Máhállelerde jumıssızlıq hám kámbaǵallıqtı azaytıw boyınsha alıp barılıp atırǵan jumıslar haqqında málimleme berildi

Sın kózqaras ruwxında ótken májiliste iske qosılmay atırǵan imkaniyatlar, bul baǵdardaǵı kemshilikler kórsetip ótildi.
Májiliste “máhálle jetiligi” aǵzalarınıń jumıs nátiyjeliligin bahalaw ushın anıq ólshemler joq ekenligi, olardıń tiykarǵı wazıypası bolǵan jumıssızlıq hám kámbaǵallıqtı qısqartıwda juwapkershiligin jáne de arttırıw zárúr ekenligi atap ótildi. “Jetilik”tiń jumısı xalıqtıń bántligi hám dáramatlarınıń artıwında tikkeley sáwleleniwi shárt ekenligi, bul baǵdarda mánzilli hám nátiyjege baǵdarlanǵan jumıslardı kúsheytiw zárúr ekenligi atap ótildi.
Máhállelerde kámbaǵallıqtı hám jumıssızlıqtı qısqartıwda, bárinen burın, olardıń mashqalaları hám “ósiw noqatları”n anıqlap, sistemalı ilajlardı islep shıǵıw hám ámelge asırıw tapsırıldı. Sonday-aq, xalıqtıń múrájatların tikkeley máhálleniń ózinde sheshiwge itibardı kúsheytiw wazıypası qoyıldı.
Awır kategoriyadaǵı máhálleler boyınsha ámelge asırılıp atırǵan jumıslar kórip shıǵıldı. Bul aymaqlarǵa ayrıqsha itibar qaratıp, infrastruktura, elektr támiynatı, internet tarmaǵı, qıytaq jerden paydalanıw imkaniyatların keńeytiw tapsırıldı.
Usı jılı mámleketimizde kámbaǵallıq dárejesi 8,9 procentten 6 procentke túsiwi kútilmekte. Kelesi jılı bul kórsetkishti 4,5 procentke shekem qısqartıw maqset etilgen.
Onıń ushın máhállelerde jumıslardı shólkemlestiriwge kompleksli qatnas jasaw, turaqlı bántlik baǵdarındaǵı xızmetlerdiń qamtıp alıwın keńeytiw, dáramat dereklerin jaratıw, xalıqtı kásip-ónerge oqıtıw hám isbilermenlikke tartıw boyınsha wazıypalar belgilep berildi.
Hár bir kámbaǵal shańaraq boyınsha onıń real imkaniyatları hám tileklerin esapqa alǵan individual rejelerdi islep shıǵıw áhmiyetli ekeni atap ótildi.
Joybarlaw kózqarası sheńberinde “Bántlik uyımları – jumıs beriwshilerdiń sherigi”, “Teń imkaniyat – inklyuziv bántlik”, “Turaqlı keleshekke qaray”, “20 jergilikli brend”, “Bir kontur – bir ónim”, “Máhállede isbilermenlikti rawajlandırıw,” “Ijara jer hám qıytaq jerde suw támiynatın jaqsılaw,” “Eski baǵlardı jańalaw,” “1 mıń gektar miyweli baǵ,” “Eksportshı kooperativler” sıyaqlı baǵdarlamalar menen 1 million kámbaǵal xalıqtı qamtıp alıw rejelestirilgen.
Kámbaǵallıqtı hám jumıssızlıqtı azaytıwda máhállelerde kishi hám orta joybarlardı ámelge asırıw, sonıń ishinde, shegara hám anklav aymaqlarda infrastrukturanı jaqsılaw, kúni-túni isleytuǵın kósheler, turistlik máhálleler, mikro sanaat orayların shólkemlestiriw, jaǵalıq hám jol boyı infrastrukturasın rawajlandırıw ilajları tanıstırıldı.
Bántlik baǵdarlamasınıń 2025-jıldaǵı orınlanıwı hám 2026-jılǵı baǵdarlamanı qáliplestiriw, rásmiy emes bántlikti qısqartıw máseleleri de kórip shıǵıldı.
Prezidentimiz juwapkerlerge máhállelerdegi máselelerdi mánzilli sheshiw, xalıqtıń talapları tiykarında ámeliy jumıslardıń nátiyjeliligin arttırıw, bántlik hám kámbaǵallıqtı qısqartıw baǵdarındaǵı wazıypalardıń joqarı juwapkershilik penen orınlanıwın támiyinlew boyınsha tapsırmalar berdi.