Buxoro-Szyasin shahri oʻrtasidagi sanoat yarmarkasi ish boshladi

Bugunga kelib  viloyatda 4200 ta atrofida sanoat ishlab chiqarish va xizmat koʻrsatish korxonasi, 200 dan ziyod xorijiy investitsiya ishtirokidagi korxona samarali faoliyat koʻrsatayotgan boʻlib, ularda 42 mingdan oshiq ishchi-mutaxassisning bandligi taʼminlanmoqda. 

Prezidentimiz Shavkat Mirziyoyev tashabbusi bilan iqtisodiyot tizimini liberallashtirish, qulay investitsiya muhitini yaratish islohotlarning eng muhim yoʻnalishlariga aylandi. Bu islohotlarning amaliy ifodasi sifatida Buxoro viloyatida ham xorijiy investorlarga biznesni amalga oshirish uchun keng imkoniyatlar taklif etilmoqda. Viloyatimizda asosiy tarmoqlar sifatida paxtani qayta ishlash, yengil sanoat, oziq-ovqat, qishloq xoʻjaligi, qurilish, neft-gaz sanoatlari hamda turizm sektori izchil rivojlantirilmoqda. 

Har yili anʼanaviy tashkil etib kelinayotgan hududiy tarmoqlararo sanoat yarmarkalari qurilish materiallari, toʻqimachilik, neft va gaz sanoati, qishloq va suv xoʻjaligi, turizm sanoati uchun mahsulotlar ishlab chiqarish hamda qorakoʻlchilik sohalari kabi yetakchi tarmoqlar faoliyati uchun dasturilamal vazifasini oʻtamoqda.  

Bilim va malakalarni baholash agentligining Buxoro viloyati boʻlimi binosida Xitoyning Szyasin shahri tadbirkorlari sanoat koʻrgazmasi tashkil qilingani ham ikki davlat ishbilarmonlari oʻrtasidagi oʻzaro hamkorlikni rivojlantirishga xizmat qiladi, albatta. 

Viloyatimizdagi tarmoq va hududiy sanoat korxonalari rahbarlari, tadbirkorlar va tashkilotchi masʼullar, ommaviy axborot vositalari vakillari ishtirok etgan tadbirda viloyat hokimi Botir Zaripov hamda Xitoyning Szyasin shahridagi “Oʻzbekiston—Xitoy savdo uyi” rahbari Chin Yu Pin soʻzga chiqishib, sanoat yarmarkasi unda ishtirok etayotgan tadbirkorlar, oʻz imkoniyatlarini oshirish hisobidan mahalliylashtirish va eksport salohiyatini yuksaltirishga hissa qoʻshayotgan xitoylik hamda mahalliy biznes vakillari, muassasalar, ishlab chiqarish korxonalari uchun muhim ahamiyat kasb etishini eʼtirof etishdi.

Taʼkidlanganidek, ayni kunda Oʻzbekiston—Xitoy hamkorlik munosabatlari keng koʻlam kasb etib, har ikkala davlat oʻrtasidagi yaqin doʻstlik hamda oʻzaro sheriklik aloqalari yuksak darajaga koʻtarilmoqda.

Xitoy Xalq Respublikasi Buxoro viloyati bilan tashqi savdo aylanmasida yuqori ulushga ega boʻlgan 5 ta davlatlardan biri ekanini soʻnggi 8 yilda oʻzaro tashqi savdo aylanmasi ikki barobarga oʻsganida ham koʻrish mumkin. Jumladan, 2024-yilda Xitoy Xalq Respublikasi oʻrtasidagi oʻzaro tashqi savdo aylanmasi 401 million AQSH dollarini tashkil etib, 2023-yilning mos davriga nisbatan 106 foizga oʻsgan. Shuningdek, eksport hajmi 23 million AQSH dollari va import hajmi 378 million AQSH dollarini tashkil etgan. 

“Xom ashyodan tayyor mahsulotgacha” uzviy tamoyili asosida viloyatimizda joriy yilda toʻqimachilik korxonalari tomonidan toʻliq siklli ishlab chiqarish yoʻlga qoʻyilmoqda. Shu nuqtayi nazardan, ayni paytda tekstil mahsulotlari ishlab chiqarish sohasiga, bundan tashqari, tabiiy qazilma-kon resursi tarmogʻida tabiiy qoplama tosh, qurilish va silikatli mahsulotlar uchun qum, gʻisht va kafel xom-ashyosi, ohak tosh, qurilish toshi, gips va angidrit, grafit, sement va boshqa xom ashyoga boy qurilish materiallari ishlab chiqarish sohasiga, qolaversa, ijtimoiy sohani rivojlantirishda taʼminotchi tarmoqlar faoliyatini rivojlantirishga sarmoya kiritishga eʼtibor kuchaytirilmoqda.

Bugunga kelib Buxoro viloyatida 4 ta maxsus iqtisodiy zona faoliyat yuritatgan boʻlib, sanoatga ixtisoslashgan “Gʻijduvon”, “Qorakoʻl” erkin iqtisodiy zonalari, shu qatorda “Buxoro sanoatni rivojlantirish kompleksi” maxsus sanoat parki hamda qishloq xoʻjaligiga ixtisoslashgan “Buxoro-agro” erkin iqtisodiy zonasi imkoniyatlari oshirilmoqda. 

Tahlillardan koʻrinishicha, hozirda viloyatda 450 tadan ortiq xorijiy investitsiya ishtirokidagi korxona faoliyat koʻrsatayotgan boʻlsa, viloyatimiz tadbirkorlari va Xitoy Xalq Respublikasi kompaniyalari hamkorligida 70 ta xorijiy investitsiya ishtirokidagi korxona faoliyat koʻrsatayotgan boʻlib, shundan 25 tasi toʻla-toʻkis Xitoy kapitalidagi xorijiy korxona hisoblanadi.

Xorijiy investorlar uchun hududda yaratilgan imtiyozlardan foydalangan holda energetika, toʻqimachilik, qurilish materiallari, farmatsevtika, kimyo, charm-poyabzal, elektrotexnika sanoati sohalarida va qishloq xoʻjaligi sohalarida investitsiya loyihalarini amalga oshirish, erkin iqtisodiy sanoat zonalarida yengil sanoat korxonalarini tashkil etish hamda qishloq xoʻjaligi mahsulotlarini saqlash, qayta ishlash texnologiyalarini oʻrnatish va boshqa yoʻnalishlarda hamkorlik taklif etilmoqda. 

Yarmarka doirasida “Gʻijduvon” erkin-iqtisodiy zonasi hamda Asbob-uskunalar ishlab chiqaruvchilar uyushmasi oʻrtasida ikki tomonlama Anglashuv memorandumi imzolandi.

Viloyatda oʻtayotgan sanoat koʻrgazmasi doirasida Xitoy Xalq Respublikasining 50 tadan ortiq kompaniyasi oʻz mahsulot namunalari va stendlari bilan ishtirok etmoqda. Ikki kun davom etadigan yarmarkada ikki hudud tadbirkorlari va ishbilarmon doira vakillari ishtirokidagi biznes muzokaralar oʻtkazilishi koʻzda tutilgan.