OTB bilan iqtisodiy rivojlanish va sarmoya jalb etish masalalari muhokama qilindi

Uchrashuvda Iqtisodiyot va moliya vazirining birinchi o‘rinbosari Ilhom Norqulov, vazir o‘rinbosari Bobur Xodjayev, shuningdek, Davlat qarzi departamenti direktori Zarifjon Olimjonovlar ishtirok etdi. Xorijiy tomondan OTBning xususiy sektorni rivojlantirish bo‘yicha katta vakili Adham Qo‘chqorov qatnashdi.

Dastlab Jamshid Qo‘chqorov OTBga iqtisodiyotning turli tarmoqlarini rivojlantirishda faol qo‘llab-quvvatlayotgani uchun minnatdorlik bildirdi. Shundan so‘ng, investitsiya loyihalari bo‘yicha davom etayotgan hamkorlik muhokama qilindi. Shuningdek, OTB tomonidan texnik yordam ko‘rsatish muhimligi ta’kidlandi.

Muzokaralar chogʻida OTBning 2024–2028-yillarga moʻljallangan Oʻzbekiston bilan hamkorlik strategiyasini hisobga olgan holda davlat-xususiy sheriklik, moliya bozorlari, mikromoliyaviy sektorni rivojlantirish, shuningdek, energetika sektorini qoʻllab-quvvatlash va “yashil” iqtisodiyotga oʻtish istiqbollari muhokama qilindi.

Shu bilan birga, yo‘l-transport infratuzilmasini rivojlantirish va suv resurslarini boshqarish masalalariga alohida e’tibor qaratildi.

Tomonlar samarali aloqalarga tayyor ekanliklarini bildirib, O‘zbekiston va Osiyo taraqqiyot banki o‘rtasidagi hamkorlikning iqtisodiy rivojlanish hamda sarmoyalarni jalb etish bo‘yicha strategik maqsadlarini amalga oshirishdagi yuqori ahamiyatini tasdiqladilar.