O‘zbekiston Respublikasi Suv xo‘jaligi vazirligi huzuridagi Suv xo‘jaligi obyektlari xavfsizligini va suvdan foydalanishni nazorat qilish inspeksiyasi

“Suvni zovurga tashlab qo‘yishning har bir holati – favqulodda holat”

Hurmatli fermerlar, dehqon xo‘jaliklari rahbarlari, klasterlar, suv isteʼmolchilari uyushmalari, suv xo‘jaligi tashkilotlari mutaxassislari va barcha suvdan foydalanuvchilar!

Bugungi kunda butun dunyoda suv resurslari taqchilligi, iqlim o‘zgarishi, qurg‘oqchilik davrlarining uzayishi va transchegaraviy suv resurslaridan foydalanish bilan bog‘liq omillar suvdan oqilona va samarali foydalanishni davlat siyosatining eng ustuvor vazifalaridan biriga aylantirmoqda.

O‘zbekistonda ham suv resurslarining har bir kub metri strategik ahamiyat kasb etadi. Shu bois, suvdan foydalanish tartibiga va intizomiga qatʼiy rioya qilish, sug‘orish tarmoqlarida suv isrofiga yo‘l qo‘ymaslik va har bir tomchi suvni maqsadli sarflash bugungi kunning eng dolzarb vazifasidir.

Shuni alohida taʼkidlamoqchimanki, suvni zovurlarga tashlab yuborishning har bir holati – bu oddiy texnologik kamchilik emas, balki suv resurslarini boshqarish tizimidagi favqulodda holat sifatida baholanishi lozim.

Zovurlarga tashlangan har bir kub metr suv:

qishloq xo‘jaligi ekinlarining suv taʼminotini kamaytiradi;

suv xo‘jaligi obyektlarini shikastlantiradi;

suv taqsimoti rejalarining izdan chiqishiga sabab bo‘ladi;

       nasos stansiyalarining ortiqcha energiya sarfiga olib keladi;

davlat byudjeti mablag‘lari hisobidan yetkazib berilgan suvning samaradorligini pasaytiradi;

suv tanqisligi sharoitida boshqa suv isteʼmolchilarining qonuniy huquqlarini cheklaydi;

meliorativ holatning yomonlashishi hamda yerlarning ikkilamchi sho‘rlanishi xavfini kuchaytiradi.

Ayniqsa, vegetatsiya mavsumida har bir suv manbasi, har bir magistral va xo‘jaliklararo kanal, ichki xo‘jalik tarmog‘i hamda gidrotexnik inshootlar orqali uzatilayotgan suv qatʼiy hisobga olinishi, suv o‘lchash vositalari orqali nazorat qilinishi va belgilangan suv limitlari asosida taqsimlanishi shart.

Bugungi kunda suvdan samarali foydalanish nafaqat iqtisodiy samaradorlik, balki oziq-ovqat xavfsizligi, ekologik barqarorlik va kelajak avlodlar manfaatlarini taʼminlashning eng muhim kafolatidir.

Har bir suvdan foydalanuvchi quyidagilarni o‘zining ustuvor vazifasi deb bilishi lozim:

ajratilgan suv limitlariga qatʼiy rioya qilishi;

sug‘orishni agrotexnik talablar va ilmiy asoslangan sug‘orish rejimlari bo‘yicha tashkil etishi;

suvni hisobga olish va monitoring qilish tizimlarini samarali yuritishi;

kanal va ariqlardagi filtratsiya hamda texnologik yo‘qotishlarni qisqartirishi;

gidrotexnik inshootlardan texnik ekspluatatsiya qoidalariga muvofiq foydalanishi;

suv tejovchi texnologiyalar, jumladan tomchilatib sug‘orish, yomg‘irlatib sug‘orish va boshqa resurs tejamkor usullarni keng joriy etishi;

suvdan noqonuniy foydalanish va isrofgarchilikning har qanday ko‘rinishiga murosasiz munosabatda bo‘lishi.

Hurmatli yurtdoshlar!

Suvni tejash – bu faqat iqtisodiy ehtiyoj emas, balki yuksak fuqarolik masʼuliyati, Vatanimiz kelajagiga daxldorlik va milliy boyligimizni asrash demakdir.

Suv resurslaridan samarali foydalanish orqali:

millionlab kub metr suv iqtisod qilinadi;

ko‘proq maydonlarni barqaror suv bilan taʼminlash imkoniyati yaratiladi;

qishloq xo‘jaligi ekinlarining hosildorligi va suv unumdorligi oshadi;

nasos stansiyalarida elektr energiyasi sarfi kamayadi;

davlat xarajatlari qisqaradi;

yerlarning meliorativ holati yaxshilanadi;

ekologik barqarorlik taʼminlanadi;

mamlakatimiz oziq-ovqat xavfsizligi va iqtisodiy taraqqiyoti mustahkamlanadi.

Inspeksiya suvdan oqilona foydalanish, suv isrofining oldini olish va amaldagi qonunchilik talablari ijrosini taʼminlash yuzasidan nazorat tadbirlarini izchil davom ettiradi.

Barcha suvdan foydalanuvchilarni suvdan foydalanish tartibiga qatʼiy amal qilishga, suvni hisob-kitob asosida sarflashga, suv tejovchi texnologiyalarni keng qo‘llashga hamda “Suvni zovurga tashlab qo‘yishning har bir holati – favqulodda holat” degan tamoyilni kundalik faoliyatimizda hayotiy qoidaga aylantirishga chaqiraman.

Suvni asrash – kelajakni asrashdir.

R.B. Raximov

“Suvxo‘jaliknazorat”

inspeksiyasi boshlig‘i