“Zamonaviy ayol qiyofasi: milliylik va qadriyatlar uygʻunligi”

Tadbirda Bosh vazir oʻrinbosari - Oila va xotin-qizlar qoʻmitasi raisi Zulayho Mahkamova maʼruza bilan ishtirok etdi. Taʼkidlanganidek, kiyinish madaniyati  insonning tashqi koʻrinishi, maʼnaviy dunyosi, axloqiy sifatlari va salohiyatini, bir soʻz bilan aytganda, uning kimligini namoyon qiladi. 

Milliy liboslar nafaqat millat koʻrkini, balki maʼnaviy mafkuralarni va xalqlarning dunyo tamaddunida tutgan oʻrnini ham oʻzida namoyon etadi. Har bir xalq tarixi bilan uzviy bogʻliq holda, u milliy oʻziga xoslikni aks ettiradi. 

Bugungi kunda ushbu uzoq tarixni bosib oʻtgan, ajdodlarimiz mafkurasi va dunyoqarashi haqida soʻzlaydigan milliy liboslarimizni saqlab qolish, ularni  targʻib etish ezgu harakatlarimizdan boʻlib qolmoqda. 

Oilalarda milliy anʼanalarimizga hurmat muhitini yaratish, yoshlarimizda oʻzligi, milliy qadriyatlari, milliy liboslariga nisbatan gʻurur va iftixor tuygʻusini yuksaltirishda ayollarimiz -  kelajak tarbiyachilarining oʻrni beqiyos.

Shu bilan birga, shu sohaning rivojiga hissa qoʻshib kelayotgan soha mutaxassislarining, yetuk dizaynerlarning ham xizmatlari kattadir. 

Joylarda yoshlar oʻrtasida milliy kiyinish madaniyatini targʻib qilish, yoshlarda milliy, oʻzbekona liboslarga mehr uygʻotish va ommalashtirish, xotin-qizlarning turli joy va sanalar munosabati bilan kiyiladigan  kiyinish uslubini yanada takomillashtirish, ular oʻrtasida milliy va zamonaviy,  mentalitetimizga mos kiyinish madaniyatiga yangi uslub va tamoyillarni joriy qilish maqsadida “Nafosat” tanlovi oʻtkazilib, ushbu tanlovda gʻoliblikni qoʻlgan kiritgan liboslar boʻyicha mutaxassislar bugungi tadbirda taqdirlandi. 

Milliy qadriyatlarimiz va maʼnaviy merosimizni asrab-avaylash, qizlarimiz qalbiga milliy liboslar iftixorini singdirish, ezgu urf-odat va anʼanalarimizga hurmat va sadoqat, milliy liboslarning goʻzalligi va jozibasini yoshlar oʻrtasida keng targʻib etish maqsadida joylarda oʻtkazilgan bu kabi tadbirlarda  faol ishtirokni milliy qadriyatlarga nisbatan ulugʻ muhabbat timsoli sifatida  qabul qilish mumkin. 

Anjumanda Kamoliddin Behzod nomidagi Milliy rassomlik va dizayn instituti rektori A.Mirzoraximov, Badiiy Akademiya raisi Akmal Nuriddinov, Innovatsion rivojlanish agentligi direktori maslahatchisi – F.Qodirova, sohaning qator yirik vakillari maʼruza bilan ishtrok etdi.

Anjuman yakunida tegishli taklif va tavsiyalar ishlab chiqildi. Jumladan, Oʻzbekistonda libos dizayni, kiyinish madaniyati targʻiboti kabi yoʻnalishlarda katta isteʼdod sohibalarini koʻproq kashf etish; Yosh qizlar oʻrtasida libos dizayni, kosmetologiya sohalarida katta mutaxassislar tayyorlashni yangi bosqichga koʻtarish. Ular bugungi kabi tadbirlarimizning yangicha, kreativ qarashlarini yuzaga chiqarishda, Oʻzbekiston ayollarining chehrasini, imidjini dunyoga koʻrsatishda,  oʻzbekona liboslarimiz jozibasini jahonga namoyish etishda faol, yetakchi boʻlishlari lozimligi; milliy moda sanoatini rivojlantirish, oʻzbek milliy liboslarining hududlar boʻyicha toʻplamlarini yaratish; milliy moda sanoati uchun yuqori malakali kadrlar tayyorlash tizimini tubdan takomillashtirish; xalqaro dizayn markazlari bilan aloqalar oʻrnatish, dizaynerlik ishlanmalari boʻyicha oʻzaro tajriba almashish;  moda haftaliklari, viloyatlarda moda namoyishlari, koʻrgazmalari va festivallarini oʻtkazish kabilar.