O‘zbekiston Respublikasi Vazirlar Mahkamasining “Suvdan foydalanish va uni muhofaza qilish ustidan davlat nazoratining samaradorligini oshirish bo‘yicha qo‘shimcha chora-tadbirlar to‘g‘risida” 2025-yil 7-iyundagi 352-son Qarori yuzasidan.
2025-06-13 13:15:00 / Rasmiy munosabat
O‘zbekiston Respublikasi Vazirlar Mahkamasining “Suvdan foydalanish va uni muhofaza qilish ustidan davlat nazoratining samaradorligini oshirish bo‘yicha qo‘shimcha chora-tadbirlar to‘g‘risida” 2025-yil 7-iyundagi 352-son Qaroriga 1-ilova bilan tasdiqlangan “Jismoniy shaxslar tomonidan qayd etilgan suv xo‘jaligi sohasidagi huquqbuzarliklar to‘g‘risidagi fotosuratlar va (yoki) videoyozuvlarni qabul qilish, ko‘rib chiqish hamda ularni taqdim etgan shaxslarni rag‘batlantirish tartibi haqida”gi Nizom tartibi ijtimoiy tarmoqlarda turlicha talqin qilinib, ko‘plab foydalanuvchilarda “ichimlik, davolanish va kommunal-maishiy xo‘jalik uchun foydalaniladigan suvga nisbatan tatbiq etildi” degan noto‘g‘ri tushuncha yuzaga kelmoqda.
Nizomning 2-bandiga muvofiq ushbu nizom tartibi O‘zbekiston Respublikasining Ma’muriy javobgarlik to‘g‘risidagi kodeksining 74-moddasini ikkinchi qismida nazarda tutilgan sun’iy suv obyektlaridan olinadigan suvdan foydalanish va suv iste’moli qoidalarini buzish, ya’ni suvdan xo‘jasizlarcha foydalanish va suv obyektlarining holatiga ta’sir e’tuvchi gidrotexnika ishlarini o‘zboshimchalik bilan bajarishga oid ma’muriy huquqbuzarliklarga nasbatan tatbiq etilishi belgilangan.
Bunda, Nizom tartibi sun’iy suv obyektlari – ochiq va yopiq kanallar, kollektor-drenaj tarmoqlari, suv omborlari, sel suvlari to‘planadigan joylar, hovuzlar va boshqalardan olinib, qishloq xo‘jaligi ehtiyojlari uchun ishlatiladigan suvdan xo‘jasizlarcha foydalanish, ya’ni sug‘orish uchun berilgan suvlarni kollektor-drenaj tarmog‘iga va boshqa suv obyektlariga, joy relefiga oqizib yuborish, sug‘orishning agrotexnika talablariga rioya etmay ortiqcha suv isrofgarchiligiga yo‘l qo‘yish, kanallar, kollektorlarga o‘zboshimchalik bilan muvaqqat to‘siqlar o‘rnatish, nasos agregatlari va suv oladigan boshqa inshootlarni qurish kabi huquqbuzarliklarga nisbatan tatbiq etilishi ma’lum qilinadi.