2026-jılǵa mólsherlengen reformalar baǵdarlamaları hám Mámleketlik baǵdarlama joybarları tanıstırıldı

Atap ótilgenindey, bul joybarlar aldınǵı sırt el tájiriybesi tiykarında pútkilley jańa qatnas tiykarında islep shıǵıldı. Olarda Prezidentimiz tárepinen belgilep berilgen bıyılǵı jıldaǵı mámleketlik siyasattıń tiykarǵı baǵdarları hám maqsetli kórsetkishleri jáne olardı ámelge asırıwdıń anıq mexanizmleri belgilenbekte.

Reformalar baǵdarlamaları hám Mámleketlik baǵdarlamanıń bir-birinen ózgeshe táreplerine ayrıqsha toqtap ótildi.
Reformalar baǵdarlamaları mámleketimiz basshısınıń xalqımız hám Oliy Majliske Múrájatında alǵa qoyılǵan baslamalar hám 2026-jıl ushın eń tiykarǵı reformalardı qamtıp alǵan.

Olar máhálleler infrastrukturasın jetilistiriw hám olarǵa Jańa Ózbekstan kórinisin alıp kiriw, ekonomikanı texnologiyalıq hám innovaciyalıq ósiw modeline ótkeriw hám ishki bazarda talaptı xoshametlew, kásiplerdi rawajlandırıw hám jańa miynet bazarı arxitekturasın jaratıw, ekologiyalıq teńsalmaqlılıqtı támiyinlew hám suwdan aqılǵa uǵras paydalanıwdı shólkemlestiriw jáne mámleketlik basqarıw hám sud-huqıq sistemasın jetilistiriw, jámiyette awızbirshilikti támiyinlew arqalı onı joqarılatıw bolıp esaplanadı.

Bul baǵdarlamalarda “hújjet islep shıǵıw”dan “nátiyjege erisiw” principine ótilmekte. Hár bir baslamanı ámelge asırıw mexanizmleri hám jıl aqırına mólsherlengen orınlaw nátiyjeleri boyınsha KPI belgilengen. Baǵdarlamalar tikkeley ámel etiw mexanizmine iye hám ayırım baslamalar boyınsha óz aldına hújjet qabıl etiwdi talap etpeydi. Hár bir reformalar baǵdarlamasınıń orınlanıwı ushın jeke juwapker bolatuǵın juwapker basshı hám muwapıqlastırıwshı mámleketlik shólkem belgilenbekte.

“Ózbekstan – 2030” strategiyasın “Máhálleni rawajlandırıw hám jámiyetti ilgerletiw jılı”nda ámelge asırıwǵa baylanıslı Mámleketlik baǵdarlamada bolsa strategiyanıń 2026-jıl ushın belgilengen maqsetli kórsetkishleriniń orınlanıwı shólkemlestiriledi. Baǵdarlama menen 337 bántten ibarat ámeliy ilajlar rejesi tastıyıqlanbaqta. 2026-jılı tarawlar kesiminde eń áhmiyetli 59 normativlik-huqıqıy hújjet joybarı hám eń áhmiyetli strategiyalıq reformalardı názerde tutatuǵın 12 normativlik-huqıqıy hújjet joybarı islep shıǵıladı.

Joybarlardı islep shıǵıwda jámiyetshiliktiń pikirin esapqa alıwǵa ayrıqsha itibar qaratılǵanı atap ótildi. Mámleketlik baǵdarlama keń jámiyetshiliktiń dodalawınan ótkerilip, 23-yanvar – 1-fevral kúnleri ǵalaba xabar quralları hám internet tarmaqlarında keńnen úgit-násiyatlandı. Internette joybar menen 5 millionnan aslam paydalanıwshı tanısıp, 22 mıńnan aslam pikir-usınıslar bildirildi.

Joqarı oqıw orınları hám mámleketlik uyımlarda 50 den aslam dodalaw ilajları ótkerilip, 10 mıńǵa shamalas student, professor-oqıtıwshılar hám mámleketlik xızmetkerler qatnastı. Sırt eldegi watanlaslar menen de ayrıqsha sóylesiwler shólkemlestirilip, bir qatar qosımsha baslamalar bildirildi.

Tallawlar nátiyjesinde konstruktivlik dep tabılǵan 1000 ǵa shamalas usınıs saylap alınıp, Mámleketlik baǵdarlama joybarına kirgizildi.

Sonıń ishinde, hayal-qızlar hám balalarǵa zorlıq ushın jazanı kúsheytiw, pedofillik ushın ómirlik erkinen ayırıw jazasın engiziw, ipoteka hám elektromobil satıp alıw ushın kredit mexanizmlerin jetilistiriw, qayta tikleniwshi energiya derekleriniń úlesin 30 procentke jetkeriw, korrupciyaǵa qarsı gúresiwdi jańa basqıshqa alıp shıǵıw, jınayat isleri boyınsha sudlarda xalıq wákilleri kollegiyasınıń qatnasıwın jolǵa qoyıw sıyaqlı baslamalar qollap-quwatlandı.

Sonday-aq, máhálle qarjıları jumsalıwı boyınsha ashıq esap beriwdi kúsheytiw, máhállelerde ishki jollar, piyadalar hám velojollardı shólkemlestiriw, biznes-inkubatorlar jaratıw, sanaat zonaları janında kásiplik qayta tayarlaw orayların ashıw, terek keskeni ushın juwapkershilikti qatańlastırıw, energiya nátiyjeliligi boyınsha KPI engiziw, utilizaciyalaw hám qayta islew shınjırın jolǵa qoyıw sıyaqlı usınıslar qızıqlı dep tabıldı.

Bunnan tısqarı, AQSh, Germaniya, Túrkiya, Franciya, Kanada, Koreya, Yaponiya, Shveciya, Portugaliya hám Qazaqstanda watanlaslar qatnasıwında dodalawlar shólkemlestirilip, 60 qa shamalas qosımsha usınıslar alındı.

Sırt eldegi watanlaslar mámleketlik emes mekteplerdiń jumısın rawajlandırıw ushın anıq, turaqlı hám ashıq-aydın licenziyalaw hám qadaǵalaw mexanizmlerin engiziw, ámeliyat procesinde oqıwshılardı baǵdarlawshı kárxana qánigeleri ushın xoshametlew hám juwapkershilik sistemasın engiziw, jatır moynı hám kókirek bezi ragi boyınsha qáwip toparların anıq belgileytuǵın birden-bir sanlı skrining sistemasın engiziw, jeńilletilgen kreditlerdi ajıratıwda “nátiyjege baylanıslı jeńillik” (performance-based subsidy) modelin, eksport etiwshi kárxanalar ushın bolsa “Export-as-a-service” modelin engiziw, yaǵnıy logistika, bajıxana, sertifikatlaw, marketing hám tólem máselelerin birden-bir operator arqalı kompleksli xızmet sıpatında usınıw, advokatlar ushın elektron náwbet alıw procesi boyınsha qollanba hám videoqollanbalar tayarlaw sıyaqlı usınıslardı bildirgen.

Baǵdarlamalardıń orınlanıwın qarjılandırıwǵa jámi 250,5 trillion sum ajıratılıwı hám 50,4 milliard dollar qarjı tartılıwı názerde tutılǵan.
Mámleketlik baǵdarlamanıń orınlanıwı boyınsha Ádillik ministrligi hám Esap palatası turaqlı monitoring alıp baradı, Ministrler Kabineti hár sherekte orınlanıwdı dodalap baradı, hár yarım jılda Oliy Majlis Nızamshılıq palatasına esabat hám hár ayda Prezidentke málimleme kirgizip barıladı.

Hár bir reformalar baǵdarlaması ushın biriktirilgen juwapkerler hár sherekte orınlaw jaǵdayı boyınsha Prezidentke málimleme berip baradı. Bas ministr reformalar baǵdarlamalarındaǵı baslamalardıń ámelge asırılıwı hám qarjılandırılıwın muwapıqlastırıp, orınlanıwın qatań qadaǵalaw ushın juwapker boladı.

Mámleketimiz basshısı prezentaciya etilgen joybarlar menen tolıq tanıstı, tiyisli pármanǵa qol qoyıp, reformalar baǵdarlamaları hám “Máhállelerdi rawajlandırıw hám jámiyetti joqarılatıw jılı” mámleketlik baǵdarlamasın tastıyıqladı. Barlıq reforma hám ilajlar, bárinen burın, adamlardıń turmısında anıq nátiyje beriwi – jańa jumıs orınlarınıń kóbeyiwi, dáramatlardıń ósiwi hám xalıqtıń razılıǵında óz kórinisin tabıwı zárúr ekenligi atap ótildi.