Sox rayonın sociallıq-ekonomikalıq rawajlandırıw boyınsha áhmiyetli wazıypalar belgilendi

Atap ótilgenindey, burın Sox barıw qıyın, transport hám logistika imkaniyatları sheklengen, ekonomikalıq baylanısları ázzi aymaqlardan biri edi. Sońǵı jıllarda regionallıq birge islesiw hám bekkem siyasiy erk-ıqrar sebepli bul aymaqtı kompleksli rawajlandırıw ushın jańa imkaniyatlar jaratıldı. Jollar ashıldı, shegaradan ótiw tártipleri jeńillestirildi, isbilermenlik ushın sharayatlar jaqsılandı, zamanagóy baqsha, mektep, poliklinika hám turaq jaylar qurıldı.

Búgingi kúnde Soxtaǵı 25 máhállede 88,6 mıń xalıq jasaydı. Aymaqta 29 mektepke shekemgi bilimlendiriw shólkemi, 33 mektep, 2 orta arnawlı bilimlendiriw mákemesi, 14 densawlıqtı saqlaw mákemesi hám 2 mádeniyat obekti jumıs alıp barmaqta. Ótken jıldıń ózinde 13 mıń 921 jumıs ornı jaratıldı, 1 mıń 667 shańaraq kámbaǵallıqtan shıǵarıldı.

Ulıwma, Soxtaǵı ózgerisler tek ǵana infrastrukturanıń jańalanıwı emes, al aymaqtıń ekonomikalıq belsendiligi artqanı, xalıqtıń isenimi bekkemlengeni hám jaslar ushın imkaniyatlar keńeygeniniń ámeliy kórinisi bolıp esaplanadı. Búgingi Sox áste-aqırın regionallıq ekonomikalıq sistemaǵa qayta qosılmaqta.

Sonıń menen birge, rayonda kámbaǵallıq dárejesi 7,9 procent, jumıssızlıq 5,5 procentti qurap, bul kórsetkishler elege shekem respublikalıq ortasha dárejeden joqarı ekeni kórsetip ótildi.

Prezentaciyada juwapkerler usı jılı rayonǵa 40 million dollar investiciya tartıw, 15 million dollarlıq eksporttı támiyinlew rejesi alınǵanı haqqında málimleme berdi. Sonıń esabınan sanaatta 9 procent, xızmetler tarawında 17,1 procent, awıl xojalıǵında 7,6 procent ósiwge erisiw názerde tutılǵan.
Májiliste rayonnıń turizm potencialına ayrıqsha itibar qaratıldı.

Soxtıń biytákirar tábiyatı, taza hawası, dáryaları hám salqın klimatı bul tarawdı ekonomika drayverlerinen birine aylandırıw imkaniyatın beretuǵını atap ótildi. Mısalı, Sarikanda, Rovon hám Istiqlol máhállelerinen ótken Sox dáryasınıń jaǵalarında jańa turizm obektlerin qurıw múmkin. Yamasa bul jerde reabilitaciya, fizioterapiya, dári-dármaq logistikası hám medicinalıq bilimlendiriwdi bir aymaqta jámlegen Medicinalıq xızmetler klasterin shólkemlestiriw ushın barlıq sharayatlar bar.

Ulıwma, turizm hám xızmet kórsetiw tarawında 60 million dollar investiciya tartıw, derlik 2 mıń jumıs ornın jaratıw, turizm xızmetleriniń kólemin 15 milliard sumǵa, eksporttı bolsa 2 million dollarǵa arttırıw rejelestirilgeni málim etildi.
Eń áhmiyetli wazıypalardan biri sıpatında xalıqtıń jasawı hám miynet etiwi ushın qolaylı infrastruktura jaratıw, isbilermenlikti keńeytiw hám bántlikti támiyinlew máseleleri dodalandı.

Hár bir máhállede 10 nan, jámi 300 mikrojoybar iske qosılıp, 8,6 mıń xalıq kásip-ónerge oqıtıladı. Bul joybarlarǵa bankler tárepinen 64 milliard sum kredit resursı qaratıladı, sociallıq hám infrastruktura obektleri ushın bolsa qosımsha 74,5 milliard sum ajıratıladı.
Transport-logistika máseleleri de hár tárepleme kórip shıǵıldı. Rayonnıń basqa aymaqlar menen baylanıslılıǵın arttırıw, shegaradan ótiwdi tezlestiriw hám ekonomikalıq baylanıslardı keńeytiw boyınsha ámeliy ilajlar belgilendi.

Xalıqtıń dáramatınıń tiykarǵı bólegi awıl xojalıǵı menen baylanıslı ekenin esapqa alıp, bul tarawda zamanagóy qatnaslar hám jańa texnologiyalardı keńnen engiziw zárúr ekenligi atap ótildi.
Mısalı, Qayroq massivindegi 425 gektar jaylawda miyweli baǵlar, CHashma máhállesindegi 60 gektar jerde shafran plantaciyaları, Azad hám Sox xojalıqlarına qaraslı 100 gektar maydanda kartoshka jetistiriw joybarların ámelge asırıw usınıs etildi. Sonday-aq, Nawabad máhállesinde balıqshılıqtı rawajlandırıw boyınsha joybar tanıstırıldı. Oǵan bola, 50 sotıxtan 30 háwiz shólkemlestirilip, hár bir háwizden 50 tonnadan forel balıǵın jetistiriw múmkin.

Sonıń menen birge, Devayron hám Tul-dasht aymaqları aralıǵında 8 kilometr uzınlıqta ózi aǵatuǵın suwǵarıw tarmaǵın qurıw esabınan 500 gektar miyweli baǵ hám qosımsha 300 gektar egislik maydanın ózlestiriw imkaniyatı bar ekenligi kórsetip ótildi.

Mámleketimiz basshısı Sox rayonın rawajlandırıwda eń tiykarǵı maqset adamlardıń turmısında sezilerli ózgeris islew, xalıqtıń dáramatın arttırıw, jumıs orınların jaratıw hám aymaqtıń transport baylanıslılıǵın jáne de kúsheytiwden ibarat ekenin atap ótti. Juwapkerlerge rayon boyınsha belgilengen wazıypalardıń orınlanıwın támiyinlew boyınsha tiyisli tapsırmalar berildi.