Pekinda o‘tkazilayotgan WADA simpoziumida O‘zbekistonning antidoping sohasidagi harakatlari yuqori baholandi
2026-06-01 15:15:00 / Yangiliklar
Xitoyning Pekin shahrida Butunjahon antidoping agentligi (WADA) tashabbusi bilan Osiyo va Okeaniya mintaqasida sportda dopingga qarshi kurashish masalalariga bag‘ishlangan XXI Hukumatlararo vazirlar yig‘ilishi hamda Osiyo mintaqaviy simpoziumi bo‘lib o‘tmoqda.
Mazkur nufuzli tadbirlarda O‘zbekiston delegatsiyasi tarkibida Sport vaziri A.Ikramov va O‘zbekiston Milliy antidoping agentligi direktori A.Sadikov ishtirok etmoqda.
Simpozium davomida Sport vaziri A.Ikramov mamlakatimizda antidoping sohasida amalga oshirilayotgan islohotlar, xalqaro standartlarni joriy etish hamda sportda halollik tamoyillarini mustahkamlash borasidagi ishlar yuzasidan taqdimot o‘tkazdi. Shuningdek, O‘zbekiston Butunjahon antidoping kodeksi–2027 talablarini milliy qonunchilikka moslashtirish bo‘yicha ilg‘or natijalarga erishgan davlatlardan biri ekani alohida ta’kidlandi.
Tadbir doirasida xalqaro hamkorlikni rivojlantirish va ilg‘or tajribalarni o‘rganishga qaratilgan qator uchrashuvlar o‘tkazilishi rejalashtirilgan.