Qashqadaryo viloyati Yakkabog' tumani hokimligi

Assalomu alaykum hurmatli Yakkabogʻliklar va tumanimiz mehmonlari! Hammamizga maʼlumki muhtaram Prezidentimizning joriy yil 3 yanvar kuni “2025 yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi 1-son qarorlari qabul qilindi. Mazkur qaror bilan mahallalarda xavfsiz muhitni yaratishning tashkiliy-profilaktik asoslarini zamon talablariga moslashtirish, sodir etiladigan qonunbuzilishlarning asl omillarini oʻz vaqtida aniqlash va kompleks chora-tadbirlar bilan manzilli bartaraf etish orqali jinoyatchilikning barvaqt oldini olish tizimining samaradorligini yanada oshirish dolzarb vazifa sifatida belgilandi. Qaror ijrosini taʼminlash maqsadida tuman hokimligi, Prokuratura, Ichki ishlar boʻlimi, tuman Qoʻriqlash boʻlimi va boshqa mutasaddi tashkilotlarning qoʻshma qarori tasdiqlanib, mavjud 63 ta mahallalarda havfsiz muhitni yaratish va huquqbuzarliklarning barvaqt oldini olishga qaratilgan manzilli “Yoʻl xarita”lari ishlab chiqildi hamda ijro uchun masʼullar belgilandi. Shu bilan birga, “Obod va xavfsiz mahalla” tamoyili asosida mahallalarda ijtimoiy profilaktika tadbirlari amalga oshirilishi lozim boʻlgan 4573 nafar shaxslarning roʻyxatlari shakllantirilib, ularga doir maʼlumotlar “mahalla yettiligi”ga taqdim etilishi natijasida bugungi kunga qadar 1507 nafar fuqarolarning muammolari oʻrganilib ijobiy hal etildi va qoʻshma xulosalar tuzildi. Jamoat joylarida xavfsiz muhitni yaratish, shaxs hayoti, sogʻligʻi va mol-mulkiga har qanday tajovuzlarning oldini olish maqsadida zamonaviy raqamli texnologiyalar va texnik vositalarni keng joriy etish maqsadida mahallalarning kirish-chiqish joylari, koʻp qavatli uylar, savdo markazlari, bozorlar hamda maktablarga jami 520 ta zamonaviy turdagi videokuzatuv kameralari, mahallalardagi 57 ta koʻp qavatli uylarning eshiklariga zamonaviy domofon komplekslari, 13 ta koʻp qavatli uylarning kirish yoʻllari oldiga tashvish tugmalari oʻrnatildi, Quriqlash xizmati tomonidan 423 ta xonadonlar, 44 ta savdo va maishiy xizmat koʻrsatish obʼektlari texnik quriqlovga olindi. Qolaversa, tumandagi masʼul rahbarlar tashabbusi bilan mahallalarda 45 ta “namunaviy xavfsiz koʻcha” va 99 ta “namunaviy xavfsiz yoʻlak”larni tashkil etilishi taʼminlandi. Hurmatli fuqarolar huquq tartibot va boshqa masʼul idoralar bilan hamkorlikda erishilgan ijobiy natijalar bilan bir qatorda, ayrim turdagi jinoyatlar salmogʻi oshganligini kuzatishimiz mumkin. Birgina misol tariqasida, joriy yilning 5 oyi davomida qayd etilgan jami 151 ta jinoyatlarning 70 tasi yoki 46,3 foizini axborot texnologiyalari vositasida yaʼni sodda qilib aytganda kibermakonda sodir etilgan jinoyatlar hissasiga toʻgʻri kelishini koʻrishimiz mumkin. Ushbu jinoyatlarning sodir etilish sabab va omillarini tahlil qilganimizda fuqarolarimiz oson va mumay daromad orttirish maqsadida internetdagi moddiy yordam, onlayn kredit, yutuqli oʻyin gʻolibi kabi aldovlar bilan yuborilgan soxta havolalarga kirishlari, telefon qoʻngʻiroqlari orqali notanish shaxsga “SMS kodni” berishlari yoki onlayn doʻkonlar orqali “sotuvchi” yoki “xaridor” sifatida firibgarlar tuzogʻiga tushishlari oqibatida bank plastik kartalaridagi pul mablagʻlarini oʻzlashtirish holatlari koʻplab uchramoqda. Ushbu murojaatim orqali siz aziz fuqarolardan, - ijtimoiy tarmoqlar hamda elektron pochta manzillari orqali yuborilgan shubhali havolalarga kirmaslikni, onlayn doʻkonlar orqali mahsulotni qabul qilmasdan yoki koʻrsatilmagan xizmat uchun oldindan toʻlovni amalga oshirmaslikni hamda shaxsiy maʼlumotlarni begona shaxslarga taqdim etmaslikni va ijtimoiy tarmoqlarga joylashtirmaslikni; - oʻgʻirlik va boshqa turdagi jinoyatlarni oldini olish, shuningdek, oʻz xonadonlaringiz hamda boshqa mol-mulklaringizni xavfsizligini taʼminlash maqsadida tumandagi Qoʻriqlash boʻlimining texnik qoʻriqlov pultiga ulanishingizni; - hujjatsiz saqlanayotgan ov qurollarini ariza orqali tuman Ichki ishlar boʻlimiga topshirishni yoki qonuniylashtirishni; - mast holda avtotransport vositalarini boshqarmaslik, buning ogʻir oqibatlarini har bir fuqaro anglab yetishi va yon atrofdagilarga ham tushuntirishini soʻrab qolaman. Hurmatli tumandoshlar! Murojaatim soʻngida sizlarni ogohlikka chaqirgan holda aholi xavfsizligiga turli xatarlar boʻyicha, shuningdek boshqa shaxslar tomonidan sodir etilayotgan huquqbuzarliklar va jinoyatlar toʻgʻrisida maʼlumotlar boʻlsa 102-qisqa raqami orqali yoki “Ishonch telefon”larimizga murojaat qilishingizni soʻraymiz. Albatta xabar berganlarning shaxsiga doir maʼlumotlar sir saqlanishiga kafolat beramiz.