“O‘zbek tili – Davlat tili” mavzusida ma’naviy-ma’rifiy davra suhbati tashkil etildi
2025-10-21 14:30:00 / Tashkilotning boʼlajak va oʼtkazilgan ommaviy tadbirlari
📅 Bugun Texnik jihatdan tartibga solish nazorat inspeksiyasi Farg‘ona viloyati bo‘limi, “O‘zbekiston ilmiy sinov va sifat nazorati markazi” hamda “O‘zbekiston milliy metrologiya instituti” davlat muassasasi filiallari hamkorligida “O‘zbek tili – Davlat tili” mavzusida ma’naviy-ma’rifiy davra suhbati o‘tkazildi.
🎓 Tadbirda Farg‘ona davlat universiteti O‘zbek tili va adabiyoti kafedrasi katta o‘qituvchisi, filologiya fanlari bo‘yicha falsafa doktori (PhD) Sharafutdinova Nilufar Xursandovna faxriy mehmon sifatida ishtirok etdi.
📚 Davra suhbati davomida ishtirokchilarga o‘zbek tilining ming yillik tarixiy ildizlari, buyuk allomalarimiz — Alisher Navoiy, Mahmud Qoshg‘ariy, Zahiriddin Muhammad Bobur kabi mutafakkirlar tomonidan tilimiz taraqqiyotiga qo‘shilgan beqiyos hissa haqida atroflicha ma’lumot berildi.
⚖️ Shuningdek, o‘zbek tilining mustaqil O‘zbekiston davlatchiligi asosidagi maqomi, uning davlat tili sifatidagi huquqiy-me’yoriy asoslari, rasmiy hujjatlar yuritilishida tildan to‘g‘ri va samarali foydalanish zaruriyati alohida ta’kidlandi.
💬 Tadbir davomida ishtirokchilar tilga bo‘lgan hurmat va sadoqat, ona tilida so‘zlashish madaniyati, til me’yorlariga rioya qilish masalalari yuzasidan o‘z fikr-mulohazalarini bildirdilar.
📝 Shu bilan birga, “Davlat tili to‘g‘risida”gi qonun talablariga amal qilish, ish yurituv tizimida o‘zbek tilining izchil va to‘g‘ri qo‘llanilishi bo‘yicha amaliy tavsiyalar ham berildi.
🌸 Mazkur davra suhbati nafaqat ilmiy-nazariy bilimlarni boyitishga, balki tilimizga bo‘lgan mehr va e’tiborni oshirishga xizmat qildi.
🤝 Tadbir yakunida ishtirokchilar ona tilimiz — o‘zbek tilini asrab-avaylash, uni yanada rivojlantirish va yosh avlodga chuqur singdirish borasida barchaning mas’ul ekanini ta’kidladilar.