O‘zbekiston Respublikasi Oila va xotin-qizlar qo‘mitasi

Tadbirda Oila va xotin-qizlar qoʼmitasi raisining birinchi oʼrinbosari Umida Abdullayeva, vazirlik va idoralarda xotin-qizlar va erkaklar uchun teng huquq va imkoniyatlar kafolatlarini taʼminlash boʻyicha maslahat kengashi aʼzolari, Oila va xotin-qizlar qoʻmitasi tizimida faoliyat yuritayotgan masʼul xodimlar, jamoatchilik va fuqarolik jamiyati institutlari vakillari, xalqaro ekspertlar hamda Osiyo taraqqiyot bankining Oʻzbekistondagi vakolatxonasi mutaxassislari ishtirok etdi.

O’quv-seminar doirasida ish joyida genderga asoslangan zoʻravonlik (GAZ)ning turlari, koʻrinishlari, uni keltirib chiqaruvchi omillar, ularni oldini olish mexanizmlari hamda samarali munosabat bildirish usullari haqida amaliy maʼlumotlar berildi. Shuningdek, xavfsiz, inklyuziv va qoʻllab-quvvatlovchi mehnat muhitini yaratishda rahbarlar, hamkasblar va tashkilotlarning masʼuliyati ham alohida yoritib oʻtildi.

Seminar-trening interaktiv shaklda oʻtkazilib, ishtirokchilar guruhli muhokama, keys-stadi, rolli oʻyinlar va savol-javoblar orqali gender zoʻravonligining psixologik, ijtimoiy va huquqiy jihatlarini oʻrgandilar. Tadbir ishtirokchilari ish muhitida zoʻravonlik holatlarini toʻgʻri aniqlash, huquqiy choralar koʻrish va maxfiy murojaat kanallaridan foydalanish boʻyicha amaliy koʻnikmalarga ega boʻldilar.

Tadbir yakunida mehnat jamoalarida gender zoʻravonligini bartaraf etish, xodimlar uchun huquqiy, psixologik va tashkiliy koʻmak xizmatlarini takomillashtirish, shuningdek, xalqaro tajribalarni mahalliy amaliyotga samarali joriy etish yuzasidan taklif va tavsiyalar ishlab chiqildi.

Mazkur tadbir mamlakatimizda gender tenglikni taʼminlash, xotin-qizlarning huquq va manfaatlarini himoya qilish va xavfsiz mehnat muhitini shakllantirish yoʻlidagi muhim qadam hisoblanadi.