Kosmosqa jasalma joldas ushırıw hám birinshi milliy kosmonavttı tayarlaw boyınsha usınıslar kórip shıǵıldı

Atap ótilgenindey, búgin dúnyada báseki jańa basqıshqa shıǵıp, ekonomikalıq qúdiret tábiyǵıy baylıqlar menen emes, intellektuallıq potencial hám texnologiyalar menen ólshenbekte. Kosmoslıq texnologiyalar bolsa strategiyalıq áhmiyetke iye baǵdarlardan birine aylandı.

Mámleketimizde kosmoslıq maǵlıwmatlardan paydalanıw baslanǵanına kóp waqıt ótpegen bolsa da, qısqa waqıt ishinde sezilerli ámeliy nátiyjelerge erisildi. Mámleketlik kosmoslıq monitoring iske qosılıp, bul sistema proaktiv túrde islemekte.

Sonıń menen birge, keyingi bes jılda aralıqtan zondlaw maǵlıwmatlarına talap 3 esege artqanı, házirgi waqıtta kosmoslıq monitoring penen 10 nan aslam mámleketlik uyımlar hám barlıq hákimlikler islep atırǵanı kórsetip ótildi.
– Eń áhmiyetlisi, kosmoslıq maǵlıwmatlar arqalı biz “kóz benen kórinbeytuǵın” ekonomikalıq imkaniyatlardı anıqlap, olardı real dáramat deregine aylandırıp atırmız. Bul mámleketlik resurslardı basqarıw mexanizmi hám mádeniyatı ózgerip atırǵanınan derek beredi, – dedi Prezidentimiz.

Sonıń menen birge, kosmos tarawında uzaq múddetli hám turaqlı milliy sistema – jasalma joldaslardı basqarıw, maǵlıwmatlardı qayta islew hám olardan ámeliyatta paydalanıw infrastrukturasın qáliplestiriw áhmiyetli ekeni atap ótildi. Bunnan maqset mámleketimiz suveren hám obektiv maǵlıwmatlar deregine iye bolıwı bolıp tabıladı.

Házirge shekem sırt mámleketlerdiń tájiriybesi úyrenilip, bolajaq jasalma joldastıń anıqlıǵı hám paydalı júklemesine baylanıslı texnikalıq talaplar anıqlandı.

Prezentaciyada ilimiy-texnologiyalıq potencialdı arttırıw sheńberinde birinshi milliy ilimiy jasalma joldastı jaratıw joybarı da kórip shıǵıldı. Joybar sheńberinde qánigelerdi tayarlaw hám injenerlik jámáátin qáliplestiriw, 2028-jılı “Mırza Ulıǵbek” atamasındaǵı 6U formattaǵı ilimiy jasalma joldastı ushırıw usınıs etildi.

Mámleketimiz basshısınıń baslaması menen birinshi milliy kosmonavttı tayarlaw hám onı kosmosqa ushırıw strategiyalıq wazıypa sıpatında belgilengen.
– Bul tek ǵana rámziy qádem emes, al mámleketimizdiń ilimiy potencialı, jaslarımızdıń ármanı hám milliy maqtanıshımızdıń kórinisi boladı, – dedi Prezidentimiz.

Milliy kosmonavttı qısqa múddetke – 10-14 kúnlik párwazǵa tayarlaw usınıs etildi, bunday párwazlardı shólkemlestiriw boyınsha xalıqaralıq birge islesiw perspektivaları kórip shıǵıldı.
Kosmonavttı kosmosqa ushırıw anıq ilimiy baǵdarlamanı ámelge asırıw menen tıǵız baylanıslı bolıwı zárúrligi atap ótildi. Bul jetiskenlik mámleketimizdiń xalıqaralıq abırayın arttırıw menen birge ilimiy potencialdı rawajlandırıw, jańa joybar hám texnologiyalıq baslamalardıń payda bolıwı, jaslardıń ilim hám texnologiyalarǵa qızıǵıwshılıǵınıń artıwına xızmet etiwi kerek.

Ózbekstan kosmonavtı kosmosta bolıw dáwirinde alıp barılıwı múmkin bolǵan izertlewler baǵdarı sıpatında medicina hám biologiya (aralıqtan diagnoz qoyıw, jergilikli dárilik ekstraktlardıń nátiyjeliligin úyreniw), ósimlikler genetikası (qurǵaqshılıqqa hám shorlanıwǵa shıdamlı sortlardı sınaw, jabıq agrobiosistemalar modeli), materialtanıw (jıllılıqtı toplaw hám basqarıw ushın materiallar, gezleme hám talshıqlardı sınawdan ótkeriw) usınıs etildi.

2028-jılı Samarqand qalasında kosmos boyınsha xalıqaralıq kongress ótkeriw máselelerine de toqtap ótildi. Onda AQSh, Evropa, Qıtay, Hindstan, Rossiya hám basqa da mámleketlerdiń jetekshi kosmoslıq shólkemleri qatnasıwǵa qızıǵıwshılıq bildirgen.

Juwapkerlerge bul xalıqaralıq ilajǵa joqarı dárejede tayarlıq kóriw tapsırıldı.
Prezentaciya juwmaǵında Prezident Shavkat Mirziyoev jasalma joldaslar joybarları hám milliy kosmonavttı tayarlaw boyınsha esap-sanaq hám ámeliy usınıslardı puqta islep shıǵıw boyınsha juwapkerlerge tiyisli tapsırmalar berdi.