O‘zbekiston Respublikasi Oila va xotin-qizlar qo‘mitasi

Mazkur forumda O‘zbekiston Respublikasi Bosh vazir o‘rinbosari – Oila va xotin-qizlar qo‘mitasi raisi Zulayho Maxkamova ishtirok etib, davlatimizning oila siyosatiga oid ma’ruzasi bilan ishtirokchilar e’tiborini tortdi. U o‘z nutqida oila masalasi Yangi O‘zbekiston davlat siyosatining eng ustuvor yo‘nalishlaridan biri ekanini alohida ta’kidladi.
Z.Maxkamova tomonidan ta’kidlanganidek, O‘zbekistonda adolatli, ochiq va insonparvar jamiyat qurish yo‘lida oilaga qaratilayotgan e’tibor har qachongidan ham ortib bormoqda. Yangi O‘zbekiston strategiyasida oilaga “insonga insonparvarlik, yaxshi xulq, ta’lim-tarbiya va ijobiy xislatlarni o‘rgatuvchi maktab” sifatida ijtimoiy maqom berilgan. Bu faqat so‘z bilan emas, amaliy ishlar bilan ham tasdiqlanmoqda.
Mamlakatimizda amalga oshirilayotgan islohotlar, jumladan, BMTning Barqaror rivojlanish maqsadlari, Xotin-qizlarga nisbatan kamsitishlarga barham berish to‘g‘risidagi Konvensiya hamda boshqa 20 ga yaqin xalqaro huquqiy hujjatlarning ratifikatsiya qilinishi – O‘zbekistonning oila va xotin-qizlar masalasiga jiddiy va tizimli yondashuvini namoyon etmoqda.
Jahon banki tahlillariga ko‘ra, O‘zbekiston gender tengligiga erishish sohasida eng katta muvaffaqiyatga erishgan besh davlatdan biri sifatida e’tirof etilgani – bu yo‘ldagi yutuqlarning xalqaro miqyosda tan olinishiga yaqqol misoldir.
Bosh vazir o‘rinbosari ma’ruzasida oila institutini mustahkamlashga qaratilgan qator ustuvor yo‘nalishlarga alohida e’tibor qaratdi. Jumladan:
•  Uy-joyga muhtoj xotin-qizlarni qo‘llab-quvvatlash, ularning daromadini oshirish, turmush va mehnat sharoitlarini yaxshilash;
•  Tazyiq va zo‘ravonlikka qarshi murosasizlik muhitini shakllantirish, huquq va manfaatlarni himoya qilish;
•  Og‘ir ijtimoiy ahvolda qolgan oila va ayollarga manzilli ijtimoiy-huquqiy, psixologik yordam ko‘rsatish;
•  Oilaviy qadriyatlarni asrash, ma’naviy muhitni yaxshilash, ibratli oilalar tajribasini ommalashtirish;
•  Xotin-qizlar o‘rtasida sog‘lom turmush tarzini keng targ‘ib etish.
        Ma’ruzada O‘zbekiston va Turkiya o‘rtasidagi munosabatlarga ham alohida to‘xtalib o‘tdi. Uning ta’kidlashicha, bu ikki qardosh davlat o‘rtasidagi aloqalar oxirgi yillarda siyosiy, iqtisodiy va ijtimoiy sohalarda yangi bosqichga ko‘tarilgan. Ayniqsa, turmush tarzi va oilaviy qadriyatlar bo‘yicha hamkorlikning mustahkamlanishi kelgusida samarali natijalarni keltirishi shubhasiz.
           Xalqaro oila forumidagi ma’ruza orqali  O‘zbekistonda oila institutini mustahkamlash, xotin-qizlar va bolalarni har tomonlama qo‘llab-quvvatlash bo‘yicha amalga oshirilayotgan keng qamrovli islohotlarni yana bir bor jahon hamjamiyatiga namoyon etildi