Samarqandqa jáne 250 elektrobus alıp kelinedi

Mámleketimiz basshısınıń 2023-jıl 17-fevralda qabıl etilgen “Jámiyetlik transport sistemasın reformalaw ilajları haqqında”ǵı qararı tiykarında aymaqlarda da avtotransport xızmetleri jaqsılanıp, jámiyetlik transport jónelisleri keńeytilmekte.

Onda avtobus parklerin zamanagóy talaplar tiykarında modernizaciyalaw, jónelisler boylap ekologiyalıq taza avtotransport qatnawın shólkemlestiriwge ayrıqsha itibar qaratılmaqta.

Mine, usı maqsetlerde Samarqand qalasına birinshi basqıshta 49 million dollar esabınan 100 zamanagóy elektrobus alıp kelindi. Bul “Yutong” markalı elektrobuslar 30 orınlıq bolıp, ulıwma sıyımlılıǵı 75 jolawshıdan ibarat.

Jańa avtobuslar ushın 4 gektarǵa shamalas maydanda avtosaray shólkemlestirilgen. Bul jerdegi elektrobuslardı quwatlaw stanciyasında bir waqıttıń ózinde 50 jámiyetlik transportqa xızmet kórsetiw imkaniyatı jaratıldı.

Elektrobuslar ushın qurılǵan jabıq stoyankada texnikalıq xızmet kórsetiw ushın mobil ońlaw texnikası da bar. Elektrobuslar qalanıń 9 jónelisinde brutto-shártnama tiykarında háreketlenip, kúnine 70 mıńǵa shamalas jolawshıǵa xızmet kórsetpekte.

Joybardıń ekinshi basqıshında bolsa jáne 250 elektrobus satıp alıw názerde tutılǵan. Onıń ushın Evropa tikleniw hám rawajlanıw bankinen 120 million dollar qarjı tartıw rejelestirilgen. Nátiyjede janılǵı jumsalıwı 32 mıń litr, zıyanlı gazler muǵdarı 27 tonnaǵa azayadı.

Búgingi kúnde avtosarayda 265 xızmetker miynet etpekte. Jańa elektrobuslardıń alıp keliniwi procesinde bolsa jáne 500 den aslam jumıs orınları jaratıladı.

Prezidentimiz jańa avtobuslardı kózden ótkerdi.

– Bul tarawdıń ekonomikalıq turaqlılıǵın arttırıw ushın elektrobuslarǵa xızmet kórsetetuǵın, olardı ońlaytuǵın qánigelerdi tayarlaw boyınsha Samarqand tájiriybesin jaratıwımız kerek, – dedi mámleketimiz basshısı.

Usı jerdiń ózinde Samarqand qalasında jámiyetlik transporttı rawajlandırıw boyınsha alıp barılıp atırǵan jumıslar, sonıń ishinde, avtobuslar háreketin basqarıw processlerin sanlastırıw boyınsha prezentaciya ótkerildi.

Prezidentimiz sapar dawamında usı aymaqqa tutas bolǵan Gagarin hám Rudakiy kósheleriniń kesilispesinde qurılǵan jol ótkelin de kózden ótkerdi.

Uzınlıǵı 600 metr bolǵan tunnel 12 million dollar esabınan qurılǵan, bir kúnde ortasha 50 mıń transport quralın ótkeriwi múmkin.
Kóshe boylarına elektron túrde basqarılatuǵın túngi jaqtılandırıw sisteması, jer astı piyadalar jolı qurılǵan.

Tunnel Qıtay hám Túrkiya qurılıs kompaniyaları menen birgelikte qurıldı. Diywalları zamanagóy qurılıs texnologiyasınan paydalanǵan halda burawlaw usılı arqalı tirgek diywalları qurılǵan.

Bul qurılıs transport qurallarınıń háreketi toqtatılmaǵan halda alıp barıldı. Aymaq kóklemzarlastırılıp, sayamanlı terek nálleri otırǵızıldı.