Qoraqalpog‘iston Respublikasi Suv xo‘jaligi sohasida 2028-yilga qadar erishiladigan asosiy ko‘rsatkichlarga oid takliflar taqdimoti bilan tanishildi
2025-09-25 17:10:00 / Majlislar
Qoraqalpog‘iston Respublikasi Suv xo‘jaligi vazirligida bo‘lib o‘tgan taqdimotda “Suvxo‘jaliknazorat” inspeksiyasi boshlig‘i R.Raximov, Suv xo‘jaligi vazirligi hamda tizim tashkilotlari rahbarlari ishtirok etdi.
O‘zbekiston Respublikasi Suv xo‘jaligi vazirligining boshqarma boshlig‘i, Qoraqalpog‘iston Respublikasi Suv xo‘jaligi vazirining o‘rinbosarlari, bo‘lim va sektor rahbarlari tegishli yo‘nalishlar bo‘yicha taqdimotlar qilishdi.
Jumladan, suv tejovchi texnologiyalarni joriy qilish yo‘nalishi bo‘yicha amaldagi holat haqida axborot berilib, 2028-yilga qadar amalga oshiriladigan tadbirlar va erishiladigan asosiy ko‘rsatkichlar muhokama etildi.
Taqdimotda ta’kidlanganidek, suv xo‘jaligi xodimlaridan iborat 64 ta sug‘orish tizimlarini montaj qilish va servis xizmati ko‘rsatish guruhlari faoliyati takomillashtiriladi. Shuningdek, 4 ming 381 gektar paxta maydonlarida tomchilatib sug‘orish texnologiyasini qayta ishga tushirish rejalashtirilgan. Sohada 1 ta ilmiy-tadqiqot, tajriba-konstruktorlik ishlarini amalga oshirish hamda ilmiy asoslangan uslubiy qo‘llanma va tavsiyalar ishlab chiqiladi.
Taqdimotda Davlat dasturi doirasida kanallarni rekonstruksiya qilish (betonlash) loyihasi, suv inshootlarni qayta tiklash, yillik elektr energiyasini va suv resurslarini tejash, ichki sug‘orish tarmoqlarida amalga oshiriladigan tadbirlar muhokama qilindi.
2025-2030-yillarda Qoraqalpog‘iston Respublikasida amalga oshirilishi rejalashtirilgan xorijiy investitsiya loyihalari shimoliy tumanlardagi irrigatsiya tizimlarini rekonstruksiya qilish orqali sug‘oriladigan yerlarni kafolatli suv bilan ta’minlashga imkon yaratadi.
Shuningdek, sug‘orish tizimlarini yil davomida ishchi holatda saqlash va davriy mexanik tozalash ishlarini amalga oshirish maqsadida suv xo‘jaligi tashkilotlari 7 dona zemsnaryadlar bilan ta’minlanadi.
Qoraqalpog‘iston Respublikasida suv xo‘jaligi vazirligida sohani raqamlashtirish yunalishi, davlat nasos stansiyalarining samaradorligini oshirish, suv xo‘jaligi sohasida davlat-xususiy sheriklikni joriy etish borasida 2025-2026-yillarda amalga oshiriladigan DXSh loyihalari, moliyaviy xarajatlari holati, istiqboli hamda tizim tashkilotlarida rivojlantirish jamg‘armasiga mablag‘ tushirish, quyi tizimda ishlovchi suvchilarni qo‘shimcha rag‘batlantirishga qaratilgan loyihalar yuzasidan mas’ullar taqdimot qilishdi.
Taqdimot davomida Suv xo‘jaligi vaziri Sh.Xamrayev har bir loyihani alohida muhokama qilib, o‘zining takliflarini bildirib o‘tdi. Shuningdek, mas’ullarga taqdim etilgan loyihalarni takomillashtirish va ijrosini ta’minlash yuzasidan topshiriqlar berildi.
“Suvxo‘jaliknazorat”
inspeksiyasi axborot xizmati