“Ayollar ensiklopediyasi” taqdimoti oʻtkazildi

Oila va xotin-qizlar qoʻmitasi, Oila va gender ilmiy-tadqiqot instituti, Maʼnaviyat va maʼrifat markazi, bir qator olimlar hamda yetuk mutaxassislar hamkorlikda ayollar uchun Yangi yil oldi ajoyib tuhfa “Ayollar ensiklopediyasi” tayyorlandi va nashr etildi.

Kitob Prezident Shavkat Mirziyoyevning Amerikaga tashrifi davomida u yerda yashab, faoliyat yuritayotgan oʻzbekistonlik vatandoshlarimiz bilan uchrashuvda dunyoning rivojlangan davlatlari ayollari tajribasidan kelib chiqqan holdagi  tashabbusi asosida yurtimiz xotin-qizlari uchun metodik asos sifatida ishlab chiqildi. 

Taqdimotda 258 sahifadan iborat ushbu kitobning ahamiyati haqida atroflicha soʻz borib, Bosh vazir oʻrinbosari Z.Mahkamova tomonidan taʼkidlanganidek: “Ayollar ensiklopediyasi”da gender tenglik asosida ayol huquqi, davlat va jamiyat hayotidagi majburiyatlari, qonuniy manfaatlari, farzand tarbiyasi, bola parvarishi, tarbiyasi, ayollar bandligi va tadbirkorligi, maʼnaviyati, ilm-fan, madaniyat va sanʼat, taʼlim, sport, sogʻlom turmush tarzi, diniy maʼrifat, salomatlik va tibbiy maʼlumotlar oʻz aksini topgan boʻlib, ushbu masalalar borasida xotin-qizlar kompetentligiga motivatsiya berishga  xizmat qiladi.