Samarqandda “Yil ayoli” tanlovining viloyat bosqichi o‘tkazildi
2025-12-04 09:25:00 / Yangiliklar
Jamiyat hayotida faol ishtirok etayotgan, o‘zining mehnati, tashabbusi va ibratli faoliyati bilan alohida ajralib turuvchi xotin-qizlarni qo‘llab-quvvatlash, shuningdek gender tenglikni ta’minlash borasida amalga oshirilayotgan islohotlarni keng targ‘ib etish maqsadida “Yil ayoli” milliy tanlovining Samarqand viloyati bosqichi bo‘lib o‘tdi.
Tanlovning asosiy maqsadi – mamlakatning ijtimoiy-iqtisodiy rivojiga munosib hissa qo‘shayotgan, yuksak ma’naviyatga ega, oila va jamiyatda namuna bo‘la oladigan xotin-qizlarni aniqlash, ularning faoliyatini keng jamoatchilikka tanitish va ilg‘or tajribalarini ommalashtirishdan iborat. Shuningdek, tanlov orqali xotin-qizlar o‘rtasida professionallik, ishbilarmonlik va raqobatbardoshlik muhitini shakllantirish, bilim va mahoratni oshirish uchun zarur shart-sharoit yaratish ko‘zda tutilgan.
Tadbirda Samarqand Oila va xotin-qizlar boshqarmasi boshlig‘i Zebo Saidova, viloyat tashkiliy qo‘mitasi a’zolari, davlat va jamoat tashkilotlari rahbarlari, mahallalarda mehnat qilayotgan xotin-qizlar faollari ishtirok etdilar.
Dastlab, viloyat hokimi o‘rinbosari Zebo Saidova so'zga chiqib, ishtirokchilarga omad tilagan holda, joriy yilning oktyabr oyida o‘tkazilgan shahar va tuman bosqichlarida xotin-qizlar faol ishtirok etganini ta'kidladi. Natijalarga ko‘ra, 170 nafar nomzod safidan saralangan 26 nafar g‘oliba bugungi viloyat bosqichiga yo‘llanma olgani qayd etildi. Shundan so‘ng tanlov ishtirokchilari belgilangan shartlar asosida bellashdi.
Tadbir yakunlariga ko‘ra “Yilning eng vatanparvar ayoli”, “Yilning eng faol olima ayoli”, “Yilning eng ilg‘or tadbirkor ayoli”, “Yilning eng yaxshi ijodkor ayoli”, “O‘z kasbining ustasi” nominatsiyasi bo‘yicha “Yil ayoli”, “Yilning eng kuchli ma’naviy-ma’rifiy targ‘ibotchisi”, “Yilning eng yaxshi uy bekasi”, “Yilning eng jonkuyar ustozi”, “Yilning eng faol sog‘lom turmush tarzi targ‘ibotchisi”, “Yilning eng yangi g‘oyalar tashabbuskori”, “Yilning eng yaxshi IT-dasturchi ayoli” nominatsiyalari bo‘yicha g‘oliblar aniqlandi.
Tanlov g‘olib va sovrindorlari tantanali ravishda taqdirlandi.