“Sog‘lom oila uchun birlashaylik” mavzusi bilan mahallalarda eng kami 4 mln. nafar xotin-qizlarni sportga jalb etish ishlari tashkil etilmoqda.
2025-07-10 14:05:00 / Yangiliklar
Oldimizda juda muhim vazifalar turibdi:
1. Har bir tuman va shaharda “Oila va xotin-qizlar” maskanlari faoliyati to‘liq yo‘lga qo‘yiladi. Oilalardagi maʼnaviy muhit sog‘lomligini taʼminlash bilan bog‘liq kompleks xizmat ko‘rsatiladi.
2. Adliya vazirligi bilan hamkorlikda raqamlashtirish tizimini joriy etish orqali nikohga kirish uchun ariza bergan shaxslar, yolg‘iz onalik, otalikni belgilash hamda oilaviy ajrim holatlari qayd etilgan fuqarolar to‘g‘risida elektron axborot almashinuvi mexanizmi yo‘lga qo‘yiladi. Ushbu tizimni amalga oshirish orqali inson omili taʼsiri hamda qo‘l mehnati avtomatlashtiriladi.
3. “Farovon oila sari” loyihasini amalga oshirish orqali, yil oxiriga qadar har oyda har bir mahalladan 4 tadan ibratli oilalarni aniqlash tizimini joriy etish hisobiga ibratli oilalar safi 227 mingga kengayadi.
4. “Oqila ayollar” harakati, “Ayol maʼrifati” kabi jamoatchilik tuzilmalari faoliyatidan samarali foydalanish va ularning taʼsirini oshirish choralari ko‘riladi.
5. Oila mustahkamligini taʼminlashga qaratilgan maʼrifiy loyihalar amalga oshiriladi.
6. Oilaviy ajrim, oilaning qonuniyligi, erta va yaqin qarindoshlar nikohini oldini olishga qaratilgan mahallalarda “svetofor” tizimi asosida har bir nizoli oila bilan aniq mexanizmlar asosida ishlash va nizoni bartaraf etishga qaratilgan tadbirlar, ilmiy loyihalar amalga oshiriladi.
7. Xotin-qizlar o‘rtasida “Sog‘lom oila uchun birlashaylik!” sport-sog‘lomlashtirish tadbirlari o‘tkaziladi.
8. Nodavlat notijorat tashkilotlari hamda fuqarolik jamiyati institutlari bilan hamkorlikda oila va xotin-qizlar masalasiga oid huquqiy savodxonlik dasturlari amalga oshiriladi.
9. Xotin-qizlar o‘rtasida milliy qadriyatlarni mustahkamlash borasidagi taʼsirchan chora-tadbirlar, “Nafosat” festivali o‘tkaziladi, “Oila-Kent”, “Ayol maʼrifati”, “Joziba”, “Sharqona” kabi media-loyihalar joriy etiladi.
10. Mahallalardagi “Salomatlik maktablari” ishini yangi yondoshuvlar asosida tashkil etish orqali xotin-qizlarning reproduktiv salomatlik qoidalariga rioya etishi targ‘ib etiladi.
11. Oila qadriyati va ayollarning jamiyatdagi o‘rnini oshirishga qaratilgan filmlar yaratish bo‘yicha buyurtmalar beriladi.
12. Ijtimoiy-maʼnaviy muhitni barqarorlashtirish va milliy qadriyatlarni targ‘ib etishga qaratilgan tadbirlar o‘tkaziladi.
13. Qo‘mitaning ijtimoiy tarmoqlarida “Har bir oilada, har bir ayol yonidamiz” mediasahifasi joriy etilib, ayollarning oilaviy muammolari yechimiga yordam berish choralari ko‘riladi.