Múddetli áskeriy xızmetti ótep atırǵan jaslardı qollap-quwatlaw bunnan bılay da keńeytiledi

Búgingi kúnde elimizde jaslar máselesi mámleketlik siyasattıń eń áhmiyetli baǵdarlarınan biri bolıp, olardıń zamanagóy bilim hám kásip-óner iyelewin jáne bántligin hár tárepleme qollap-quwatlaw boyınsha izbe-iz reformalar alıp barılmaqta.

Atap aytqanda, usı jıldıń 13-yanvar kúni ótkerilgen Qáwipsizlik keńesiniń keńeytilgen májilisinde áskeriy xızmettiń abırayın jáne de arttırıw hám jaslardıń jámiyette múnásip orın tabıwına járdemlesiw boyınsha anıq wazıypalar belgilep berilgen edi.

Bul baǵdardaǵı reformalardıń logikalıq dawamı sıpatında búgin múddetli áskeriy xızmetke shaqırılǵan jaslardı kásipke úyretiw hám sapalı bilim alıwı ushın sharayat jaratıw jáne armiyada kitapqumarlıqtı ǵalaba en jaydırıw boyınsha islep shıǵılǵan usınıslar kórip shıǵıldı.

Sonıń ishinde, 2026-2027-oqıw jılınan baslap múddetli áskeriy xızmetke shaqırılǵan jaslarǵa bir qatar jeńillikler hám kepillikler beriliwi názerde tutılmaqta.

Endi múddetli áskeriy xızmetkerler ushın áskeriy xızmet dáwirinde joqarı oqıw orınlarına oqıwǵa kirip, aralıqtan bilim alıw imkaniyatı jaratılmaqta. Bul processte áskerler ushın bilimlendiriw shólkemleri menen birgelikte áskeriy bólimlerde abiturientlerdi tayarlaw kursları shólkemlestirilip, joqarı oqıw orınlarınıń kiriw imtixanlarına tayarlaw sisteması jolǵa qoyıladı.

Shártnama tiykarında oqıwǵa qabıl etilgen áskerlerge bolsa procentsiz jeńilletilgen kreditler ajıratıladı. Eń áhmiyetlisi, joqarı bilimlendiriw mákemelerine qabıl etilgen áskerler áskeriy fakultetlerdiń studentlerine teńlestirilip, oqıwdı tamamlaǵannan soń olarǵa rezervtegi leytenant áskeriy ataǵı beriledi.

Sonıń menen birge, úlgili xızmet ótegen, respublikalıq hám xalıqaralıq sport jarıslarında jáne pán olimpiadalarında birinshi orındı iyelegen áskerlerdi test sınaqlarısız oqıwǵa qabıllaw tártibi belgilenbekte.

Engizilip atırǵan jeńilliklerden jáne biri – áskerler ushın áskeriy xızmet dawamında “Bir ásker – bir kásip” principi tiykarında 3-6 aylıq oqıw kursları shólkemlestirilip, olarǵa mámleketlik úlgidegi arnawlı sertifikat beriledi.

Múddetli áskeriy xızmetten qaytıp, jeke menshik sektorda jumıs islewdi qálegen jaslardıń kásip-ónerge oqıw qárejetleri vaucher tiykarında Bántlikke kómeklesiw mámleketlik qorı tárepinen qaplap beriledi.

Mámleketlik shólkemlerge jumısqa kiriw tilegin bildirgen jaslarǵa bolsa Basqarıw nátiyjeliligi agentligi tárepinen ótkeriletuǵın test sınaqlarında 10 procentlik jeńillikli ballar qosıp beriledi.

Májiliste áskeriy xızmetkerlerdiń kitapqumarlıqqa qızıǵıwshılıǵın jáne de arttırıw, bul baǵdarda olardı qollap-quwatlaw hám xoshametlew boyınsha ilajlar da kórip shıǵıldı.

Atap aytqanda, usı jıldan baslap, hár jılı Qurallı Kúshlerdiń barlıq kategoriyadaǵı áskeriy xızmetkerleri arasında tórt basqıshlı “Ruwxıylıq qalqanı” respublikalıq kitapqumarlıq tańlawı ótkeriledi.

Tańlawdıń birinshi basqıshı áskeriy bólim hám áskeriy bilimlendiriw mákemelerinde, ekinshi basqıshı áskeriy okrug, birlespe hám qosılmalarda, úshinshi basqıshı Qurallı Kúshler quramındaǵı ministrlikler hám uyımlarda ótkeriledi. Juwmaqlawshı respublika basqıshında saylap alıw basqıshlarınıń jeńimpazı bolǵan áskeriy xızmetkerler óz-ara bellesedi. Juwmaqlawshı basqıshtıń 4 jeńimpazı Qurallı Kúshler Joqarǵı Bas Sárkardasınıń bas sıylıǵı – zamanagóy elektromobil hám diplom menen sıylıqlanadı. Sıylı orınlardı iyelegen áskeriy xızmetkerler aqshalay sıylıqlar hám diplomlar menen xoshametlenedi.

Mámleketimiz basshısı usınıslardı maqullap, tiyisli qararlarǵa qol qoydı. Jańa ilajlar elimizdiń rawajlanıwı ushın joqarı bilim, mamanlıq hám intellektuallıq potencialǵa iye jáne watansúygish kadrlar rezervin qáliplestiriwge xızmet etiwi kerek ekenligin atap ótti.

Májiliste, sonday-aq, qorǵanıw ministri mámleketimizdiń áskeriy qáwipsizligin kúsheytiw, áskerlerdiń jawıngerlik tayarlıǵın arttırıw boyınsha belgilengen wazıypalardıń orınlanıw barısı haqqında málimleme berdi.