Namanganda sifatsiz yuvish vositalari savdoga chiqarilgani aniqlandi
2026-02-27 17:00:00 / Yangiliklar
Texnik jihatdan tartibga solish inspeksiyasining Namangan viloyati bo‘limi tomonidan o‘tkazilgan davlat nazorati tadbirlari davomida Namangan shahridagi savdo shahobchalarida sotilayotgan idish-tovoq yuvish uchun mo‘ljallangan gel va suyuq sovun mahsulotlarining sifatsizligi aniqlandi.
Laboratoriya sinovlari natijalariga ko‘ra, gel mahsulotining ko‘piklanish darajasi belgilangan me’yorlardan yuqori ekani ma’lum bo‘ldi.
Shuningdek, gel va suyuq sovun mahsulotlari davriy sinovlarsiz, sifat nazoratisiz ishlab chiqarilayotgani, ishlab chiqarish jarayonida foydalanilayotgan o‘lchash vositalari esa metrologik qiyoslashdan o‘tkazilmagan holda qo‘llanilayotgani aniqlangan.
Bundan tashqari, mazkur mahsulotlarda muvofiqlik sertifikati mavjud bo‘lmasa-da, yorlig‘ida muvofiqlik (sertifikatlanganlik) belgisi qo‘yilgan holda realizatsiya qilinayotgani ham qayd etildi.
Aniqlangan holatlar yuzasidan O‘zbekiston Respublikasining “Texnik jihatdan tartibga solish to‘g‘risida”, “Standartlashtirish to‘g‘risida” hamda “Metrologiya to‘g‘risida”gi qonunlari talablari buzilgani bo‘yicha ma’muriy huquqbuzarlik to‘g‘risidagi ish hujjatlari rasmiylashtirilib, sud idorasiga yuborildi.
