Moskva shahrida MDH Hukumatlar rahbarlari uchrashdi

Qirg‘iziston Bosh vaziri Aqilbek Japarov raisligida o‘tgan yig‘ilishda Belarus Bosh vaziri Roman Golovchenko, Ozarbayjon Bosh vaziri Ali Idoyat o‘g‘li, Qozog‘iston Bosh vaziri Alixan Smailov, Rossiya hukumati raisi Mixail Mishustin, Tojikiston Bosh vaziri Qohir Rasulzoda, Armaniston Bosh vaziri o‘rinbosari Mger Grigoryan, Turkmaniston Vazirlar Mahkamasi raisi o‘rinbosari Xojamirat Geldimiradov hamda Mustaqil Davlatlar Hamdo‘stligi Bosh kotibi Sergey Lebedev ishtirok etdi.

Dastlab, Rossiya Federatsiyasi Prezidenti Vladimir Putinning delegatsiyalar rahbarlariga yo‘llagan videomurojaati namoyish etildi.

Hukumatlar delegatsiyalari rahbarlari yig‘ilish mavzusidan kelib chiqib, hamkorlikning madaniy-gumanitar yo‘nalishiga alohida e’tibor qaratishdi.

Qayd etilganidek, Hamdo‘stlik uchun o‘tayotgan yil madaniyat, san’at, adabiyot, kino, fan, ta’lim va sport sohalarida voqealarga boy bo‘ldi.

Jumladan, milliy raqs san’atining yuksak namunasi bo‘lgan “Lazgi — Muhabbat va Qalb raqsi” balet spektakli Rossiya Katta teatrida namoyish etildi. 

Sankt-Peterburgda “O‘zbek kinosi kunlari” bo‘lib o‘tdi. Mukarrama Turg‘unboyeva nomidagi “Bahor” davlat raqs ansamblining Nijniy Novgorod, Yekaterinburg, Ufa, Qozon va Sankt-Peterburg shaharlarida gastrol safarlari tashkil etildi.

Bundan tashqari, Ozarbayjon va Belarusda O‘zbekiston madaniyati kunlari muvaffaqiyatli o‘tkazildi. Mamlakatimizda Qozog‘iston va Turkmaniston madaniyat kunlari tashkil etildi.

Muntazam ravishda teatrlar va ijodiy guruhlar tomonidan Qirg‘iziston va Tojikiston davlatlariga gastrol safarlari, qo‘shma konsertlar uyushtirilmoqda.

Umuman olganda, O‘zbekistonda “Pushkin o‘qishlari”, Abay kunlari, Maxtumquli, Sadriddin Ayniy, Chingiz Aytmatov, Rasul Xamzatov va boshqa ko‘plab buyuk yozuvchi va shoirlar xotirasiga bag‘ishlangan bayram tadbirlari an’anaga aylangan.

Bularning barchasi xalqlarimiz o‘rtasidagi do‘stlik, o‘zaro anglashuv va yaxshi qo‘shnichilik munosabatlarini mustahkamlashga xizmat qilishi ta’kidlandi.

O‘zbekiston Respublikasi Bosh vaziri Abdulla Aripov so‘zlagan nutqida Davlatimiz rahbarining Samarqand shahrini “Hamdo‘stlik mamlakatlarining madaniy poytaxti”, shuningdek, Toshkent shahrini “Hamdo‘stlikning yoshlar poytaxti” deb e’lon qilish bo‘yicha bildirgan tashabbuslarini faol qo‘llab-quvvatlagani uchun delegatsiyalar rahbarlariga minnatdorlik bildirdi.

MDH davlatlari vakillarini shu munosabat bilan o‘tkaziladigan tadbirlarda faol ishtirok etishiga chaqirdi.

Ta’lim va fan, talabalar hamda akademik almashinuvlar, zamonaviy ta’lim texnologiyalarini joriy etish bo‘yicha o‘zaro hamkorlikni davom ettirish muhim ekani bildirildi.

Yig‘ilish so‘nggida madaniy-gumanitar hamkorlikni rivojlantirish istiqbollari to‘g‘risida qo‘shma bayon imzolandi.