Isitish qozonlari ishlab chiqaruvchi sex faoliyati o‘rganildi
2025-05-22 10:00:00 / Yangiliklar
O‘rganishlar davomida yakka tartibdagi tadbirkor “RTT” tomonidan ishlab chiqarilayotgan mahsulotlar https://xodim.e-metrologiya.uz/ va http://sert2.standart.uz/ elektron platformalari orqali tahlil qilindi. Natijada, sexda foydalanilayotgan o‘lchash vositalari va sinov uskunalari davlat metrologik tekshiruvlaridan o‘tkazilmagani hamda ishlab chiqarilayotgan isitish qozonlari uchun muvofiqlik sertifikatlari rasmiylashtirilmagani aniqlandi.
Shuningdek, mahsulotlar uchun zarur bo‘lgan normativ hujjatlar mavjud emasligi va ishlab chiqarilayotgan qozonlar amaldagi me’yoriy hujjatlarga muvofiq tamg‘alanmasdan realizatsiya qilinayotganligi holatlari qayd etildi.
Aniqlanishicha, mahsulotlar ГОСТ 30735–2001 standartining 4 hamda 4.3-bandlari, shuningdek, UzTR.880–026:2017 standarti 41-band talablari bo‘yicha yorliqlanmagan. Bu esa “Texnik jihatdan tartibga solish to‘g‘risida”gi Qonunning 29 va 42-moddalari, shuningdek, “Standartlashtirish to‘g‘risida”gi Qonunning 22-moddasi talablariga zid ekani ta’kidlandi.
Aniqlangan kamchiliklarni bartaraf etish maqsadida tadbirkorga tegishli tushuntirishlar berildi. Shu bilan birga, isitish qozonlarini ishlab chiqarish va realizatsiya qilishda zarur bo‘lgan me’yoriy hujjatlar bilan tanishtirish uchun “O‘zbekiston texnik jihatdan tartibga solish agentligi”ning O‘zbekiston standartlar instituti rasmiy veb-saytiga yo‘naltirildi.