O‘zbekiston Respublikasi Oila va xotin-qizlar qo‘mitasi

 Nizomga muvofiq, nomzod oilalar tanlanayotganda quyidagilarga alohida e’tibor qaratiladi:
oilada va jamoat joylarida kutubxonalar tashkil etgan, oila a’zolari ilmli, ziyoli bo‘lgan, shuningdek, ilmiy darajaga ega bo‘lgan, risola, kitob, qo‘llanma va asarlar yaratgan hamda ilm-fan, ta’lim, adabiyot rivojiga hissa qo‘shib kelayotgan, farzandlari turli nufuzli tanlovlar, musobaqalar, fan olimpiadalarida yuqori natijalarga erishayotgan, aholi, ayniqsa xotin-qizlarga huquqiy, ma’naviy-axloqiy, psixologik, tibbiy maslahatlar berishda faol ishtirok etayotgan, kitobxonlik madaniyatini yuksaltirishda tashabbuskorlik ko‘rsatayotgan oilalar;
ota-onasi qaramog‘idan mahrum bo‘lgan bolalarni farzandlikka, vasiylikka, homiylikka olgan, voyaga yetkazish, o‘qitish va tarbiyalashda ijobiy natijaga erishayotgan, ularning hayotda o‘z o‘rnini topishiga munosib hissa qo‘shayotgan, ijtimoiy ehtiyojmand oilalarni har tomonlama qo‘llab-quvvatlayotgan, aholining muammolarini aniqlash, hal etishga ko‘maklashayotgan, jamoatchilik tomonidan ijobiy tavsiflangan oilalar;
ijodi (artist, me’mor, rassom, haykaltarosh, amaliy bezak ustasi, dizayner, shoir, yozuvchi, bastakor, san’atshunos va h.k.) bilan xalq orasida tanilgan, ushbu sohada milliy va madaniy qadriyatlarni targ‘ib etish orqali jamiyat rivojiga hissa qo‘shayotgan, yoshlarga ijod sohasida ustozlik qilib, ularni Vatanga sadoqat ruhida tarbiyalashga xizmat qilayotgan oilalar;
oilaviy kulolchilik, kosibchilik, naqqoshlik, kashtachilik, chevarchilik, zargarlik va hunarmandchilikning boshqa turlari bilan shug‘ullanib, uning rivojiga hissa qo‘shib kelayotgan, shogirdlar tayyorlagan oilalar;
oilaviy sport bilan shug‘ullanib, respublika va xalqaro darajadagi yutuqlarga erishgan, shogirdlar yetishtirgan, sog‘lom turmush tarzini targ‘ib qilgan, xususan, mahallada sportning rivojlanishi va ommaviyligini oshirishga munosib hissa qo‘shib kelayotgan, jamoatchilik tomonidan ijobiy tavsiflangan oilalar;
oila qurganiga 10 yilgacha bo‘lgan, qaynona, qaynota va boshqa oila a’zolari bilan ahil va hamjihatlikda yashab, ijtimoiy hayotning turli sohalarida yutuqlarga erishayotgan namunali yosh oilalar;
oilaviy qadriyatlarni ulug‘lagan, o‘zi va farzandlari Vatan himoyasi, yurt tinchligini saqlash yo‘lida sadoqat bilan xizmat qilayotgan, uning taraqqiyotiga hissa qo‘shayotgan harbiy xizmatchilar, huquq-tartibot organlarida faoliyat yuritayotgan, jamoatchilik tomonidan ijobiy tavsiflangan oilalar;
oilaviy tadbirkorlik faoliyatini yo‘lga qo‘yib, iqtisodiyotni rivojlantirishga hissa qo‘shayotgan, salmoqli darajada ish o‘rinlari yaratgan, «ustoz-shogird» an’anasini targ‘ib qilgan, innovasion loyihalarini joriy qilib, xotin-qizlarni hamda nogironlarni ish bilan ta’minlagan, ishlab chiqarayotgan mahsulotlari mahalliy, respublika va xalqaro miqyosda e’tirof etilgan, aholini tadbirkorlikka yo‘naltirish, milliy hunarmandchilik turlarini yoshlarga o‘rgatish, ayniqsa tomorqadan daromad topish yo‘llarini ko‘rsatishda, o‘zini o‘zi band qilishda o‘rnak bo‘layotgan, jamoatchilik tomonidan ijobiy tavsiflangan oilalar;
oila a’zolari o‘z faoliyati davomida mahallalar va oilalarda ma’naviy-axloqiy muhitni sog‘lomlashtirish, yoshlarni milliy qadriyatlarimizga hurmat ruhida tarbiyalash, xotin-qizlarning ma’naviyatini yuksaltirish, onalik va bolalikni muhofaza qilishga munosib hissa qo‘shayotgan, sog‘lom turmush tarzini faol targ‘ib etib kelayotgan, xalqimiz salomatligi yo‘lida halol mehnat qilayotgan, yangicha yondashuvlari bilan jamoatchilik orasida munosib e’tirof etilgan, o‘z faoliyatida faol va fidoyi bo‘lgan, yashab turgan xonadoni va mahallasida mevali va manzarali daraxt va gul yetishtirib, ko‘chat tarqatib, «Yashil makon» yaratayotgan, hudud obodligiga yuqori e’tibor qaratgan oilalar.