YUNESKO bilan hamkorlikda Ayollar akademiyasini tashkil etish masalasi muhokama qilindi
2025-11-05 11:45:00 / Yangiliklar
Suhbat chog‘ida O‘zbekiston va YUNESKO o‘rtasida xotin-qizlarni qo‘llab-quvvatlash, gender tenglikni ta’minlash hamda ayollarning ijtimoiy-iqtisodiy faolligini oshirish yo‘nalishidagi hamkorlikni yanada mustahkamlash masalalari muhokama qilindi.
Uchrashuvning asosiy mavzusi Prezidentimiz Shavkat Mirziyoyevning YUNESKO Bosh konferensiyasining 43-sessiyasida ilgari surgan muhim tashabbusi — xotin-qizlar yetakchiligi bo‘yicha YUNESKO Akademiyasini tashkil etish g‘oyasi bo‘ldi.
Uchrashuvda mazkur Akademiyani tashkil etish konsepsiyasi, uning xalqaro platforma sifatida faoliyat yuritish imkoniyatlari va bu yo‘nalishdagi qo‘shma dasturlarni amalga oshirish masalalari atroflicha muhokama qilindi.
Shuningdek, ayollarning ta’lim, fan, madaniyat va raqamli texnologiyalar sohasidagi ishtirokini kengaytirish, ularning yetakchilik salohiyatini oshirish va ilg‘or tajribalarni joriy etish bo‘yicha amaliy yo‘nalishlar belgilab olindi.
Uchrashuv do‘stona va konstruktiv ruhda o‘tib, O‘zbekiston va YUNESKO o‘rtasidagi hamkorlikni yangi bosqichga olib chiqish, jumladan, “Ayollar akademiyasi” tashabbusini amalga oshirish bo‘yicha o‘zaro kelishuvlarga zamin yaratdi.