Ferǵana wálayatında reformalar nátiyjeliligi hám keleshektegi áhmiyetli wazıypalar dodalandı

Májilis aldında sońǵı jıllarda Ferǵana wálayatında ámelge asırılǵan sistemalı reformalardıń nátiyjeleri tallandı. Jer hám qazılma baylıqlardıń sheklengenine qaramastan, aymaqta ekonomikanı diversifikaciyalaw, sanaat, awıl xojalıǵı, xızmetler hám málimleme texnologiyaları tarawlarında turaqlı ósiw támiyinlendi.

Sonıń ishinde, xalıqtıń jan basına jalpı aymaqlıq ónimniń kólemi 2017-jılı 7 million sumdı quraǵan bolsa, 2025-jılǵa kelip, 26,6 million sumǵa jetti yamasa 3,8 esege ósti. Bul ekonomikalıq belsendilik hám xalıqtıń dáramatları sezilerli dárejede artqanın kórsetedi.

Bántlik hám sociallıq kórsetkishler boyınsha da unamlı pát atap ótildi. Ótken jılı 519 mıń xalıqtıń bántligi támiyinlenip, olardıń dáramatları arttırıldı hám 53 mıń shańaraq kámbaǵallıq reestrinen shıǵarıldı. Endi 2026-jıldıń aqırına shekem jumıssızlıqtı 3 procentke, kámbaǵallıqtı bolsa 2,7 procentke azaytıw názerde tutılmaqta.

Investiciya hám sırtqı sawda tarawında da sezilerli ósiwge erisildi. Wálayatta 26 iri, 357 orta hám kishi investiciyalıq joybarlar iske qosılıp, derlik 3 milliard dollar sırt el investiciyası ózlestirildi. Eksport kólemi izbe-iz arttı, eksportshı kárxanalardıń sanı keńeydi.
Awıl xojalıǵında ótken jılı 94,3 mıń gektar maydanda 816,7 mıń tonna ǵálle jetistirilip, ortasha zúráátlilik 86,6 centnerdi quradı.

Paxtashılıqta 72 mıń gektarda 324 mıń tonna ónim alındı. Miywe-ovoщ eksportı 403 million dollarǵa jetti. Qıytaq jer hám ıqsham ıssıxanalar arqalı mıńlaǵan shańaraqlar turaqlı qosımsha dáramat deregine iye boldı.
Májiliste Ferǵana wálayatın rawajlandırıwdıń tiykarǵı wazıypaları belgilep alındı.

Atap ótilgenindey, wálayatta investiciya hám eksport kólemlerin izbe-iz arttırıw, jumıssızlıq hám kámbaǵallıqtı qısqartıw máselelerine sistemalı jáne mánzilli qatnas jasaw talap etiledi. Usı maqsette Ferǵana wálayatı ushın ulıwma bahası 8,2 milliard dollar bolǵan jańa iri joybarlar paketi qáliplestirilgen.
Usı jıldıń ózinde ulıwma bahası 4,2 milliard dollar bolǵan joybarlardı iske qosıw rejelestirilgen. Bul joybarlardıń 2,7 milliard dolları sanaat, 210 million dolları awıl xojalıǵı, 1,2 milliard dolları servis hám turizm tarawlarına tuwra keledi.

Sonıń menen birge, ótken jılları sanaat maqsetleri ushın ajıratılǵan 2 mıń 115 gektar jer maydanınıń 40 procenti elege shekem aukcionǵa shıǵarılmaǵanı atap ótildi. Qosımsha jer ajıratıwdan aldın bos jerlerdiń infrastrukturasın jaqsılaw hám olardı isbilermenlerge usınıs etiw arqalı investiciyalıq joybarlardı jaylastırıw nátiyjeliligin arttırıw zárúr ekenligi atap ótildi.

Bántlik hám kámbaǵallıqtı qısqartıw boyınsha anıq maqsetli kórsetkishler belgilendi. Usı jılı jámi 595 mıń, sonnan 98 mıń turaqlı jumıs ornın jaratıw, 423 mıń xalıqtı dáramatlı etiw jáne 74 mıń jumıs ornın “sayadan” shıǵarıw rejelestirilgen.
Buvayda, Uchkwprik, Quva, Wzbekiston, Yozyovon rayonları jáne Marǵılan, Ferǵana, Qoqand hám Quvasay qalaların jumıssızlıq hám kámbaǵallıqtan jıraq aymaqlarǵa aylandırıw wazıypası qoyıldı. Usı maqsette 7 rayon hám 132 “awır” máhállede infrastrukturanı jaqsılaw arqalı jumıssızlıq hám kámbaǵallıqtı eki esege qısqartıw ushın 800 milliard sumnan aslam qarjı ajıratıladı. Sonday-aq, bankler tárepinen “Máhálle joybarı” baǵdarlaması sheńberinde 1,4 trillion sumlıq kredit resursları qaratıladı.

Awıl xojalıǵında miywe-ovoщ ónimlerin shiyki halda emes, joqarı qosımsha qunǵa iye tayar ónim sıpatında satıw arqalı eksport kólemin 510 million dollarǵa jetkeriw wazıypası belgilendi. Sonıń ushın, Ferǵana hám Quvasay qalalarında qıtaylı investorlardıń qatnasıwında ulıwma bahası 175 million dollar bolǵan agrologistika orayları qurıladı.
Ózbekstan, Besharıq hám Altıarıq rayonlarında sharwashılıq, sútti qayta islew hám násilli shóje jetistiriw baǵdarlarında ulıwma bahası 21 million dollar bolǵan 4 joybardı iske qosıw rejelestirilgen.

Sociallıq infrastrukturanı xalıqtıń ósiwine sáykes halda rawajlandırıw zárúr ekenligi atap ótildi. Bıyıl 33 mekteptiń qurılısı hám rekonstrukciyası ushın 343 milliard sum ajıratılmaqta. Aymaq basshılarına qosımsha imkaniyatlardı iske qosıw hám jeke menshik sektordı tartıw arqalı infrastrukturanı jaqsılaw wazıypası qoyıldı.
Turizm potencialın keńeytiw maqsetinde Swx rayonında Ugam hám Miraki tájiriybesi tiykarında turizm kompleksleri shólkemlestiriledi, Ferǵana rayonında iri turistlik-rekreaciyalıq zona qurıladı. Qoqand qalasında jańa turizm orınları qurılıp, mádeniy miyras obektleri boylap sayaxat marshrutları jolǵa qoyıladı.

Sonday-aq, Qoqand qalasındaǵı 17 mámleketlik uyımdı “Jańa Ózbekstan” massivine kóshiriw arqalı xalıqqa barlıq mámleketlik xızmetlerdi bir jerde kórsetetuǵın qolaylı hám nátiyjeli sistemanı qáliplestiriw wazıypası belgilendi.
Málimleme texnologiyaları tarawında Ferǵana wálayatı ekonomikasınıń áhmietli drayveri sıpatında IT baǵdarın jedel rawajlandırıw rejelestirilgen.

Házirgi kúnde wálayatta 139 IT-park rezidenti jumıs alıp barmaqta. Usı jılı málimleme texnologiyaları xızmetleriniń kólemin 3,5 trillion sumǵa, eksporttı bolsa 30 million dollarǵa jetkeriw maqset etilgen. Ferǵana qalasında jańa IT-park hám kompleksi, Marǵılan qalasında xalıqaralıq IT joqarı oqıw ornı, sonday-aq, Ferǵana qalasında “Muhammed al-Xorezmiy miyrasxorları” joybarın iske qosıw rejelestirilgen.

Mámleketimiz basshısı májilis juwmaǵında hár bir joybardı xalıqtıń bántligi hám turmıs dárejesin arttırıw menen úzliksiz baylanıstırıp ámelge asırıw, belgilengen wazıypalardıń orınlanıwı ushın juwapkerlerdiń jeke juwapkershiligin kúsheytiw boyınsha anıq tapsırmalar berdi.