarında ámelge asırıw boyınsha tiyisli tapsırmalar berildi.